ސީޒަން ސަލާމަތްކުރަން ޗެލްސީ މެޗުން މޮޅުވާންޖެހޭ: އާޓެޓާ

ލަންޑަން (ޑިސެމްބަރު 26) - އާސެނަލްގެ ސީޒަން ސަލާމަތްކުރަން ބޭނުންނަމަ މިރޭ އަމިއްލަ ދަނޑުގައި ޗެލްސީއާ ދެކޮޅަށް ކުޅޭ މެޗުން މޮޅުވުން ކޮންމެހެން މުހިއްމު ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.

ލީގުގައި އެންމެ ފަހުން ކުޅުނު 10 މެޗުގެ ތެރެއިން އާސެނަލް މޮޅުވީ އެންމެ މެޗަކުންނެވެ. އާސެނަލަށް 14 މެޗުން 14 ޕޮއިންޓް ލިބިފައިވާއިރު މިއީ 1974-1975 ގެ ސީޒަނަށް ފަހު އެ ޓީމުގެ އެންމެ ދަށް ސީޒަނެވެ. އަނެއްކޮޅުން މިއީ 1982-1983 ވަނަ އަހަރުގެ ސީޒަނަށް ފަހު ޑިސެމްބަރު ފަހުކޮޅާ ހަަމައަށް އައިިރު އާސެނަލުން ލީގު ތާވަލުގައި ދަށް ހިސާބެއްގައި އޮތް ފުރަތަމަ ފަހަރެވެ. އެ ފަހަރު 16 ވަނައިގައި އޮތްއިރު، މި ފަހަރު އެ ޓީމު އޮތީ 15 ވަނައިގަ އެވެ.

އާސެނަލްގެ ކޯޗު މިކޭލް އާޓެޓާ ބުނީ ކުރިއަށް ހަތެއް ނޫނީ އަށް ވަރަކަށް ދުވަހަކީ އާސެނަލްގެ ސީޒަނުގައި އެ ޓީމަށް ހާސިލްކުރެވޭނީ ކޮން ކަމެއްތޯ އުފެދިފައިވާ ސުވާލަށް ޖަވާބުދޭން ކަންތައްތަކެއް ފެނިގެންދާނެ ދުވަސްތަކެއް ކަމަށެވެ.

"ކުރިއަށް މި އޮތް މެޗުތަކަށް ދާއިރު އަހަރެމެން ފުރަތަމަ ކަމަކަށް އެބަޖެހޭ ސީޒަން ސަލާމަތްކުރާނަމަ މި މެޗުން މޮޅުވާން. ޗެލްސީ ބަލިކުރެވިއްޖެނަަމަ އެ ވެގެންދާނެ ކުޅުންތެރިންގެ އިތުބާރު މައްޗަށް ޖައްސާލަން ވެސް ލިބޭ ފުރުސަތަކަށް،" އާޓެޓާ ބުންޏެވެ.

އާސެނަލްގެ ކުރީގެ ކުޅުންތެރިންނާއި ފުޓްބޯޅަ އެނަލިސްޓުން އަންނަނީ އާޓެޓާ އެ ޓީމުގެ ކުޅުންތެރިން ދިފާއުކޮށް ވާހަކަ ދައްކާ މައްސަލައިގައި ހިތްހަމަނުޖެހުން ފާޅުކުރަމުންނެވެ. ކުޅުންތެރިންގެ މަސައްކަތުގެ ރޭޓު އެކަށީގެންވާ ވަރަށް ނެތި އެ މީހުންގެ ދިފާއުގައި ވާހަކަ ދައްކަނީ ކީއްވެތޯ ނޫސްވެރިއަކު އާޓެޓާ ގާތުގައި ސުވާލުކުރުމުން އޭނާ ބުނީ ސަބަބުތަކެއް ނެތި އެ ގޮތަށް ކަންތައް ނުކުރާނެ ކަމަށެވެ.

"މިއީ އަހަރެން ކުރަން ޖެހޭ ކަމެއް. އަހަންނަށް ފެނޭ އެ މީހުން އެ ކުރާ މަސައްކަތް. އަހަންނަށް ފެނޭ މެޗުތަކުން ބަލިވީމަ އެ މީހުންނަށް އެ ކުރިމަތިވާ މާޔޫސްކަން. އެހެން ބައިވަރު ސަބަބުތަކެއް ވެސް އެބަހުރި. އަހަރެން ކުޅުންތެރިން ހިމާޔަތްކުރާނަން،" އާޓެޓާ ބުންޏެވެ.

އާސެނަލްގެ ކެޕްޓަން ޕިއޭ އެމެރިކް އޮބާމަޔަން އާއި ބްރެޒިލްގެ ޒުވާން ތަރި ގަބްރިއެލް މާޓިނޭލީ މެޗުގެ ކުރިން ފިޓްނަސް ޓެސްޓެއް ހަދާނެ އެވެ. ތިން މެޗުގެ ސަސްޕެންޝަނަކަށް ފަހު މި މެޗުގައި އާސެނަލްގެ ގްރޭނިޓް ޝާކާ ވެސް ކުޅޭނެ ކަމަށް ބެލެވެ އެވެ.

މިދިޔަ ސީޒަނުގެ އެފްއޭ ކަޕު ފައިނަލުގައި ޗެލްސީގެ މައްޗަށް އާސެނަލުން ކުރި ހޯދި އެވެ. އާޓެޓާ ބުނީ މިހާރު އޮތީ އެ ޗެލްސީ ޓީމު ނޫން ކަމަށާއި 220 މިލިއަން ޕައުންޑަށް ވުރެ ގިނައިން އިންވެސްޓްކޮށް ޗެލްސީ ޓީމު އޮތީ ވަރުގަދަކޮށްފައިކަން ގަބޫލުކުރަން ޖެހޭ ކަމަށް އޭނާ ބުންޏެވެ.

އާސެނަލްގެ އެމިރޭޓްސް ސްޓޭޑިއަމްގައި ޗެލްސީއާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން 10:30 ގަ އެވެ.