އަދުނާން ފުލުހުންގެ ވަޒީފާއިން ވަކިކުރީ ގޯސްކޮށް: ސުޕްރީމް ކޯޓް

މެރިން ޕޮލިސްގެ ކުރީގެ ވެރިޔާ އިބްރާހިމް އަދުނާން އަނީސް ފުލުހުންގެ ވަޒީފާއިން ވަކިކުރީ ގާނޫނާ ޚިލާފަށް ކަމަށް ސުޕްރީމް ކޯޓުން މިއަދު ހުކުމްކޮށްފި އެވެ.

ފުލުހުންގެ ޗީފް ސުޕްރިޑެންޓެންޓް އޮފް ޕޮލިސްގެ މަގާމުގައި ހުންނަވަނިކޮށް އޮގަސްޓް، 2012 ގައި އަދުނާން ފުލުހުންގެ ވަޒީފާއިން ވަކިކުރީ ފުލުހުންނާއި ސިފައިން ހިންގި ބަޣާވާތުގެ ނަމުގައި އޭރުގެ އިދިކޮޅު ފަރާތްތަކުން ނެރުނު ރިޕޯޓެއްގައި އޭނާ ބައިވެރިވި ކަމަށް ތުހުމަތުކޮށެވެ. އޭނާ ވަކިކުރީ ގޯސްކޮށް ކަމަށް ސިވިލް ކޯޓުން 2014 ގައި ހުކުމް ކުރިޔަސް، ހައި ކޯޓުން 2018 ވަނަ އަހަރު ވަނީ އެ ހުކުމް ބާތިލްކޮށް، އަދުނާން ވަކިކުރީ ރަނގަޅަށް ކަމަށް ހުކުމްކޮށްފަ އެވެ.

ސުޕްރީމް ކޯޓުގެ ހުކުމުގައި ވަނީ ފުލުހަކު ވަޒީފާއިން ވަކިކުރެވޭނީ ގާނޫނާއި ގަވާއިދާ ޚިލާފް ކަމެއް ކުރިކަން ފުލުހުންގެ ތަހުގީގަކަށް ސާބިތުވުމާ އެކު، އެއީ އެ މީހަކު ވަކިކުރަން އެކަށީގެންވާ ސަބަބަކަށް ވެގެން ކަމަށެވެ. އެކަމަކު އަދުނާން ވަކިކުރަން ނިންމީ ފުލުހުންގެ ޑިސިޕްލިނަރީ ބޯޑަށް ހުށަހެޅުނު ކޮން ހެކިތަކަކަށް ބިނާކޮށް ކަމެއް އަދި އެގޮތަށް ބޯޑަށް ބުރަވެވުނު ގޮތެއް ދައުލަތަށް ސާބިތުކޮށް ދެވިފައިނުވާ ކަމަށް ސުޕްރީމް ކޯޓުގެ ހުކުމުގައިވެ އެވެ.

ސުޕްރީމް ކޯޓުގެ ހުކުމުގައިވާ ގޮތުން އަދުނާން ވަކިކުރީ ރަނގަޅަށް ކަމަށް ހައި ކޯޓުން ނިންމީ ފުލުހުންގެ ތަހުގީގުގައި އޭނާ ހަނު ހުރެފައިވާތީ އެކަމުގެ މައްޗަށް އެކަނި ބިނާކޮށެވެ. އަދި އެ ނިންމުން ނިންމުމުގައި ފުލުހުން ޑިސިޕްލިނަރީ ބޯޑުން ރިއާޔަތްކުރި އަދި ރިއާޔަތް ނުކުރާ ކަންކަމަށް ހައި ކޯޓުން ބަލާފައި ނެތުމުން ހައި ކޯޓުގެ ނިންމުން ގޯސް ކަމަށް ސުޕްރީމް ކޯޓުގެ ހުކުމުގައިވެ އެވެ.

އަދުނާން ވަކިކުރީ ގޯސްކޮށް ކަމަށް ހުކުމް ކުރިޔަސް، އޭނާއަށް އަލުން ވަޒީފާ ދިނުމަށް ނުވަތަ ލިބެންޖެހޭ މުސާރަ އާއި އިނާޔަތްތައް ދޭން ސުޕްރީމް ކޯޓުން އަންގާފައެއް ނުވެ އެވެ. ސަބަބެއްގެ ގޮތުގައި ސުޕްރީމް ކޯޓުގެ ހުކުމުގައިވަނީ އަލުން ވަޒީފާ ދިނުމަށް ނުވަތަ ލިބުނު ގެއްލުމުގެ ބަދަލު ނަގައިދޭން ދަށު ކޯޓުގައި އަދުނާން އެދިފައި ނެތުމުން، ދަށު ކޯޓުގައިި އެދިފައި ނެތް ކަމަކަށް އިސްތިއުނާފް މަރުހަލާއިން ފަރުވާ ދެވެން ނޯންނާނެތީ ކަމަށެވެ.

އެ މައްސަލަ ބެއްލެވި ފަނޑިޔާރު އައިޝާ ޝުޖޫން މުހައްމަދާއި ފަނޑިޔާރު އަޒްމިރަލްދާ ޒާހިިރާއި ފަނޑިޔާރު މަހާޒް އަލީ ޒާހިރުގެ އިއްތިފާގުން ނިންމަވާފައިވަނީ ހައި ކޯޓުގެ ހުކުމް ބާތިލް ކުރުމާ އެކު، ސިވިލް ކޯޓުގެ ހުކުމަށް ތާއީދު ކުރުމަށެވެ.

އަދުނާން ވަކި ކުރިކުރުން ދަށު ކޯޓާއި ހައި ކޯޓުގައި ދައުލަތުން ދިފާއު ކުރިޔަސް، ސުޕްރީމް ކޯޓުގައި ދައުލަތުން ވަނީ އޭނާ ވަކިކުރީ ގޯސްކޮށް ކަމަށް އެއްބަސްވެފަ އެވެ. ނަމަވެސް ބަދަލު ދިނުމާ މެދު ދައުލަތުން ޚިޔާލު ތަފާތުވި އެވެ.

އަދުނާންގެ އިތުރުން ފުލުހުންގެ ވަޒީފާއިން ވަކިކުރި ގިނަ އިސް އޮފިސަރުންތަކަކަށް އަލުން ވަޒީފާދޭން މި ސަރުކާރު އައި ފަހުން ކޯޓުތަކުން ހުކުމްކުރި އެވެ. މިހާރުގެ ޕޮލިސް ކޮމިޝަނަރު މުހައްމަދު ހަމީދު ވެސް އޮގަސްޓް، 2012 ގައި ވަކި ކޮށްފައި ވަނިކޮށް އޭނާއަށް އަލުން ވަޒީފާދޭން ހުކުމްކުރީ ސުޕްރީމް ކޯޓުންނެވެ.