އައްޑޫ ކްލަސްޓާ އިން ތިނަދު އާއި ހޯނޑެއްދު އަށް ވެސް ބިރު!

އައްޑޫ ސިޓީ ގަން އެއާޕޯޓުގައި ބޭއްވި ވޯކްޝޮޕެއްގެ ބައިވެރިންތަކެއް ކޮވިޑް-19 އަށް ޕޮޒިޓިވްވެ އައްޑޫން ބަލި ޖެހުނު މީހުންގެ އަދަދު 15 އަށް އަރާފައިވާއިރު މި ކްލަސްޓާ އިން ގދ. އަތޮޅުގެ ބައެއް ރަށްތަކުގައި ވެސް ބަލި ފެތުރިދާނެ ކަމުގެ ބިރު ހީވެއްޖެ އެވެ.

މި ވޯކްޝޮޕް ބޭއްވީ ގދ. ކާޑެއްދޫ އެއާޕޯޓުގައި މަސައްކަތްކުރާ އެ އަތޮޅުގެ އެކި ރަށްތަކުގެ މީހުން ވެސް ބައިވެރިވެގެންނެވެ. ތިން ދުވަހަށް ކުރިއަށް ގެންދިޔަ ވޯކްޝޮޕްގެ ބައިވެރިންތަކެއް ކޮވިޑަށް ޕޮޒިޓިވްކަން އެނގުނީ މިދިޔަ ހޮނިހިރު ދުވަހު އެވެ.

އައްޑޫން ބައްޔަށް ޕޮޒިޓިވްވި މީހަކާ ޑައިރެކްޓް ކޮންޓެކްޓްވި މީހަކު ގދ. ތިނަދޫ އިން ވެސް ވަނީ ކޮވިޑަށް ޕޮޒިޓިވްވެފަ އެވެ. އެ ރަށުގައި ކޮންޓެކްޓް ޓްރޭސިން ހަދަމުން އަންނައިރު ރަށް އޮތީ މޮނިޓަރިންގެ ހާލަތުގަ އެވެ. ގދ. އަތޮޅުގެ އެއްވެސް ރަށަކުން، ކޮވިޑުގެ އަލާމާތެއް ހުރި މީހަކު ފެނިއްޖެ ނަމަ އެކަން އަތޮޅު ހޮސްޕިޓަލަށް އަންގަން ވެސް މިހާރު އޮތީ އެދިފަ އެވެ.

ތިނަދު އިން ކޮވިޑް-19 އަށް ޕޮޒިޓިވްވި މީހަކާ ކޮންޓެކްޓްވި ހޯނޑެއްދޫގެ ފަސް މީހަކު ވަނީ ކަރަންޓީންކޮށްފަ އެވެ. އިތުރު ބަޔަކު ތިބިތޯ ބަލައި ސާމްޕަލް ނެގުމުގެ މަސައްކަތް އަންނަނީ ކުރަމުންނެވެ.

ކާޑެއްދޫ އެއާޕޯޓުން ވެސް ވަނީ ރައްކާތެރި ކަމުގެ ފިޔަވަޅުތައް ވަރުގަދަކޮށްފަ އެވެ.

އައްޑޫގައި ޕްރައިމަރީ ކޮންޓެކްޓުންގެ އަދަދު 50 އަށް

އައްޑޫގެ މޭޔަރު އަބްދުﷲ ސޯދިގު "މިހާރު" އަށް ވިދާޅުވީ އެ ސިޓީގައި ބަލީގެ ދެ ކްލަސްޓާއެއް ފެނިފައިވާ ކަމަށެވެ. އެއީ، މާލެ އިން ދިޔަ އޭވިއޭޝަން ސެކިއުރިޓީގެ ދެ މުވައްޒަފަކު ބައިވެރިވެގެން ބޭއްވި ވޯކްޝޮޕް ކްލަސްޓާގެ އިތުރުން ހުޅުދޫމީދޫގައި ހުންނަ އެމްޓީސީސީގެ ސައިޓް ކްލަސްޓާ އެވެ.

