ނަޝީދު އަވަހާރަކޮށްލަން ފަންޑުކުރި މީހުންނާ ހަމައަށް ދެވޭނެ ކަމަށް ވަރަށް ބޮޑަށް އުއްމީދުކުރަން: އަސްލަމް

ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަވަހާރަކޮށްލަން ފަންޑުކުރި މީހުންނާ ހިސާބަށް ދެވޭނެ ކަމަށް ވަރަށް ބޮޑަށް އުއްމީދުކުރާ ކަމަށް، މަޖިލީހުގެ 241 ކޮމިޓީގެ މުގައްރިރް މުހައްމަދު އަސްލަމް މިއަދު ވިދާޅުވެއްޖެ އެވެ.

އެ ހަމަލާއާ ގުޅިގެން މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ހަދާ އިންކުއަރީއާ ގުޅޭގޮތުން ބޭއްވި ނިއުސް ކޮންފަރެންސްގައި ހިތަދޫ އުތުރު ދާއިރާގެ މެމްބަރު ވިދާޅުވީ މީގެ ކުރިން ފުލުހުން ހިންގި ތަހުގީގުތަކާ އަޅާބަލާއިރު، ނަޝީދަށް ދިން ޓެރަރިސްޓް ހަމަލާގެ ތަހުގީގު ތަފާތުކަމަށް ގަބޫލުކުރެވޭ ކަމަށެވެ.

އޭނާ ވިދާޅުވި ގޮތުގައި ފައިނޭންޝަލް އިންޓެލިޖެންސް ޔުނިޓާ ގުޅިގެން، މާލީ މުއާމަލާތް ހިނގާފައިވާ ގޮތުގެ ތަފްސީލް ދެނެގަތުމަށް އަންނަނީ މަސައްކަތްކުރަމުންނެވެ. އަދި އެކަމުގައި ފައިނޭންޝަލް އިންޓެލިޖެންސްގެ ބޭރުގެ ތަޖުރިބާކާރެއްގެ އެހީ ހޯއްދަވަން ނިންމާފައިވާ ކަމުގެ މައުލޫމާތު ވެސް އެ ކޮމިޓީއާ ހިއްސާކޮށްފައިވާ ވިދާޅުވި އެވެ.

"މި ފަދަ ތަޖުރިބާކާރެއްގެ އެހީތެރިކަމާއެކު މިކަން ކުރެވިގެން ދާއިރު އަޅުގަނޑަށް ހީވަނީ މޯލްޑިވްސް ޕޮލިސް ސާވިސް އަދި އާއްމު ރައްޔިތުން ވެސް އަދި މިކަމާ ގުޅިގެން އަޅުގަނޑުމެން އެންމެން ވެސް ހޯދަން ބޭނުންވާ ގިނަ ކަންތައްތަކެއް ހޯދުމަށް މަގުފަހިވެގެންދާނެ ކަމަށް،" އަސްލަމް ވިދާޅުވި އެވެ.

ނަޝީދަށް މި މަހުގެ ހަ ވަނަ ދުވަހު ދިން ހަމަލާގެ ތަހުގީގު ކުރިއަށްދާ ގޮތުގެ މައުލޫމާތު ދިނުމަށް މަޖިލީހުގެ 241 ކޮމިޓީއާ ފުލުހުންގެ އިސްވެރިން މީގެ ކުރިން ބައްދަލުކޮށްފައި ވެ އެވެ.

އެކަމާ ގުޅިގެން "މިހާރު"ން ކުރި ސުވާލަށް ޖަވާބު ދެއްވަމުން އަސްލަމް ވިދާޅުވީ، އެ ބައްދަލުވުމުގައި ފުލުހުން ހިއްސާކުރި މައުލޫމާތުން، ނަޝީދަށް ހަމަލާދޭން ފަންޑުކުރި މީހުންނާއި އޭގެ މަގުސަދު ހާސިލްވާނެ ކަމަށް ތަހުގީގުގެ ތެރޭގައި ވަރަށް ބޮޑު އުއްމީދު ކުރައްވާ ކަމަށެވެ.

