ޓިކްޓޮކާ ވާދަޔަށް ހެދި ޔޫޓިއުބް "ޝޯޓްސް" މިހާރު އެންމެންނަށް ލިބޭނެ

ޓިކްޓޮކާ ވާދަކުރަން ކުރު ވީޑިއޯތަކަށް ހާއްސަކޮށްގެން މީގެ ނުވަ މަސް ކުރިން އެންމެ ފުރަތަމަ އިންޑިއާގައި ތައާރަފުކުރި ޔޫޓިއުބް "ޝޯޓްސް" އެންމެންނަށް ވެސް ބޭނުންކުރެވޭ ގޮތަށް އާންމުކޮށްފި އެވެ.

މިދިޔަ އަހަރުގެ ސެޕްޓެމްބަރު މަހުގެ މެދުތެރޭގައި އިންޑިއާ އަށް ތައާރަފުކުރުމަށް ފަހު، ފަހުން 26 ގައުމަކަށް ލިބޭ ގޮތަށް ހަމަޖެއްސި ހިދުމަތް މިހާރު 100 އަށް ވުރެ ގިނަ ގައުމަށް ލިބޭނެ ކަމަށް ގޫގުލް އިން އަންގާރަ ދުވަހު ބުންޏެވެ.

އެކަމަކު އަދިވެސް ބޮޑު ބައި ބީޓާގައި އޮތް "ޝޯޓްސް" އަކީ ޓިކްޓޮކް ގޮތަށް 15 ސިކުންތެއްހާ ވީޑިއޯ އަޕްލޯޑްކުރެވޭ އަދި ޓިކްޓޮކްގައި ހުންނަ ކަހަލަ ޓޫލްތައް އެކުލެވޭ ޕްލެޓްފޯމެކެވެ. މިދިޔަ އެޕްރީލް މަހު ގޫގުލް އިން ބުނި ގޮތުގައި "ޝޯޓްސް" ބޭނުންކުރާ މީހުންގެ އަދަދު 6.5 ބިލިއަނަށް ވުރެ ގިނަ އެވެ.

ޗައިނާގެ ބައިޓްޑާންސުން ހިންގާ ޓިކްޓޮކުން ދާދި ފަހުން ވަނީ އޭގެ ވީޑިއޯގެ ދިގުމިން މިނިޓަކުން ތިން މިނިޓަށް ދިގުކުރަން ނިންމައިފަ އެވެ. އަދި އެ ޓެސްޓްކުރަމުން އަންނަ އިރު ވަރަށް އަވަހަށް އާންމުކޮށް ދޫކޮށްލާނެ އެވެ.