"ހަތުރޯން ކޭ ކިލާޅީ 11" ކާމިޔާބުކުރީ އަރުޖުން

މިދޔަ ޖުލައި މަހުގެ ތެރޭގައި ކަލާޒް ޗެނެލުން ދައްކަން ފެށި ސްޓަންޓް ޝޯ "ހަތުރޯން ކޭ ކިލާޅީ" 11 ވަނަ ސީޒަން ޓީވީ އެކްޓަރު އަރުޖުން ބިޖިލާނީ ކާމިޔާބުކޮށްގެން އާދީއްތަ ދުވަހުގެ ރޭ ނިންމާލައިފި އެވެ.

ކުލަ ގަދަ ޝޯއަކާ އެކު ގެނެސްދިން ފިނާލޭ އެޕިސޯޑާ އެކު އަރުޖުން ޝޯގެ ޓްރޮފީ އުފުލައިލީ އިނާމަކަށް 20 ލައްކަ ރުޕީސްގެ އިތުރުން ޒަމާނީ ކާރަކާ ވެސް އެކީގަ އެވެ. "ހަތުރޯން ކޭ ކިލާޅީ 11" ކާމިޔާބުކުރި އަރުޖުން އަކީ އިންޑިއާގެ ޓީވީ އިންޑަސްޓްރީގެ އެންމެ މަގުބޫލު އެއް މޫނެވެ. އޭނާ ކުޅެފައިވާ ސިލްސިލާތަކުގެ ތެރޭގައި "އިޝްގް މޭ މަރުޖާވާ" އާއި "ނާގިން" ހިމެނެ އެވެ.

ރިޕޯޓްތައް ބުނާ ގޮތުން އަންނަ މަހުގެ 2 ގައި ފަށާ ކަލާޒްގެ "ބިގް ބޮސް 15" ގައި އަރުޖުން، 38، ވާދަކުރާނެ އެވެ. އެކަމަކު އެކަން އަދި ކަށަވަރެއް ނޫނެވެ.

އޭނާ "ހަތުރޯން ކޭ ކިލާޅީ 11" ކާމިޔާބުކުރި އިރު، ޝޯގެ ރަނަރަޕް އަކީ ޝޯގައި ވަރުގަދަކަން ދެއްކި ޓީވީ ބަތަލާ ދިވްޔަންކާ ތުރިޕަޓީ، 36، އެވެ. އޭނާ އަކީ "ޔޭ ހޭ މޮހައްބަތޭން" އާއި "ބަނޫ މޭ ތޭރީ ދުލްހަން" ފަދަ ސިލްސިލާތަކުގެ ބަތަލާ އެވެ.

ބޮލީވުޑްގެ ޑައިރެކްޓަރު ރޯހިތު ޝެޓީ ހޯސްޓްކުރި "ހަތުރޯން ކޭ ކިލާޅީ 11" ގެ ވަނަ ސީޒަން ގެނެސްދިނީ ދެކުނު އެފްރިކާގެ ކޭޕް ޓައުން އިންނެވެ. މި ސީޒަންގައި ވާދަކުރި އިތުރު ސެލެބްރިޓީންނަކީ "ބިގް ބޮސް 14" ގައި ވާދަކޮށް ދެވަނަ އަށް ދިޔަ ލަވަކިޔުންތެރިޔާ ރާހުލް ވައިދިއާ އާއި ތިން ވަނަ އަށް ދިޔަ ބަތަލާ ނިކީ ތަމްބޯލީ އާއި އެ ސީޒަން ބަތަލާ ރުބީނާ ދިލައިކް ކާމިޔާބުކުރި އިރު ޝޯގައި ވާދަކުރި ފިރިމީހާ އެކްޓަރު އަބިނާވް ޝުކްލާ އާއި "ބިގް ބޮސް 13" ގައި ވާދަކުރި ވިޝާލް އަދިތިޔާ ސިންގް އާއި މަޝްހޫރު ޓީވީ ތަރިން ކަމަށްވާ ޝްވޭތާ ތިވާރީ (ޕްރޭނާ) އާއި ޓީވީ އެކްޓަރު ސޯރަބް ޖެއިން އާއި ޓީވީ ބަތަލާ އަނުޝްކާ ސެން އާއި ލަވަކިޔުންތެރިޔާ އާސްތާ ގިލް އާއި "ބިގް ބޮސް 5" ގެ ދެވަނަ އަށް ދިޔަ ބަތަލާ މަހެކް ޗާހަލް އާއި އެމްޓީވީގެ "ރޯޑީޒް" އިން ވިދައިލި ވަރުން ސޫދާއި ބަތަލާ ސަނާ މަކްބޫލެވެ.

ކަލާޒް އިން އާދީއްތަ ދުވަހުގެ ޝޯ ނިންމައިލި އިރު އެ ދައްކަން ފެށީ ޖުލައި މަހުގެ 17 ގަ އެވެ.