އަދި އެ ހިސާބަށް ނުދެވެނީ ތަހުގީގުގެ ކިހާ ހިސާބަކުންތޯ އަދި ކީއްވެގެންތޯ އިންކުއަރީގެ ބޭރުން ވެސް 241 ކޮމިޓީން ބަލާނެ ކަމަށް ވިދާޅުވި އެވެ.

"އެ ޔަގީންކަން އަޅުގަނޑުމެން އަރުވަން ތި ބޭފުޅުންނަށް މި މައްސަލައިގައި ބާރަށް ކުރިއަށް ދާނަން،" އަސްލަމް ވިދާޅުވި އެވެ.

އެ މައްސަލައިގައި ކޮމިޓީގެ އިންކުއަރީގެ ސްކޯޕުގައި ހިމެނެނީ މައިގަނޑު ހަ ކަމެކެވެ. އެއީ ނަޝީދަށް ހަމަލާ ދިނުމުގެ ކުރިން އެ ހަމަލާއާ ގުޅޭ އެއްވެސް މައުލޫމާތެއް ސަލާމަތީ ހިދުމަތްދޭ ފަރާތްތަކާއި ދައުލަތުގެ އެއްވެސް އިދާރާއަކަށް ލިބިފައިވޭތޯ ބެލުމާއި ސަލާމަތީ ބާރުތަކުން ހިމާޔަތާއި ރައްކާތެރިކަން ފޯރުކޮށްދޭންޖެހޭ ފަރާތްތަކަށް އެ ހިދުމަތް ފޯރުކޮށްދިނުމަށް ކަނޑައަޅާފައިވާ މިންގަނޑުތައް ބެލުމާއި ސަލާމަތީ ބާރުތަކުން ނަޝީދަށް ހިމާޔަތާއި ރައްކާތެރިކަން ދިނުމުގައި އަމަލުކުރަމުން ދިޔަ ގޮތް ދެނެގަތުން ހިމެނެ އެވެ.

އޭގެ އިތުރުން ފައިނޭންޝަލް އިންޓެލިޖެންސް މައުލޫމާތު އެއްކުރާ ގޮތާއި އެ މައުލޫމާތު ލިބުމުން އަމަލުކުރާ ގޮތް ބަލައި ގާނޫނީ އޮނިގަނޑާ އެއްގޮތަށް އަމަލުކުރަމުންދާ މިންވަރު ވެސް އެ އިންކުއަރީގައި ބަލާނެ އެވެ.

އެ ކޮންމެ ސުރުހީއެއްގެ ދަށުން ކުރާނެ މަސައްކަތްތައް ބަލައި ޓައިމްލައިނެއް ވަނީ ކަނޑައަޅައިފަ އެވެ.

އަސްލަމް ވިދާޅުވީ ތަހުގީގާ ގުޅޭގޮތުން ކޮމިޓީއަށް ވަރަށް ގިނަ މައުލޫމަތު ލިބިފައިވާ ކަމަށާއި އަދި ވެސް އިތުރު މައުލޫމާތު ހޯދަމުން އަންނަ ކަމަށެވެ. އަދި މައުލޫމާތުތަކަށް ބަލައި ކޮމިޓީން މައްސަލަ ދިރާސާކުރަމުން އަންނަކަން އޭނާ ފާހަގަކުރެއްވި އެވެ.

ނަޝީދަށް ދިން ހަމަލާއާ ގުޅިގެން މިހާތަނަށް ހަތަރު މީހަކު ހައްޔަރުކޮށްފައި ވެ އެވެ. އޭގެ ތެރެއިން އެންމެ ފުރަތަމަ ހައްޔަރުކުރި ތިން މީހުންގެ ބަންދަށް އިއްޔެ އިތުރު 15 ދުވަސް ޖަހާފައި ވެ އެވެ.