ހަނދުގައި ދިދަ ޖެހި ދެ ވަނަ ގައުމަކަށް ޗައިނާ

ބެއިޖިން (ޑިސެމްބަރު 5) - ހަނދުގައި ދިދައެއް ހަރުކުރި ދެ ވަނަ ގައުމުގެ ޝަރަފް ޗައިނާ އިން ހޯދާފައިވާ ކަމަށް އެ ގައުމުން ބުނެފި އެވެ.

ޗައިނާގެ ފަސް ތަރި ހިމެނޭ ރަތް ދިދަ ހަނދުގައި ހަރުކޮށްފައި މި ވަނީ އެމެރިކާގެ ދިދަ ހަނދުގައި ޖެހިތާ 50 އަހަރު ފަހުންނެވެ. ވައިރޯޅިއެއް ނެތް ހަނދުގެ ސަތަހައިގައި ޗައިނާގެ ދިދަ ހުރި މަންޒަރުގެ ފޮޓޯއެއް އެ ގައުމުގެ ނޭޝަނަލް ސްޕޭސް އެޑްމިނިސްޓްރޭޝަނުން ވަނީ އާއްމުކޮށްފަ އެވެ. އެ ފޮޓޯ ނަގާފައި ވަނީ ހަނދުން ސާމްޕަލް ނަގަން ޗައިނާ އިން ފޮނުވި އުޅަނދު ޗަންގުއޫ-5 ގައި ހަރުކޮށްފައިވާ ކެމެރާއަކުންނެވެ. ހަނދުން ސާމްޕަލް ހިފައިގެން އެ އުޅަނދު ބުރާސްފަތި ދުވަހު ވަނީ ދުނިޔެ އަށް މިސްރާބު ޖަހައިފަ އެވެ.

ޗައިނާ އިން މީގެ ކުރިން ހަނދަށް ދިޔަ ދެ ފަހަރެއްގައި އުޅަނދުގެ ބޭރު ކޯޓިންގައި ޗައިނާގެ ދިދަ ހުއްޓެވެ. އެއީ ޗަންގްއޫ-3 އަދި ޗަންގްއޫ-4 މިޝަންގަ އެވެ. ޗަންގްއޫ-4 އިން ހނަދުގެ ދުރު ފަޅިއަށް 2019 ވަނަ އަހަރު ކުރި ދަތުރުގައި ވެސް ޗައިނާގެ ދިދައެއް ގެންދިޔަ އެވެ. ނަމަވެސް މި ފަހަރު ނޫނީ އެއްވެސް ފަހަރަކު ހަނދުގައި ދިދަ ހަރުކޮށްފައެއް ނުވެ އެވެ.

އެމެރިކާއިން ހަނދުގައި ދިދަ ޖަހައިފައި ވަނީ އެޕޯލޯ 11 މިޝަންގައި 1969 ވަނަ އަހަރު އެވެ. ހަނދުގައި ފުރަތަމަ ދިދައެއް ޖަހާފައި ވަނީ އެސްޓްރޮނޯޓް ބަޒް އެލްޑްރިން އެވެ. އޭގެ ފަހުން 1972 ވަނަ އަހަރާ ހަމައަށް ހަނދަން ކުރި މިޝަންތަކުގައި ފަސް ފަހަރެއްގެ މަތިން އެމެރިކާގެ ތަރި އާއި ރަތް ރޮނގުތަކުގެ ދިދަ ހަނދުގައި ހަރުކުރި އެވެ.

ނާސާ އިން 2012 ވަނަ އަހަރު އާއްމުކުރި ސެޓެލައިޓް ފޮޓޯއެއްގައި ވަނީ އެ ފަސް ދިދަ ހަނދުގައި ހުރި މަންޒަރު ދައްކައިފަ އެވެ. ނަމަވެސް ތަޖްރިބާކާރުންނާ ހަވާލާދީ މީޑިއާތަކުން ބުނެފައި ވަނީ އަވީގެ ސަބަބުން އެ ދިދަތަކުން ވަނީ ކުލަ ގޮސްފައި ކަމަށެވެ.

ޗަންގްއޫ-5 މިޝަން އަކީ ހަތް އަހަރު ތެރޭ ޗައިނާ އިން ކާމިޔާބުކަމާ އެކު ހަނދަށް ދިޔަ ތިން ވަނަ މިޝަން އެވެ.