މިއީ ތިމާވެށި ސަލާމަތްކުރަން ފުރުސަތު ލިބޭ އެންމެ ފަހު ޖީލުކަމަށް ވެދާނެ: ރައީސް

މިހާރުގެ ޖީލަކީ މޫސުމަށް އަންނަ ބަދަލުތަކުގެ ގެއްލުންތަކުން ރާއްޖެ ސަލާމަތްކުރުމުގެ ފުރުސަތު ލިބޭ އެންމެ ފަހު ޖީލުކަމަށް ވެދާނެ ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.

ދުނިޔޭގެ ތިމާވެށީގެ ދުވަހުގެ މުނާސަބާގައި މިއަދު ފޮނުއްވި ހިތާބުގައި ރައީސް ވިދާޅުވީ މޫސުމަށް އަންނަ ބަދަލުތަކުގެ ގެއްލުމުން ރާއްޖެ ސަލާމަތްކުރަން ލިބޭ ފަހު ޖީލަށް މި ޖީލު ވެދާނެ ކަމަށް ބެލެވެނީ އެ ބަދަލުތަކުގެ ގެއްލުން ރާއްޖެއަށް ފޯރަމުންދާ ހަލުވި ކަމާ ހެދި ކަމަށެވެ. ރާއްޖޭގެ މާހައުލީ ނިޒާމު ސަލާމަތްކުރަން މިހާރު މި ތިބި ހާލަތުން ވެސް އާ ވިސްނުންތަކަކާ އެކު އަވަސް ފިޔަވަޅުތަކެއް އަޅަން ޖެހޭ ކަަމަށް ވެސް އެ މަނިކުފާނު ވިދާޅުވި އެވެ.

ރާއްޖޭގެ ފަރުތަކާއި ގޮނޑޮދޮށްތައް އަދި ކުޅިތަކާއި ޗަސްބިންތަކާއި ފާތައް ހަލާކުވީ ރައީސް ވިދާޅުވި ގޮތުގައި މީހުންގެ އަތްތަކުން ދިން ގެއްލުތަކުގެ ސަބަބުންނެވެ. ތަބީއީ ގޮތުން އެތަންތަން ކުރިން އޮތް ހާލަތަށް އިއާދަކުރެވޭތޯ ގަދައަޅައި މަަސައްކަތްކުރަން ޖެހޭ ކަމަށް ވެސް ރައީސް ވިދާޅުވި އެވެ. އެ މަނިކުފާނު ވިދާޅުވި ގޮތުގައި ދިރިއުޅުމައިގެން ކުރިއަށް އަޅާ ކޮންމެ ފިޔަވަޅެއް އަޅަން ވާނީ ގުދުރަތީ ނިޒާމަށް އެއްވެސް ގެއްލުމެއް ނުލިބޭނެކަން ކަށަވަރުކޮށްފަ އެވެ.

"...ދުނިޔޭގެ މޫސުމަށް އަންނަ ބަދަލުތަކުގެ ގެއްލުން ރާއްޖެއަށް ފޯރަމުންދާ ނިސްްބަތާއި ފޯރަމުންދާ ހަލުވިމިނަށް ބަލާއިރު އަޅުގަނޑުމެންނަކީ މިދެންނެވި ގެއްލުންތަކުން ރާއްޖެ ސަލާމަތްކުރުމުގެ ފުރުސަތު ލިބޭ އެންމެ ފަހު ޖީލުކަމަށް ވުމަކީ އެކަށީގެންވާ ކަމެކެވެ،" ހިތާބުގައިވެ އެވެ.

ރާއްޖޭގެ ތިމާވެށީގެ މައްސަލަތަކަށް ހައްލު ހޯދުމުގައި އޮތް އެންމެ ބޮޑު ގޮންޖެހުމަކީ ރައީސް ވިދާޅުވި ގޮތުގައި ކުނީގެ މައްސަަލަ އެވެ. އެއް ފަހަރު ބޭނުންކޮށްފައި އުކާލާ ބާވަތުގެ ޕްލާސްޓިކް ބޭނުންކުރާ ވަރު އިތުރުވެފައި ވުމަކީ އެފަދަ މައްސަލަ އެކެވެ. އަނެއް މައްސަލައަަކީ ހަކަތަ އުފައްދަން ޑީސަލް އަންދަން ޖެހުން ކަމަށް ވެސް ވިދާޅުވި އެވެ.

އެ މަނިކުފާނު ވިދާޅުވީ ރާއްޖޭގެ މާހައުލަށް ގެއްލުން ލިބޭ އެފަދަ މައްސަލަތައް ހައްލުކުރަން ސަރުކާރުން ގިނަަ މަސައްކަތްތަކެއް ކުރަމުން އަންނަ ކަމަށެވެ. ރައްކާތެރިގޮތުގައި ކުނި އެއްކޮށް ނައްތައިލުމުގެ ނިޒާމުތައް ރަށު ފެންވަރުގަޔާއި ސަރަހައްދީ ފެންވަރުގައި ގާއިމްކުރުމަކީ އެމަނިކުފާނު ވިދާޅުވި ގޮތުގައި އެފަދަ މަސައްކަތެކެވެ. އެއް ފަަހަރު ބޭނުންކުރާ ޕްލާސްޓިކްގެ ބައެއް ބާވަތްތައް އެތެރެކުރުން މަނާކުރުމާއި ސޯލާ ހަކަތަ ބޭނުންކުރާ ނިޒާމުތައް ގާއިމް ކުުރުމަކީ ވެސް ތިމާވެށި ހިމާތަތްކުރަން ރާއްޖޭން ކުރާ މަސައްކަތްތަކެވެ.