ވެންޓިލޭޓަރު މައްސަލައިގެ އެއްވެސް ކަމެއް ނުފޮރުވާނަން: ނަސީމް

ވެންޓިލޭޓަރުތަކެއް ގެންނަން ދުބާއީގެ ކުންފުންޏަކާ ހަވާލުކޮށް، ފައިސާ ދިނުމަށް ފަހު ވެންޓިލޭޓަރުތައް ނުލިބުނު މައްސަަލައިގެ އެއްވެސް ކަމެއް ނުފޮރުވައި، ހުރިހާ މައުލޫމާތެއް ރައްޔިތުންގެ މަޖިލީހަށް ދެއްވާނެ ކަަމަަށް ހެލްތު މިނިސްޓަރު އަހުމަދު ނަސީމް މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި ބިލެއްދޫ ދާއިރާގެ އެމްޑީޕީ މެމްބަރު އަހުމަދު ހަލީމް (ދޮންބިލެއް ހަލީމް) ކުރެއްވި ސުވާލަކަށް ޖަވާބު ދެއްވަމުން ނަސީމް ވިދާޅުވީ ހެލްތު މިނިސްޓަރު ކަމަށް އޭނާ ވަޑައިގެންނެވުމުގެ ކުރިން ހިނގާފައިވާ އެ މައްސަލައިގެ ހުރިހާ މައުލޫމާތެއް މިހާރު ވެސް މަޖިލީހަށް ދެއްވާފައިވާނެ ކަމަށެވެ. އެހެން ނަމަވެސް އަދިވެސް މެމްބަރުން ހޯއްދަވަން އެދިވަޑައިގަންނަވާ މައުލޫމާުތުތައް ދެއްވާނެ ކަމަށް ވެސް ވިދާޅުވި އެވެ.

ހަލީމް ކުރެއްވި ސުވާލުގައި އެއްސެވީ ވެންޓިލޭޓަރު ގަންނަން ފޮނުވި ފައިސާ ނުވަތަ ވެންޓިލޭޓަރުތައް ލިބޭނެތޯ އެވެ.

"ވަރަށް ތަފްސީލުކޮށް މިތަނަށް، ވެންޓިލޭޓަރުކަންތަކާ ބެހޭ ގޮތުން އަޅުގަނޑު އޮންނާނީ ސިޓީއަކާ އެއްޗިހި ފޮނުވާފައި. ދެން ވެންޓިލޭޓަރުގެ މައްސަލައިގައި މިތަނުން ބޭނުންފުޅުވާ ހުރިހާ މައުލޫމާތެއް، ވަރަށް އިހުލާސްްތެރިކަމާ އެކީ އަޅުގަނޑު މިތަނަށް ފޮނުވައިދޭނަން. އެއްވެސް އެއްޗެއް އަޅުގަނޑު ފޮރުވާކަން ނެތިން،" ނަސީމް ވިދާޅުވި އެވެ.

އޭނާ ވިދާޅުވީ މައުލޫމާތުތަކެއް ނުދެއްވައި ހިފަހައްޓަވަން އުޅުއްވާ ކަަމަށް ހީވާ ކަހަަލަ ވާހަކަތަކެއް ވެސް ދެކެވޭ ކަމަށާއި އެހެން ނަމަވެސް އެކަހަލަ ކަމެއް ނޯންނާނެ ކަމަށެވެ. ހެލްތު މިނިސްޓްރީގައި ހުރި، އެ މައްސަލައާ ގުޅޭ ހުރިހާ ލިޔެކިއުމެއް ވެސް މަޖިލީހުން ބޭނުންވެެއްޖެ ނަމަ ދެއްވާނެ ކަަމަށް ވެސް ނަސީމް ވިދާާޅުވި އެވެ.

ކުރީގެ ހެލްތު މިނިސޓަރު އަބްދުﷲ އަމީން ހުންނެވި އިރު ދުބާއީގެ އެގްޒެކިއުޓާސް ޖެނެރަލް ޓްރޭޑިން އާ ހަވާލުކުރީ 73 ވެންޓިލޭޓަރު ގެނައުމަށެވެ. ވެންޓިލޭޓަރުގެ އަގަށްވާ ފައިސާގެ ބޮޑުބައެއް ވެސް އެ ކުންފުންޏަށް ވަނީ ދީފައެވެ. އެކަމަކު އެކުންފުނިން މިހައިތަނަށް ރާއްޖެ އަށް ފޮނުވީ އެންމެ 15 ވެންޓިލޭޓަރެވެ. އޭގެ ތެރެއިން ބޮޑު ބަޔަކީ ވެސް ބޭނުމެއް ނުހިފޭ ތަކެއްޗެކެވެ.

ދުބާއީގެ ކުންުފުންޏާ ކުރި އެ މުއާމަލާތުގައި ކޮރަޕްޝަން އެކުލެވިފައިވާ ކަމަށް އޮޑިޓާ ޖެނެރަލް އޮފީހުން ތުހުމަތުކޮށް ރިޕޯޓެއް ނެރުނެވެ. އެ މައްސަލަ ތަހުގީގުކުރަން އެންޓިކޮރަޕްޝަން ކޮމިޝަނާއި ފުލުހުންނަށް ހުށަހެޅީ ސަރުކާރުންނެވެ. އެ މައްސަލައިގައި އަމީނާއި ހެލްތު މިނިސްޓްރީގެ އެހެން މުވައްޒަފުންތަކަކާ ދެކޮޅަށް ދައުވާކުރަން އޭސީސީން ފޮނުވި ނަމަވެސް ޕްރޮސެކިއުޓާ ޖެނެރަލް ހުސައިން ޝަމީމް ނިންމެވީ ދައުވާކުރެވެން ނެތް ކަމަށެވެ.