ދައުރުން ބޭރުން ކުއްލި ޖަލްސާއެއް ބާއްވަން ނަޝީދު އެދިވަޑައިގެންފި

ރައްޔިތުންގެ މަޖިލީހުގެ ދައުރުން ބޭރުން މަޖިލީހުގެ ކުއްލި ޖަލްސާއެއް ބާއްވަން ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު އެދިވަޑައިގެންފި އެވެ.

ދައުރުން ބޭރުން ޖަލްސާއެއް ބާއްވަން އެ މަނިކުފާނު އެދިވަޑައިގަތީ މަޖިލީހުގެ މެމްބަރުން ތިއްބަވާ ވަޓްސް އެޕް ގްރޫޕަށް އެ މަނިކުފާނު ފޮނުއްވި މެސެޖެއްގަ އެވެ. އެފަދަ މެސެޖެއް ނަޝީދު ފޮނުއްވިކަން މަޖިލީހުގެ މެމްބަރަކު ކަށަވަރުކޮށް ދެއްވި އެވެ.

އެ މެމްބަރު ވިދާޅުވި ގޮތުގައި، މިހާރު އިނގިރޭސި ވިލާތުގައި ހުންނެވި ނަޝީދު އެގޮތަށް އެދިވަޑައިގަތީ އެ މަނިކުފާނު އަވަހާރަކޮށްލަން މިދިޔަ މެއި މަހު ދިން ޓެރަރިސްޓް ހަމަލާއާ ގުޅިގެން ފުލުހުން ރޭ ބޭއްވި ނޫސްވެރިންގެ ބައްދަލުވުމުގައި ހާމަކުރި ކަންކަމާ ގުޅިގެންނެވެ.

ފުލުހުން ރޭ ހާމަކުރި މައުލޫމާތުތަކާ ގުޅިގެން ކުއްލި ނުރައްކަލުގެ ހާލަތު އިއުލާން ކުރަން ނަޝީދު މިއަދު ވަނީ ރައީސް އިބްރާހިމް މުހައްމަދު ސޯލިހަށް ވެސް ގޮވާލައްވައިފަ އެވެ.

ރައްޔިތުންގެ މަޖިލިސް މިހާރު ޗުއްޓީގައި އޮޔް އިރު، މަޖިލިހުގެ ގަވާއިދު ބުނާގޮތުން ދައުރުން ބޭރުން ކުއްލި ޖަލްސާއެއް ބޭއްވޭނީ ވަކި އަދަދެއްގެ މެމްބަރުން ސޮއިުރައްވައި ހުށަހެޅުއްވުމުންނެވެ.