ޒަހާއާ ދެކޮޅަށް ހުށަހެޅި މައްސަލައިން ޖާބިރުގެ ސޮއި ނެންގެވުމުން އަލުން ދިރާސާ ކުރަނީ

ފިޝަރީޒް މިނިސްޓަރު ޒަހާ ވަހީދުގެ އިތުބާރު ނެތްކަމަށް ފާސްކުރަން ރައްޔިތުންގެ މަޖިލީހަށް ހުށަހަޅާފައިވާ މައްސަލައިން ކާށިދޫ ދާއިރާގެ އަމިއްލަ މެމްބަރު އަބްދުﷲ ޖާބިރުގެ ސޮއި ނެންގެވުމުން އެކަމާ މެދު އަމަލުކުރާނެ ގޮތެއް މަޖިލީހުން ދިރާސާކުރަން ފަށައިފި އެވެ.

ޒަހާ ވަހީދުގެ އިތުބާރު ނެތް ކަމަށް ފާސްކުރަން މަޖިލީހަށް ހުށަހެޅި މައްސަލައިގައި ސޮއިކުރައްވާފައި އޮތީ މަޖިލީހުގެ ރައީސް މުހައްމަދު ނަޝީދު ވިދާޅުވި ގޮތުގައި 10 މެމްބަރުންނެވެ. އެއީ މިނިސްޓަރެއްގެ އިތުބާރު ނެތްކަމަށް މައްސަލައެއް ހުށަހަޅަން އެންމެ މަދުވެގެން ބޭނުންވާ އަދަދެވެ. އެ މައްސަލައިން ޖާބިރުގެ ސޮއި ކަނޑުއްވައިލެއްވީ އެ މައްސަލައިގައި ޒަހާ އަށް މަޖިލީހުން ނޯޓިސް ދީ، އެ ނޯޓިހުގެ މުއްދަތު ވެސް ހަމަވި ފަހުންނެވެ.

ބުދަ ދުވަހުގެ ޖަލްސާގައި ރިޔާސަތުން އަންގާ އެންގުމެއްގެ ގޮތުގައި ނަޝީދު ވިދާޅުވީ ޖާބިރު ސޮއި ނެންގެވި ނެންގެވުން، އެއީ އެގޮތަށް ކުރެއްވޭނެ ކަމެއްކަން ނުވަތަ ނޫންކަން ކަނޑައަޅުއްވަން އެމަނިކުފާނަށް އުނދަގޫ ކަމަށެވެ. އެހެންވެ އެ މައްސަލަ ފޮނުއްވީ މަޖިލީހުގެ އާއްމު ކޮމިޓީއަށެވެ. އެމަނިކުފާނު ވިދާޅުވީ ވަކި ކަމެއް ވަކިި ގަޑިއެއްގައި ކުރެއްވުމަށް ފަހުގައި އެކަމުން އެނބުރިގަތުމުގެ ހައްގު ވެސް މެމްބަރުންނަށް ލިބިވަޑައިގަންނަވަން ޖެހޭނެ ކަމަށާއި އެހެން ނަމަވެސް އެހެން އެތައް މެމްބަރުންނަކާ އެކުގައި ކުރައްވާ މަސައްކަތެއްގައި އެގޮތަށް އެނބުރި ވަޑައިގެންނެވޭނީ ކޮން ގަޑިއެއްގައިތޯ ސުވާލު އުފެދޭ ކަމަށެވެ. އެގޮތަށް ކަންތައް ކުރެއްވުމުން އެ މަސައްކަތަށް ވެގެންދާނީ ކޮން ގޮތެއްތޯ ވެސް، އެމަނިކުފާނު ވިދާޅުވި ގޮތުގައި ސުވާލު އުފެދެ އެވެ.

"ދެން އިއްޒަތްތެރި މެމްބަރުން ސޮއިކުރެއްވުމަށް ފަހުގައި ނޯޓިސްގެ ވަގުތު ވެސް ހަމަވެއްޖެ. ހަގީގަތުގައި ވަޒީރަށް އިތުބާރު އޮތްތޯ ނެތްތޯ ބަލަން އިއްޔެ ވެސް މިތަނަށް ވަޑައިގަންނަވަން ދެންނެވޭނެ. އެހެން އޮތް ކަމެއްގައި، އޭގެ އެތައް ގަޑިއެއް ފަސްވީ ފަހުން މިހެން ހެއްދެވީމާ ވާގޮތަކީ ކޮބައިތޯ އަޅުގަނޑު ހިތުން އަޅުގަނޑުމެން މިފަހަރު އުސޫލެއް ކަނޑައަޅާފައި ބޭއްވުމަކީ ބޭނުންތެރިކަމެއް،" ނަޝީދު އެ ދުވަހު ވިދާޅުވި އެވެ.

ޖާބިރުގެ ސޮއި ނެންގެވި މައްސަލައިގައި އަދި މީގެ ފަހުން އަންނަ އެފަދަ މައްސަލަތަކުގައި އަމަލުކުރާނެ އުސޫލެއް ކަނޑައެޅުމަށް އާއްމު ކޮމިޓީގައި ބުދަދުވަހު ކުރި މަޝްވަރާތަކަށް ފަހު ނިންމީ އެކަން އިތުރަަށް ދިރާސާކުރުމަށެވެ. އެގޮތުން ބަލަން ނިންމީ އެފަދަ މައްސަލަތަކުގައި ރާއްޖޭގައި ކުރިން އަމަލުކޮށްފައި އޮތީ ކޮންގޮތަކަށްތޯ އާއި އެހެން ގައުމުތަކުގައި އެފަދަ ކަންތަކުގައި އަމަލުކުރާ ގޮތެވެ. އާއްމު ކޮމިޓީން އެކަމުގައި ގޮތެއް ނިންމާނީ އެ ދިރާސާ ނިމުމުންނެވެ.

ޖާބިރުގެ ސޮއިި އެ މައްސަލައިން ނެގޭނެ ކަމަށް ކަނޑައަޅަައިފި ނަމަ ޒަހާގެ އިތުބާރު ނެތްކަމަށް ފާސްކުރުމުގެ މައްސަލަ އެހިސާބުން ހުއްޓޭނެ އެވެ.