ސްކޫލްތައް ކައިރީގައި ޕާކުކޮށްފައި ހުރި ވެހިކަލްތައް ނަގަން އަންގައިފި

09 ޖެނުއަރީ 2021

މާދަމާ މާލޭގެ ސްކޫލްތައް ހުޅުވާ އިރު ސްކޫލްތަކުގެ ކުރިމަތީގައި ޕާކުކޮށްފައި ހުރި ވެހިކަލްތައް ނަގަން ޓްރެފިކް ފުލުހުން މިއަދު އަންގައިފި އެވެ.

ލަމްޔާ އަބްދުﷲ

ފުލުހުން ބުނީ ސްކޫލްތަކުގެ ކުރިމަތީގައި ހުރި ނިޝާންތަކާއި އެންގުންތަކާ ހިލާފަށް ޕާކުކޮށްފައިވާ ވެހިކަލްތައް މިއަދު ހަވީރު 6:00ގެ ކުރިން ނަގަން ޖެހޭނެ ކަމަށެވެ.

2021 ޖެނުއަރީ 10 ވަނަ ދުވަހު ސްކޫލްތައް ފެށުމަށް ހަމަޖެހިފައިވާތީ، ސްކޫލް ސަރަޙައްދުގައި ކުރަހާފައި އަދި ބަހައްޓާފައިވާ ޓްރެފިކް ނިޝާންތަކާއި ޚިލާފަށް ޕާރކް ކޮށްފައިވާ އުޅަނދުފަހަރު 2021 ޖެނުއަރީ 9 ވަނަ ދުވަހުގެ 18:00 ގެ ކުރިން ނަންގަވައި ދެއްވުން އެދެމެވެ. ޝުކުރިއްޔާ
— Traffic Police Mv (@TrafficPoliceMv) January 9, 2021

ޓްރެފިކް ފުލުހުން މިއަދު ކުރި ޓްވީޓެއް

ގަވާއިދާ ހިލާފަށް ޕާކުކޮށްފައި ހުންނަ ވެހިކަލްތަކުގައި ސްޓިކާ ޖެހުމުގެ އިތުރުން އެތަކެތި ޓޯކުރުމުގެ ބާރު ފުލުހުންނަށް ލިބެ އެވެ. އަދި ސްކޫލްތައް ދޮށުގައި އެގޮތަށް ޕާކްކޮށްފައި ހުރި ނަމަ މިރޭ އެ އެއްޗެހި ނަގާނެ ކަމަށް ވެސް ބެލެވެ އެވެ.

ކޮވިޑާ ގުޅިގެން މާލޭ ސަރަހައްދުގެ ސްކޫލްތަކުގެ ހުރިހާ ގްރޭޑެއްގެ ކިޔެވުން ކުރިއަށް ނުގެންދާތާ އަހަރެއް ވާން ކައިރިވެއްޖެ އެވެ. ސްކޫލްތައް އަލުން ހުޅުވަނީ ބަލިން ރައްކާތެރިވުމުގެ ގިނަ ފިޔަވަޅުތަކަކާ އެކުގަ އެވެ.