"ރާމް ސެތޫ" އަކީ އަކްޝޭ ކުމާރުގެ ކެރިއަރުގެ އެންމެ ހާއްސަ އެއް ފިލްމު

ފުލުފުލުގައި ފިލްމުތަކަށް ސޮއިކުރަމުން އަންނަ ބޮލީވުޑްގެ އެންމެ ބިޒީ އެކްޓަރު އަކްޝޭ ކުމާރު ފިލްމު "ރާމް ސެތޫ" ޝޫޓިން އަންގާރަ ދުވަހު ފަށައިފި އެވެ.

މި މަހުގެ 18 ވަނަ ދުވަހު އަޔޯދިޔާގައި ބޭއްވި ހަފުލާއެއްގައި ރަސްމީކޮށް ލޯންޗްކުރި ފިލްމުގެ ޝޫޓިން ފެށުމާ އެކު އޭގައި އަކްޝޭ ފެންނާނެ ގޮތުގެ ފަސްޓްލުކް ވެސް އާންމުކޮށްފައިވެ އެވެ. އާކިއަލޮޖިސްޓެއްގެ ރޯލުން އަކްޝޭ ފެންނާނީ ދިގު އިސްތަށިގަނޑަކާއި ނަމްބަރު އައިނަކާ ވެސް އެކީގަ އެވެ. މީގެ ވާހަކަ ސޯޝަލް މީޑިއާގައި ހިއްސާކޮށް އޭނާ ބުނީ މިއީ ކެރިއަރުގެ އެންމެ ހާއްސަ އެއް ފިލްމު ކަމަށެވެ.

"ދަ ޒޯޔާ ފެކްޓާ" އާއި "ތޭރޭ ބިން ލާދިން" ފަދަ ފިލްމުތައް ގެނެސްދިން އަބީޝެކް ޝަރުމާ ޑައިރެކްޓްކުރާ "ރާމް ސެތޫ" ގެ ބަތަލާއިންނަކީ ޖެކްލިން ފެނަންޑޭޒާއި ނުޝްރަތު ބަރޫޗާ އެވެ. މި ފިލްމުގެ ޝޫޓިން ފެށި އިރު އަކްޝޭ އާއި ޖެކްލިން އެންމެ ފަހުން ޝޫޓިން ނިންމި ފިލްމަކީ ފަރުހާދު ސަމްޖީގެ "ބައްޗަން ޕާންޑޭ" އެވެ.

"ރާމް ސެތޫ" އަކީ މި އަހަރުގެ ނޮވެމްބަރު 5 ގައި ރިލީޒްކުރާ އަކްޝޭގެ "ޕްރިތުވީރާޖް" ގެ ޑައިރެކްޓަރު ޑރ. ޗަންދުރަޕްރަކާޝް ދިވެދީ ކްރިއޭޓިވް ޕްރޮޑިއުސަރެއްގެ ގޮތުގައި ހިއްސާވާ ފިލްމެކެވެ.

މި އަހަރު ރިލީޒްކުރާ އަކްޝޭގެ ފިލްމުތަކުގެ ތެރޭގައި "ޕްރިތުވީރާޖް" ގެ އިތުރުން އަންނަ މަހުގެ 30 ގައި ގެނެސްދޭ "ސޫރިޔަވަންޝީ" އާއި މެއި 28 ގައި ގެނެސްދޭ "ބެލް ބޮޓަމް" އަދި ޖޫން 6 ގައި ރިލީޒްކުރާ "އަތުރަންގީ ރޭ" ހިމެނެ އެވެ.

އަކްޝޭ ސޮއިކޮށްފައިވާ ފިލްމުތަކުގެ ތެރޭގައި އޭނާގެ "މިޝަން މަންގަލް" ހެދި ޑައިރެކްޓަރު ޖަގަން ޝަކްތީގެ ސުޕަހީރޯ ފިލްމު "މިޝަން ލަޔަން" އާއި "އަތުރަންގީ ރޭ" ގެ ޑައިރެކްޓަރު އާނަންދު އެލް ރާއީގެ "ރަކްޝާބަންދަން" ހިމެނެ އެވެ.