ކަންޔޭ ވެސްޓްގެ ގާތުން ވަރިވާން ކިމް ކާޑޭޝަން ކޯޓަށް ހުށަހަޅައިފި

އެމެރިކާގެ މިއުޒިޝަން ކަންޔޭ ވެސްޓްގެ ގާތުން ވަރިވާން އޭނާގެ އަންހެނުން ކިމް ކާޑޭޝަން ރަސްމީކޮށް ކޯޓަށް ހުށަހަޅައިފި އެވެ.

އެ ދެ މީހުންގެ ވަރީގެ ވާހަކަ މިދިޔަ އަހަރުގެ މެދުތެރެއިން ފެށިގެން މީޑިއާތަކުގައި ދެކެމުން އަންނަ އިރު ލޮސް އެންޖެލިސްގެ ސުޕީރިއާ ކޯޓަށް ވަރީގެ މައްސަލަ ހުށަހެޅިކަން އެތަނުގެ އޮފިޝަލަކު ވެސް ހުކުރު ދުވަހު ކަށަވަރުކޮށްދީފައިވެ އެވެ.

މިކަމާ ބެހޭ ގޮތުން ކިމްގެ ގާނޫނީ ޓީމްގައި ހިމެނޭ ކްރިސްޓީ ވެލްޑާއާ މީޑިއާތަކުން ސުވާލުކުރުން އޭނާ ވިދާޅުވީ އެއްވެސް އެއްޗެއް ބުނަން ބޭނުން ނުވާ ކަމަށެވެ. އެކަމަކު ވަރިވާން ހުށަހެޅި ލިޔުންތަކުގައި އެ ނިންމުމަކީ ސުލްހަވެވޭ ވަރަށް ވުރެ މިހާރު ގޯސްވެފައިވާ ގުޅުމެއް ކަމަށާއި އެހެންވެ ހަތަރު ދަރިން ވެސް ކިމްގެ ގާތުގައި ތިބެވޭނެ ގޮތް ވަރީގެ މައްސަލައިގެ ތެރެއިން ހަމަޖައްސައިދޭން އެދިފައިވާ ކަމަށް މީޑިއާތަކުން ބުނެ އެވެ.

ކިމް އާއި ކަންޔޭ ކައިވެނިކުރީ 2014 ގަ އެވެ. އަދި މިދިޔަ އަހަރު ދެ މީހުންގެ ގުޅުން ގޯސްވި ފަހުން ކަންޔޭ ދިރިއުޅެމުން އަންނަނީ ވިއޮމިންގަ އެވެ. ކިމް އާއި ދަރިން ތިބެނީ ކެލިފޯނިއާގަ އެވެ.

ކުރިން ބައެއް މީޑިއާތަކުން ރިޕޯޓްކޮށްފައިވާ ގޮތުގައި ކަންޔޭގެ ގާތުން ވަރިވާން ކިމް ނިންމީ އޭނާ އެހެން މީހަކާ އެކު ގުޅުމެއް ހިންގާކަން ފަޅާއެރުމުންނެވެ. އެ މީހަކީ ޖެފްރީ ސްޓާ ކިޔާ މީހެކެވެ. އެކަމަކު އެ ވާހަކަ ތިލަވަމުން މިދިޔަ މަހު ޖެފްރީ ވަނީ ކަންޔޭއާ އެއްވެސް ގުޅުމެއް ނެތް ކަމަށް ބުނެފަ އެވެ.

ކިމް މީގެ ކުރިން ވެސް ދެ ކައިވެންޏެއްކޮށްފައިވެ އެވެ.