ސަބް ކޮމިޓީން ނިންމީ ހިޔާނާތުގެ ލިސްޓް އާންމުކުރަން

އެއެމްޕީއާރުސީގެ ބޮޑު ހިޔާނާތުގެ ތުހުމަތުވާ ފަރާތްތަކުގެ ލިސްޓް އާއްމުކުރަން ރައްޔިތުންގެ މަޖިލީހުގެ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) އާއި ޖުޑިޝަރީ ކޮމިޓީ ގުޅިގެން އުފައްދާފައިވާ ޖޮއިންޓް ކޮމިޓީގެ ސަބް ކޮމެޓީން ރޭ ނިންމައިފި އެވެ.

އެމްއެމްޕީއާރުސީ ލިސްޓް ދިރާސާކުރުމަށް ފަހު އެ ލިސްޓާ ބެހޭ ފައިނަލް ރިޕޯޓެއް އެކުލަަވައިލަން ޖޮއިންޓް ކޮމިޓީން ނެގި ސަބް ކޮމިޓީން މިއަދު އެ ރިޕޯޓް ހުށަހެޅި އިރު ލަފާ ދިިނީ ތަހުގީގީ އިދާރާތަކުން ފޮނުވި ލިސްޓް އެ އޮތް ގޮތަށް ހާމަކުރުމަށެެވެ. އެކަމަކު މީހުންގެ މަގާމު ނުބައިކޮށް ލިޔެވިފައިވުމާއި އެކަކުގެ ނަން ރިޕީޓްވެފަައި އޮތުން ފަދަ ކުށްތައް ހުރިކަން ވެސް އެއާ އެކު ފާހަގަކުރި އެވެ.

ސަބް ކޮމިޓީގެ ރިޕޯޓްގައިވާ ގޮތުން އެސެޓް ރިކަވަރީ ކޮމިޝަނުން ފޮނުވި ލިސްޓްގައި 241 ނަމެއް އޮތް އިރު، މަގާމުތަކުގައި ތިބި 119 ފަރާތެއްގެ ނަން އޭގައި އެބަ އޮތެވެ.

ސަބް ކޮމިޓީން ރޭ އެކުލަަވައިލި ރިޕޯޓްގައި އޮތީ ތުހުމަތުވާ މީހުންގެ ތެރެއިން މަގާމުތަކުން ވަކިކުރެވެން ހުރި ފަރާތްތައް ވަކިކުރުމަށެވެ. އެގޮތަށް އެއޮތީ އިންތިހާބީ މަގާމުތަކުގަައި ތިބި މީހުން ވަގުތުން ވަކިނުކުރެވޭނެތީ އެވެެ.

ސަބް ކޮމިޓީން ރޭ އެކުލަވައިލި ރިޕޯޓްގައި މައިގަނޑު އަށް ކަމެއް ކުރަން ހުށަހަޅާފައި އޮތް އިރު މީހުން ވަކިކުރަން އޮތީ ފަސް ވަނައަށެވެ. ހަވަނައަށް އޮތީ ތުހުމަތުވާ މީހުންގެ ތެރެއިން އިންތިހާބީ މަގާމުތަކުގައި ތިބި މީހުން ވަކިކުރެވޭނީ ޝަރުއީ ހުކުމަކުން ނުވަތަ އެ ފަރާތްތައް އަމިއްލައަށް އިސްތިއުފާ ދިނުމުން ކަމަށް ވާތީ، އެފަދަ ފަރާތްތަކުގެ ތަހުގީގު އަވަސްކުރަން އެސެޓް ރިކަވަރީ ކޮމިޝަނަށް އެންގުމަށް ރިޕޯޓްގައި ވެ އެވެ.

ރިޕޯޓްގައި ހުރި އެހެން ހުށަހެޅުންތަކުގެ ތެރޭގައި، މިހައިތަނަށް ތަހުގީގު ނިމިފައިވާ ފަރާތްތަކުގެ އަތުންް ފައިސާ އަނބުރާ ހޯދަން ދައުލަތުގެ ކަމާ ބެހޭ އިދާރާތަކުގައި ދެންނެވުމާއި އެކަން ކުރިއަށްދާ ގޮތް މަޖިލީހުން ބެލުން ހިމެނެ އެވެ. ތަހުގީގު ކުރިއަށް ދާއިރު ތުހުމަތުވާ ފަރާތްތަކަށް މިހާރުން މިހާރަށް އެޅެން ހުރި އެހެން ފިޔަވަޅުތައް އެޅުމަށް ވެސް ރިޕޯޓްގައި ހިމަނާފައި ވެ އެވެ.

ސަބް ކޮމިޓީން ހުށަހެޅި ހުށަހެޅުންތައް ފާސްކުރުމަށް ޖޮއިންޓް ކޮމެޓީގެ ބައްދަލުވުމެއް މަޖިލީހުގައި މިހާރު އަންނަނީ ހިނގަމުންނެވެ. ޖޮއިންޓްް ކޮމިޓީގައި މިހާރު ކުރިއަށްދާ ބަހުސްގައި މެމްބަރުންގެ ރޫހު ހުރީ ސަބްކޮމިޓީީގެ ރިޕޯޓް އޮތް ގޮތަށް ފާސްކުރާށެވެ.