ކޮވިޑްގެ ފިޔަވަޅުތަކާ ގުޅޭ ގޮތުން ގޮތުން ރައީސް ނޫސްވެރިންނާ ބައްދަލުކުރައްވަނީ

ކޮވިޑް-19 ކޮންޓްރޯލްކުރުމަށް ސަރުކާރުން ކުރަމުން އަންނަ މަސައްކަތުގެ އެންމެ ފަހުގެ މައުލޫމާތު ހިއްސާކުރެއްވުމަށް ރައީސް އިބްރާހީމް މުހައްމަދު ސޯލިހު މިއަދު ހަވީރު ނޫސްވެރިންނާ ބައްދަލުކުރައްވަން ނިންމަވައިފި އެވެ.

ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވި ގޮތުގައި މިއަދު ހަވީރު 4:30 ގައި ބާއްވާ އެ ނޫސްވެރިންގެ ބައްދަލުވުމަކީ ކޮވިޑް ކޮންްޓްރޯލްކުރުމަށް ސަރުކާރުން ކުރަމުން އަންނަ މަސައްކަތާއި އެންމެ ފަހުގެ ފިޔަވަޅުތަކުގެ މަައުލޫމާތާ ގުޅޭ ގޮތުން ބާއްވާ ޕްރެސްއެއް ކަމަށެވެ.

ރައީސް އެންމެ ފަހުން، ނޫސްވެރިންނާ ބައްދަލުކުރެއްވީ މިދިޔަ މަހުގެ 25 ވަނަ ދުވަހު އެވެ. އެ ދުވަަހުގެ ނޫސްވެރިންގެ ބައްދަލުވުން ވެސް ހާއްސަކޮށްފައި އޮތީ ރާއްޖޭގެ ކޮވިޑްގެ ހާލަތާ ބެހޭ އެންމެ ފަހުގެ މައުލޫމާތާއި ބަލި ކޮންޓްރޯލްކުރުމަށް ސަރުކާރުން ކުރަން ނިންމި މަސައްކަތްތަކުގެ މައްޗަށެވެ.

ލޯކަލް ކައުންސިލް އިންތިހާބު ނިމުންތަނާހެން މުޅި ރާއްޖޭގެ ކޮވިޑްގެ ހާލަތު ގޯސްވި އެވެ. މާލެއިން ދުވާލަކު ޕޮޒިޓިވްވާ މީހުންގެ އަދަދުތައް 1،000 އިން މައްޗަށް އެރިއިރު ރަށްރަށަށް ވެސް ވަރަށް ބޮޑަށް ބަލި ފެތުރުނެވެ. އެހެންވެ، މިވަގުތު ވެސް ބަލި ފެނިގެން 71 ރަށެއް އޮތީ އަރައި ފޭބުން މަނާކޮށްފަ އެވެ.

މާލެއެކޭ އެއްގޮތަށް ރަށުގެ ހާލަތު ކޮންޓްރޯލްްކުރަން ހަރުކަށި ފިޔަވަޅުތަކެއް އެޅިއިރު އޭގެ ތެރޭގައި މާލޭ ލޮކްޑައުންކުރުމާއި މޮނިޓަރިންގައި އޮތް ރަށްރަށުގައި ކާފިއު ހިންގުން ހިމެނެ އެވެ.

އެކަމަކު މާލެއިންނާއި ރަށްރަށުން ބަލި ފެންނަ މީހުންގެ އަދަދު މިދިޔަ 10 ވަރަކަށް ދުވަހު ވަނީ ދަށްވެފަ އެވެ.