ދެ ބާރުގެ ވެރިންނަށް ގެކޮޅާއި މުވައްޒަފުން ހަމަޖެއްސުމުގެ ބިލް މަޖިލީހަށް

ރައްޔިތުންގެ މަޖިލީހުގެ ރައީސާއި އުއްތަމަ ފަނޑިޔާރާއި އެ ބޭފުޅުންގެ އާއިލާ ދިރިއުޅުއްވަން ދައުލަތުން ރަސްމީ ގެކޮޅަަކާއި މުވައްޒަފުން ހަމަޖައްސައި ދިނުމުގެ ބިލް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅައިފި އެވެ.

މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން ސަރުކާރުން ވަނީ މަޖިލީހުގެ ރައީސާއި އުއްތަމަ ފަނޑިޔާރަށް ރަސްމީ ގެކޮޅެއް ހަމަޖައްސަން ގާނޫނު އިސްލާހު ކުރަން ނިންމައިފަ އެވެ. މަޖިލީހުގެ ރައީސާއި އުއްތަމަ ފަނޑިޔާރު މިހާރު ދިރިއުޅުއްވަނީ އެ ބޭފުޅުން އަމިއްލަފުޅު ގެކޮޅުގަ އެވެ.

މަޖިލީހުގެ އިމްތިޔާޒްތަކާއި ބާރުތަކުގެ ގާނޫނަށާއި ފަނޑިޔާރުންގެ ގާނޫނަށް އިސްލާހު ގެންނަން ސަރުކާރުގެ ފަރާތުން ހުށަހެޅި ބިލްގައިވާ ގޮތުން މަޖިލީހުގެ ރައީސާއި އުއްތަމަ ފަނޑިޔާރު ދިރިއުޅުއްވާ ރަސްމީ ގެކޮޅެއް ހަމަޖައްސައި ދިނުމުގެ އިތުރުން އެމްއެންޑީއެފް އިން އެތަނުގެ ސެކިއުރިޓީ ބަލަހައްޓަން ޖެހޭނެ އެވެ. އަދި އެ ގޭގައި އެ ބޭފުޅުންގެ ދަރިންނާއި އަނބިންނާއި މަންމަ އަދި ބައްޕައަށް ދިރިއުޅެވޭނެ ކަމަށް އެ ދެ ބިލުގައިވެ އެވެ.

އެ ދެ ބިލުގައިވާ ގޮތުން އެ ދެ ގެއަށް ދައުލަތުގެ ޚަރަދުގައި މުވައްޒަފުން ވެސް ހަމަޖައްސައިދޭން ޖެހޭނެ އެވެ. މަޖިލީހުގެ ރައީސަށް ހަމަޖައްސާ ގެކޮޅުގެ މުވައްޒަފުންގެ ކަންކަން މަޖިލީހުގެ އިދާރާއިން ބަލަހައްޓަން ޖެހޭނެ ކަމަށާއި އަދި އުއްތަމަ ފަނޑިޔާރަށް ހަމަޖައްސާ ގެކޮޅުގެ މުވައްޒަފުންގެ ކަންކަން ބަލަހައްޓާނީ ސުޕްރީމް ކޯޓުން ކަމަށް އެ ބިލުގައިވެ އެވެ.

ދައުލަތުގެ ތިން ބާރުގެ ވެރިން ތެރެއިން ރަސްމީ ގެކޮޅެއް މިހާތަނަށް ހަމަޖައްސާފައިވަނީ ރައީސަށް އެކަންޏެވެ. އެހެން ނަމަވެސް ރައީސެކޭ އެއްގޮތަށް މަޖިލީހުގެ ރައީސާއި އުއްތަމަ ފަނޑިޔާރުގެ ސެކިއުރިޓީ އަބަދުވެސް ބަލަހައްޓަނީ އެމްއެންޑީއެފްއިންނެވެ. އަދި ދައުލަތުގެ ނިޝާން ޖެހި ކާރުކޮޅެއް ވެސް އެއިން ކޮންމެ ބޭފުޅަކަށް މިހާރު ވެސް އޮވެ އެވެ.

ނަޝީދަށް އަމާޒުކޮށް ދިން ޓެރަރިސްޓް ހަމަލާގައި އެމަނިކުފާނަށް ބޮޑެތި އަނިޔާތަކެއް ލިބިވަޑައިގަތެވެ. އެމަނިކުފާނު މިހާރު ހުންނެވީ އިތުރު ފަރުވާއަށް ޖަރުމަނުގަ އެވެ. އެ ހަމަލާއާ ގުޅިގެން ހަތަރު މީހަކު މިހާތަނަށް ވަނީ ހައްޔަރުކޮށްފަ އެވެ.