އޭވިއޭޝަން ސެކިއުރިޓީ ކޮމާންޑުގެ ދެ މުވައްޒަފުން ވޯކްޝޮޕްގައި ބައިވެރިވާން ދިޔައީ ޕީސީއާރު ޓެސްޓް ނެގެޓިވްވުމުންނެވެ. އެހެންވެ ކަރަންޓީނެއް ނުވެ އެވެ.

އެމްޓީސީސީ ސައިޓުގައި ކަރަންޓީންގެ މުއްދަތު ނިންމި ދެ ބިދޭސީއަކު ޓެސްޓްކުރިއިރު ބައްޔަށް ޕޮޒިޓިވްވީ އެވެ. އޭރު އެތަނުގައި މަސައްކަތް ކުރާ އެހެން ބިދޭސީން ވަނީ އެ މީހުންނާ ބައްދަލުވެފަ އެވެ.

އެ ސައިޓުގައި މަސައްކަތްކުރާ 50 އަށް ވުރެން ގިނަ މީހުންގެ ތެރެއިން މިހާތަނަށް ވަނީ 25 މީހުން ޕޮޒިޓިވްވެފަ އެވެ. އެކަމަކު މި ކްލަސްޓާ އިން ބަލި ރަށު ތެރެއަށް ފެތުރުމުގެ ފުރުސަތެއް ނެތެވެ.

"ހުޅުދޫމީދޫގައި ސަވައިލެންސް ހެދިއިރު ޕޮޒިޓިވް އެއްވެސް ބަޔަކު ނެތް. އެހެންވެ އެތަން ރައްކާތެރި،" ސޯބެ ވިދާޅުވި އެވެ.

ސޯބެ ވިދާޅުވި ގޮތުގައި ބަލި އަދިވެސް ފެތުރުމުގެ ފުރުސަތު އޮތީ މީހަކު ޕޮޒިޓިވްކަން މިދިޔަ ހޮނިހިރުދުވަހު އެނގުނު ކްލަސްޓާ އިންނެވެ. ޕްރައިމަރީ ކޮންޓެކްޓުންގެ ގޮތުގައި 50 މީހުން މިހާތަނަށް ފާހަގަވެފައިވާ އިރު މި އަދަދު އަދިވެސް އިތުރުވުން އެކަށީގެންވެ އެވެ.

އެއާޕޯޓުގެ ވޯކްޝޮޕްގައި ބައިވެރިންތަކެއް ޕޮޒިޓިވްވި އިރު އެ މީހުން ވަނީ އާއިލާތަކާ ބައްދަލުވެފަ އެވެ. އެއް އާއިލާއަކުން ކުޑަ ކުއްޖަކު ވެސް ވަނީ ޕޮޒިޓިވްވެފަ އެވެ.

އެ މީހުން ހޮޓާތަކާއި ރެސްޓޯރަންޓްތަކާއި ވިޔަފާރި ގާޑިޔާތަކާއި ސަރުކާރުގެ އޮފީސްތަކަށް ވެސް ދިޔަ އެވެ.

"އެހެންވީމަ ކޮމިއުނިޓީ ސްޕްރެޑަކަށް ހިނގައިދާނެ ކަމަށް ބެލެވޭ،" ސޯބެ ވިދާޅުވި އެވެ.

އޭނާ ވިދާޅުވި ގޮތުގައި އައްޑޫ ސިޓީގެ ރަށްތަކުގައި ބަލިން ރައްކާތެރިވުމުގެ ފިޔަވަޅުތައް މިހާރު ވަނީ ވަރުގަދަކޮށްފަ އެވެ. އެއް ރަށުން އަނެއް ރަށަށް ދަތުރުކުރުން މަނަލެވެ.

ސޯބެ ވިދާޅުވީ ކޮވިޑަށް ޚާއްސަ އިތުރު ފެސިލިޓީއެއް މިހާރު އަންނަނީ ތައްޔާރުކުރަމުން ކަމަށެވެ.

ބަލި ފެތުރި އައްޑޫ ސިޓީ މޮނިޓަރިންގައި އޮތަސް ކައުންސިލުން ބުނިގޮތުގައި ހުރިހާ ރަށުގެ އާއްމު ހާލަތު ރަނގަޅެވެ.