ގަރާޖާއި ގުދަންތައް އިންޑަސްޓްރިއަލް ވިލެޖަށް ބަދަލުކުރަން ސާވޭއެއް ފަށައިފި

މާލޭގައި ހިންގާ ސިނާއީ މަސައްކަތް ކުރާ ތަންތަން އިންޑަސްޓްރިއަލް ވިލެޖަށް ބަދަލު ކުރުމުގެ ސާވޭއެއް މާލޭ ސިޓީ ކައުންސިލުން މިއަދު ފަށައިފި އެވެ.

މާލޭގެ މޭޔަރު ޑރ. މުހައްމަދު މުއިއްޒު މިއަދު ކުރެއްވި ޓުވީޓެއްގައި ވިދާޅުވީ، މާލެތެރޭގައި ހުރި ގުދަންތަކާއި ގަރާޖުތަކާއި ވޯކްޝޮޕް އަދި ވަޑާންގެތަކާއި ގާއަޅުން ފަދަ ސިނާއީ މަސައްކަތް ކުރާ ތަންތަން އެ ކަމަށް ހާއްސަ އިންޑަސްޓްރިއަލް ވިލެޖަށް ބަދަލުކުރަން ސަރުކާރުގައި ދަންނަވަން ނިންމާފައިވާ ކަމަށެވެ. އޭގެ ކުރިން އެ ތަންތަނާ ބެހޭ މައުލޫމާތު އެއްކުރުމަށް ސާވޭއެއް މިއަދު ފަށާފައިވާ ކަމަށް މުއިއްޒު ވިދާޅުވި އެވެ.

ދައުލަތުގެ ބަޖެޓުން 159 މިލިއަން ރުފިޔާ ހަރަދުކޮށް، މާލޭގެ ހުޅަނގު ދެކުނު ފަރާތުން ބޮޑު ބައެއް ހިއްކައި އިންޑަސްޓްރިއަލް ވިލެޖު ތަރައްގީ ކުރުމަކީ ވެސް ހައުސިން މިނިސްޓަރުގެ މަގާމުގައި މުއިއްޒު ހުންނަވައިގެން ފެއްޓެވި މަސައްކަތެކެވެ. ނަމަވެސް މުއިއްޒު ވަޒީރުކަން ކުރެއްވި، ކުރީގެ ރައީސް އަބްދުﷲ ޔާމީންގެ ސަރުކާރު ނިމުނުއިރު ވެސް އެ މަސައްކަތް އޮތީ ނުނިމި އެވެ.

އޭގެ ފަހުން މިއަދާ ހަމައަށް ވެސް އިންޑަސްޓްރިއަލް ވިލެޖު އޮންނަނީ އެއްވެސް ބޭނުމެއް ނުކޮށް ދޫކޮށްލައިފަ އެެވެ. އެތަނަށް ބާ ދަނގަޑު އަޅައި ކުނިގޮނޑަކަށް ވަނީ ހަދައިފަ އެވެ.

މާލޭގެ މޭޔަރުކަމާ މިދިޔަ މަހުގެ 17 ގައި ހަވާލުވެވަޑައިގަތުމަށް ފަހު، އެ މަހުގެ 19 ގައި ބޭއްވި ފުރަތަމަ މީޑިއާ ބްރީފިންގައި މުއިއްޒު ވިދާޅުވެފައި ވަނީ މާލޭގައި ހުރި ގުދަންތަކާއި ގަރާޖުތަކާއި ވޯކްޝޮޕްތައް އިންޑަސްޓްރިއަލް ވިލެޖަށް ބަދަލުކުރަން އާ ކައުންސިލަރުންގެ އިއްތިފާގުން ނިންމާފައިވާ ކަމަށެވެ. އެހެންވެ، އެ ނިންމުން ތަންފީޒު ކުރާނެ ކަމަށް އޭނާ ވިދާޅުވެފައި ވެ އެވެ.

މުއިއްޒު ވިދާޅުވެފައިވާ ގޮތުގައި، އިންޑަސްޓްރިއަލް ވިލެޖްގެ ޕްލޭން ހަދައި، ކަމާ ބެހޭ ވުޒާރާ އަށް ހުށަހަޅައިގެން އެ ތަން ތަރައްގީ ކުރާނެ ބަޔަކު ފަހުން ހޯދާނެ އެވެ.

އޭނާ ވިދާޅުވެފައި ވަނީ، މާލޭގައި ގަރާޖު/ވޯކްޝޮޕްތައް މިހާރު ހިންގާ މީހުންގެ އިތުރުން އެ ދާއިރާ އަށް އަލަށް ވަންނަ މީހުންނަށް ވެސް އިންޑަސްޓްރިއަލް ވިލެޖުން ފުރުސަތު ދޭނެ ކަމށެވެ.

މިހާރުގެ ހައުސިން މިނިސްޓަރު މުހައްމަދު އަސްލަމް، އިންޑަސްޓްރިއަލް ވިލެޖު ސިފަ ކުރައްވަނީ "ޖަންކް ޔާޑެއް" ގޮތުގައެވެ. އެތަނަށް ގަރާޖުތައް ބަދަލު ކުރުމުގެ ވިސްނުމެއް ނެތް ކަމަށާއި އިންޑަސްޓްރިއަލް ވިލެޖަކީ ގަރާޖުތައް ހެދުން ފަދަ މަސައްކަތަށް އެންމެ އެކަށީގެންވާ ތަނެއް ނޫން ކަމަށް އޭނާ ވިދާޅުވެފައިވެ އެވެ.