އިންޑަސްޓްރިއަލް ވިލެޖުގެ ބިންތަކާ ސިޓީ ކައުންސިލަކަށް ނުކުޅެވޭނެ: ޕްލޭނިން މިނިސްޓްރީ

އިންޑަސްޓްރިއަލް ވިލެޖަކީ މާލޭ ސިޓީ ކައުންސިލްގެ އިހުތިސާސްގެ ތެރޭގައި ހިމެނޭ ތަނެއް ނޫން ކަމަށާއި އެ ތަނުން ދޫކޮށްފައިވާ ބިންތަކާ ކައުންސިލަށް "ނުކުޅެވޭނެ" ކަމަށް ޕްލޭނިން މިނިސްޓްރީން މިއަދު ބުނެފި އެވެ.

އެ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން "މިހާރު" އަށް ވިދާޅުވީ ސްޓެލްކޯ އަށް އިންޑަސްޓްރިއަލް ވިލެޖުން ދޫކޮށްފައިވާ ބިމެއް ސިޓީ ކައުންސިލުން ހުސްކުރި މައްސަލައިގައި، އެކަން އެގޮތަށް ނުކުރެވޭނެ ކަން އަންގައި މާލޭގެ މޭޔަރު ޑރ. މުހައްމަދު މުއިއްޒަށް ނޯޓިސްއެއް ވެސް މިހާރު ފޮނުވާފައިވާ ކަމަށެވެ.

ސްޓެލްކޯ އަށް ދޫކޮށްފައިވާ ބިމަކީ ސިޓީ ކައުންސިލްގެ ބިމެއް ނޫން ކަމަށާއި އެ ބިން އަނބުރާ އެ ކުންފުންޏާ ހަވާލުކުރުމަށް ޕްލޭނިން މިނިސްޓްރީން ފޮނުވި ނޯޓިސްގައި އެދިފައި ވެ އެވެ.

"ވަކި ބަޔަކަށް ނުދީ އޮންނަ ބިމަކީ ދައުލަތުގެ ބިން. ދައުލަތުން ބިން ބަލަހައްޓަނީ ސަރުކާރުން، މިނިސްޓްރީން އޮފް ޕްލޭނިން އިން،" އަކްރަމް ވިދާޅުވި އެވެ.

"އިންޑަސްޓްރިއަލް ވިލެޖަކީ ވަކި ބަޔަކާ ހަވާލުކޮށްފައި އޮތް ތަނެއް ނޫން. ސިޓީ ކައުންސިލަކަށް އެތަނަށް އަތެއް ނުލެވޭނެ. އެއީ އެމީހުންނާ ހަވާލުކޮށްފައި އޮތް ބިމެއް ނޫން."

ސްޓެލްކޯ އަށް އިންޑަސްޓްރިއަލް ވިލެޖުން ދޫކޮށްފައިވާ ބިމުގައި ހުރި މުދާތައް ނަގައިގެން މާލޭ ސިޓީ ކައުންސިލުން ބޭނުންކުރަމުންދާ ކަމަށް ތުހުމަތުކުރާ މައްސަލަ އެ ކުންފުނިން މިހާރު ވަނީ ފުލުހުންނަށް ވެސް ހުށަހަޅައިފަ އެވެ.

މާލެ ސަރަަހައްދަށާއި ބައެއް ރަށްރަށަށް ކަރަންޓުގެ ހިދުމަތް ދޭ ސްޓެލްކޯގެ އޮފިޝަލަކު މީޑިއާގައި މިދިޔަ ހޮނިހިރު ދުވަހު ވިދާޅުވީ، އެ ކުންފުނީގެ މުދާތައް ސިޓީ ކައުންސިލުން ނެގީ އެންގުމަކާ ނުލައި މިދިޔަ ބޮޑު ޗުއްޓީ ބަންދުގެ ތެރޭގައި ކަމަށެވެ. ސްޓެލްކޯގެ ބިމުގައި ހުރި ފެންސުތައް ނަގައި ކައުންސިލްގެ ބިމެއްގައި އެ ފެންސްތައް ޖަހާފައިވާ ކަމަށް ވެސް އޭނާ ވިދާޅުވި އެވެ.

އޭނާ ވިދާޅުވިގޮތުގައި، ސްޓެލްކޯގެ ބޭނުމަށް ސީސީޓީވީ ކެމެރާ ހަރުކުރަން ބަހައްޓާފައި ހުރި ތަކެތި ވެސް ވަނީ ގެއްލިފަ އެވެ.

ސްޓެލްކޯ އަށް އިންޑަސްޓްރިއަލް ވިލެޖުން 21،000 އަކަފޫޓުގެ ބިމެއް ދޫކުރީ އެ ކުންފުނީގެ ބެކަޕް ޕަވާ ހައުސް އަކާއި ބެކަޕް ބެޓަރީ ސްޓޯރެޖެއް ހެދުމުގެ ބޭނުމަށެވެ. އެ ބިން ލެވެލްކޮށް ސާފު ކުރުމަށް ވެސް އެ ކުންފުނިން ފަސް ލައްކަ ރުފިޔާ ހޭދަކުރި އެވެ.

މި ބިމުގައި ބެކަޕް ޕަވާ ހައުސްގެ އިތުރުން ގްރިޑް ޕްރޮޖެކްޓުގެ ދަށުން ތިލަފުއްޓާއި މާލޭގެ ކަރަންޓު އެއް ވިއުގައަކުން ގުޅުވައިލަން ބޭނުންވާ 132 ކިލޮވޮޓުގެ ސަބްސްޓޭޝަނެއް ވެސް ބަހައްޓާނެ އެވެ. މި ސަބްސްޓޭޝަން އަޅަން ނިންމާފައި ވަނީ ތިލަމާލެ ބްރިޖާއެކުގަ އެވެ.