ޓައިގާގެ ކޮއްކޮ ކްރިޝްނާ ފިލްމެއް ނުކުޅޭނެ

އެކްޓަރު ޓައިގާ ޝްރޮފްގެ ކޮއްކޮ ކްރިޝްނާ ޝްރޮފަކީ އިންސްޓަގްރާމްގައި ވަރަށް މަޝްހޫރު މީހެކެވެ. އާންމުންގެ ތެރޭގައި އޭނާ ބޮޑަށް ފާހަގަކުރެވެނީ ފިޓްނެސް ފްރީކެއްގެ ގޮތުގަ އެވެ. ފިޓްނެސްއާ އެކު ހަށިގަނޑު ރީތި ބައްޓަމެއްގައި ބަހައްޓަން މަސައްކަތްކޮށް، ހަށިގަނޑު އިންސްޓްގްރާމްގައި ދެއްކުމަކީ ކްރިޝްނާގެ އާންމު ކަމެކެވެ.

އެކަމަކު ބައްޕަ ޖެކީ ޝްރޮފާއި ބޭބެ ޓައިގާއާ އެއްގޮތަށް ފިލްމު ކުޅުމުގެ އެއްވެސް ވިސްނުމެއް އޭނާގެ ނެތެވެ. މީޑިއާއަކަށް ދިން އިންޓަވިއުއެއްގައި 28 އަހަރުގެ ކްރިޝްނާ ބުނީ ވަރަށް އޭނާ އަށް ފިލްމުތަކުން ވަރަށް ގިނަ ހުށަހެޅުންތައް އަބަދު ވެސް ލިބެމުން އަންނަ ކަމަށެވެ.

"އެކަމަކު އަހަރެން ބޭނުމެއް ނޫން ފިލްމު ކުޅޭކަށް. އަހަންނަކީ ފިޓްނެސްގެ މީހެއް. އެ ދާއިރާ އަށް ހުރިހާ ފޯކަސްއެއް، ޝައުގެއް އޮތީ." ކްރިޝްނާ ބުންޏެވެ.

އޭނާ ބުނި ގޮތުގައި ފިލްމު ކުޅެދޭން އެދި ތަކުރާރުކޮށް އެތައް ބަޔަކު އޭނާ އަށް ހުށަހެޅުންތައް ދިން ނަމަވެސް އެކްޓްކުރުމަކީ އެއް އިރެއްގައި ވެސް މާ ކުރާ ހިތްވާ ކަމެއް ނޫނެވެ. އެހެންވެ ދުވަހަކު ވެސް ފިލްމެއް ނުކުޅޭނެ ކަމަށް ބުންޏެވެ.

ކްރިޝްނާގެ އެއްވެސް ޝައުގެއް އެކްޓިން އަށް ނެތަސް ބޭބެ ޓައިގާ، 30، އަކީ 2014 ގައި ބޮލީވުޑަށް ނުކުމެ ކުޑަ ދުވަސްކޮޅެއްގެ ތެރޭގައި ބޮޑު ކުރިއެރުމެއް ހޯދި އެކްޓަރެކެވެ. އޭނާ އަކީ މިހާރު ބޮލީވުޑްގެ އެންމެ ވަރުގަދަ އެއް އެކްޝަން ހީރޯ އެވެ. އަދި ނެށުމުގެ ހުނަރާއި ކަސްރަތީ ވަރުގަދަ ހަށިގަނޑަކީ ވެސް ޓައިގާގެ ހާއްސަ ސިފަތަކެވެ.