ނަޝީދުގެ ވެރިކަން ވައްޓައިލީ އިދިކޮޅުން ޑްރަގުގެ ބޮޑުންނާ ގުޅިގެން: އިލްޔާސް ލަބީބް

ކުރީގެ ރައީސް އަދި މިހާރުގެ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ވެރިކަން ވައްޓައިލީ އިދިކޮޅު ފަރާތްތަކުން "ޑްރަގުގެ ބޮޑުންނާ" ގުޅިގެން ކަމަށް މަޖިލީހުގެ ހުޅުދޫ ދާއިރާގެ އެމްޑީޕީގެ އިލްޔާސް ލަބީބު މިއަދު ތުހުމަތުކުރައްވައިފި އެވެ.

މަސްތުވާތަކެތީގެ ވިޔަފާރިކުރާ މީހުން ޝަރުއީ މަރުހަލާގެ ތެރެއިން ދޫވާތީ، މަޑުއްވަރީ ދާއިރާގެ ޕީއެންސީގެ މެމްބަރު އާދަމް ޝަރީފު، ރައްޔިތުންގެ މަޖިލީހުގެ މިއަދުގެ ޖަލްސާ އަށް ހުށަހެޅުއްވި ކުއްލި މައްސަލައަށް ބަހުސް ކުރައްވަމުން އިލްޔާސް ވިދާޅުވީ، ނަޝީދު ވެރިކަމަށް ވަޑައިގެން، މަސްތުވާތަކެއްޗަށް ހުޅުވިފައި ހުރި ދޮރުތައް ބަންދުކުރުމުގެ މަސައްކަތް ވަރަށް ފުޅާ ދާއިރާއެއްގައި ކުރައްވަމުން ގެންދެވި ކަމަށެވެ.

މަސްތުވާތަކެތި އެތެރެކުރާ މީހުން އެކަން ކުރުން ހުއްޓުވުމާއި އޭގެ މާކެޓް ނުވަތަ މަސްތުވާތަކެތި ބޭނުންކުރާ މީހުން ރިހެބިލިޓޭޓުކޮށް އަލުން އަނބުރާ މުޖުތަމައަށް ނެރުމުގެ މަސައްކަތް ވެސް އެ މަނިކުފާނު ކުރެއްވި ކަމަށް އިލްޔާސް ވިދާޅުވި އެވެ.

އޭނާ ވިދާޅުވިގޮތުގައި، ރާއްޖޭގެ އެކި ސަރަހައްދުތަކުައި ރިހިބިލިޓޭޝަން ސެންޓަރުތަކާއި ޑިޓޮކްސް ސެންޓަރުތައް ނަޝީދު ހެއްދެވި އެވެ.

"ވެރިކަން ބަގާވާތަކުން ވައްޓާލުމަށް ފަހު ވަހީދާއި ޔާމީނާ ދެ ބޭފުޅުން ވެގެން ޑިޓޮކްސް ސެންޓަރު ބަންދުކޮށްލީ. ރިހިބިލިޓޭޝަން ސެންޓަރުތައް ބަންދުކޮށްލީ. އެއީ ބަގާވާތަށް ފަހު ވެރިކަން ވައްޓާލުމަށް ފަހު ކުރި ކަންތައް،" އިލްޔާސް ވިދާޅުވި އެވެ.

މަސްތުވާތަކެތީގައި ހިމެނޭ މީހުން ޝަރުއީ ދާއިރާގެ ތެރެއިން ދޫވާ މައްސަލަ އަށް ގާނޫނީ ހައްލު ގެނެސް، ޑްރަގު ކޯޓުގެ ނަމުގައި ވަކި ކޯޓެއް އުފައްދައި ފަނޑިޔާރުން ތަމްރީނު ކުރީ ވެސް ނަޝީދުގެ ވެރިކަމުގައިކަން އިލްޔާސް ފާހަގަކުރެއްވި އެވެ.

"މި ކަންތައްތައް އެއިރު ޕީޕީއެމް އާއި މިހާރުގެ ޕީޕީއެމްއާ ޕީއެންސީގެ ބޭފުޅުންނަށް ހަޖަމެއް ނުވި. އެއީ އެ މީހުންނާ ގުޅުން ހުރި ފަރާތްތަކުން މި ކަންކަން ކުރެެއްވީ،" އިލްޔާސް ވިދާޅުވި އެވެ.

މަސްތުވާތަކެތި އެތެރެކުރާ މީހުންގެ ތެރެއިން އެކަމުގެ ބޮޑުންގެ ގޮތުގައި ބެލެވުނު ހަ މީހަކު ހައްޔަރުކޮށް މައްސަލަ ބަލަން ފެށިކަން ވެސް އިލްޔާސް ފާހަގަކުރެއްވި އެވެ.

އޭނާ ވިދާޅުވީ، ނަޝީދުގެ ވެރިކަން ވައްޓައިލުމަށް ފަހު، ކުރީގެ ރައީސް އަބްދުﷲ ޔާމީންގެ ވެރިކަމުގައި އޭރު ޑްރަގު ނެޓުވޯކުގައި ހަރަކާތްތެރިވި މީހުންނަށް ބަދަލުދީ، ސިޔާސީ މަގާމުތައް ވެސް ދީފައިވާ ކަމަށެވެ.

ނަޝީދުގެ ވެރިކަން ވެއްޓުނީ ފެބްރުއަރީ 7، 2012 ގައި ނަޝީދުގެ ވެރިކަމާ ދެކޮޅަށް ސިފައިންނާއި ފުލުހުން ނުކުމެ ހިންގި ހަމަނުޖެހުންތަކަށް ފަހުގަ އެވެ. މި ހަމަނުޖެހުން އުފެދުނީ ކްރިމިނަލް ކޯޓުގެ އޭރުގެ އިސް ގާޒީ އަބްދުﷲ މުހައްމަދު ގާނޫނާ ޚިލާފަށް ބަންދުކުރުމާ ގުޅިގެން އިދިކޮޅު ފަރާތްތަކުން ސިލްސިލާކޮށް ކުރި މުޒާހަރާތަކަށް ފަހުގަ އެވެ.