ކަރަންގެ ދަރުމާގެ ބައޮގްރަފިކަލް ޑްރާމާ އަކްޝޭ އަށް؟

މިދިޔަ މަހުގެ ފަހުކޮޅު ކަރަން ޖޯހަރްގެ ދަރުމާ ޕްރޮޑަކްޝަނުން އިއުލާންކުރި ބައޮގްރަފިކަލް ޑްރާމާ "ދި އަންޓޯލްޑް ސްޓޯރީ އޮފް ސީ ސަންކަރަން ނައިރް" އަކްޝޭ ކުމާރަށް ހުށަހަޅައިވާތީ އެކަމާ ބެހޭ ގޮތުން މިހާރު ދެ ފަރާތުގެ މެދުގައި މަޝްވަރާ ކުރެވެމުން އަންނަ ކަމަށް ރިޕޯޓްތައް ބުނެފި އެވެ.

ބޮލީވުޑް ހަންގާމާ އިން ބުނި ގޮތުގައި އެ ފިލްމަކީ އަކްޝޭ ވަރަށް ބޭނުންވާ ކަހަލަ ކަންތައްތަކެއް ހިމެނޭ ފިލްމަކަށްވާތީ އޭނާ އެއަށް ސޮއިކުރުމުގެ ފުރުސަތު ވަރަށް ބޮޑެވެ. އެކަމަކު މިހާރު ވެސް އަތުގައި ގިނަ ޕްރޮޖެކްޓްތަކެއް ހުރުމުން އެ އެއްޗެހީގެ މަސައްކަތްތަކަށް ދަތިނުވާ ގޮތަށް ދަރުމާގެ މި ފިލްމުގެ މަސައްކަތް ރާވާ ނަމަ އަކްޝޭ ފިލްމަށް އެއްބަސްވާނެ ކަމަށް ހަންގާމާ އިން ބުންޏެވެ.

އޭނާ މީގެ ކުރިން ވެސް ދަރުމާގެ ފިލްމުތަކެއް ކުޅެފައިވެ އެވެ. އޭގެ ތެރެއިން އެންމެ ފަހުގެ ފިލްމަކީ 2019 ގެ "ގުޑް ނިއުސް" އެވެ. ދަރުމާ އަށް އަކްޝޭ ކުޅުނު އިތުރު ފިލްމުތަކުގެ ތެރޭގައި 2019 ގެ "ކޭސަރީ" އާއި 2015 ގެ "ބްރަދާޒް" ހިމެނެ އެވެ.

މިދިޔަ މަހުގެ 28 ވަނަ ދުވަހު ދަރުމާ އިން އިއުލާންކުރި "ދި އަންޓޯލްޓް ސްޓޯރީ އޮފް ސީ ސަންކަރަން ނައިރް" އަކީ އިންޑިއާގައި ކުރިން އޮތް އިނގިރޭސީންގެ ރަސްކަމާ ދެކޮޅަށް ވަކާލާތުކުރި ސަންކަރަންގެ ވާހަކަ ކިޔައިދޭ އެއްޗެކެވެ.

މީގެ ޑައިރެކްޓަރަކީ އަލަށް ޑައިރެކްޝަނަށް ނުކުތް ކަރަން ސިންގް ތިއާގީ އެވެ." ދި އަންޓޯލްޓް ސްޓޯރީ އޮފް ސީ ސަންކަރަން ނައިރް" ހަދަން ނިންމާފައި ވަނީ ސަންކަރަންގެ މުނިކާފަ ދަރިފުޅު ރަގޫ ޕަލަޓާއި އަންހެނުން ޕުޝްޕާ ޕަލަޓް ލިޔެފައިވާ ފޮތް "ދަ ކޭސް ދެޓް ޝުކް ދި އެމްޕަޔާ" އަށް ބިނާކޮށެވެ.

ފިލްމު ޖޫންގައިު އިއުލާންކޮށް ބުނީ ވަރަށް އަވަހަށް ކާސްޓުން އިއުލާންކޮށް ޝޫޓިން ވެސް ވަރަށް އަވަހަށް ފަށާނެ ކަމަށެވެ.

"ދި އަންޓޯލްޓް ސްޓޯރީ އޮފް ސީ ސަންކަރަން ނައިރް" އަކްޝޭ އަށް ހުށަހެޅި އިރު، މި އަހަރުގެ ކުރީކޮޅު ޒުވާން އެކްޓަރު ކާތިކް އާރިޔަން ވަކިކުރި ދަރުމާގެ ރޮމޭންޓިކް ކޮމެޑީ "ދޯސްތާނާ 2" ގެ ރޯލު ވެސް އަކްޝޭ އަށް ހުށަހެޅިކަމުގެ އަޑުތަކެއް އަރާފައިވެ އެވެ.

އަކްޝޭގެ ކުރިއަށް ހުރި ޕްރޮޖެކްޓްތަކުގެ ތެރޭގައި "ބެލް ބޮޓަމް"، "ސޫރިޔަވަންޝީ"، "ޕްރިތުވީރާޖް"، "އަތުރަންގީ ރޭ"، "ބައްޗަން ޕާންޑޭ"، "ރާމް ސެތޫ"، "ރަކްޝާބަންދަން"، "މިޝަން ސިންޑްރެއްލާ" އަދި އެމެޒޯން ޕްރައިމް ވީޑިއޯގެ ވެބް ސީރީޒް "ދި އެންޑް" ހިމެނެ އެވެ.

ރޯހިތު ޝެޓީ ޑައިރެކްޓްކޮށްފައިވާ "ސޫރިޔަންވަންޝީ" އަކީ ވެސް ކަރަން ޕްރޮޑިއުސަރެއްގެ ގޮތުގައި ހިއްސާވާ ފިލްމެކެވެ.