އަމިއްލަ ރޮކެޓާއެކު ދެކުނު ކޮރެއާ ޖައްވީ ރޭހުގެ ތެރެއަށް

އަމިއްލަ އަށް އުފެއްދި ޖައްވީ ރޮކެޓުގެ ކާމިޔާބުކަމާއެކު ޖައްވަށް އުދުއްސާލައި، ދެކުނު ކޮރެއާ ބައިނަލްއަގުވާމީ ޖައްވީ ރޭހުގެ ތެރެއަށް މިއަދު ވަދެއްޖެ އެވެ.

ދެކުނު ކޮރެއާ ގަޑިން މިއަދު 17:00 (ރާއްޖޭ ގަޑިން 13:00) ގައި، އަޖުމަބެލުމުގެ ގޮތުން ޖައްވަށް އުދުއްސައިލި ރޮކެޓްގައި ޖައްވަށް ގެންދިޔައީ، 1.5 ޓަނުގެ ބަރުދަން ހުންނަ ސެޓެލައިޓެއްގެ ނަމޫނާއެކެވެ. ސެޓެލައިޓްގެ ނަމޫނާއާ އެކު ރޮކެޓް ޖައްވަށް އުދުއްސައިލީ ވެރިރަށް ސޯލްގެ ދެކުނުން 311 މޭލު ދުރުގައި އޮންނަ ނާރޯ ޖައްވީ މަރުކަޒުންނެވެ.

ކޮރެއާ ބަހުން ނޫރީގެ ނަން (ދުނިޔެ) ދީފައިވާ މި ރޮކެޓް ޖައްވަށް ދަތުރުކޮށް، އޭގައި ގެންދާ ސެޓެލައިޓްގެ ނަމޫނާ ޖައްވުގައި ބަހައްޓާނީ، ބިމުން ފެށިގެން 600-800 ކިލޯމީޓަރު އުހުގެ އޯބިޓެއްގަ އެވެ. ދެކުނު ކޮރެއާ އިން މި ރޮކެޓް ތަރައްގީކުރީ 1.6 ބިލިއަން ޑޮލަރު ހޭދަކޮށް 10 އަހަރުގެ މަސައްކަތުންނެވެ.

ދެކުނު ކޮރެއާއަކީ މިހާރު ދުނިޔޭގެ 12 ވަނަ އަށް އެންމެ ބޮޑު އިގްތިސާދެވެ. އަދި ޒަމާނީ ޓެކްނޮލޮޖީގެ ދާއިރާއިން އެންމެ ކުރިއަރާފައިވާ އެއް ގައުމެވެ. ނަމަވެސް ޖައްވީ ރޭހުގައި މިހާތަނަށް މާ ބޮޑު ކުރިއެރުމެއް ނުހޯދެ އެވެ.

ޖައްވަށް އެންމެ ފުރަތަމަ ސެޓެލައިޓެއް ފޮނުވީ ކުރީގެ ސޯވިއެޓް ޔޫނިއަނުން 1957 ވަނަ އަހަރުގެ ތެރޭގަ އެވެ. އޭގެ ފަހުން ދެ ވަނަ އަށް ޖައްވަށް ސެޓެލައިޓެއް ފޮނުވީ، މާ ގިނަ ދުވަސްތަކެއް ނުވެ އެމެރިކާ އިންނެވެ.

އޭގެ އިތުރުން ޗައިނާ އާއި ޖަޕާނާއި އިންޑިއާ އިން ވެސް މިހާރު ގެންދަނީ ޖައްވީ ޕްރޮގްރާމްތަކެއް ހިންގަމުންނެވެ. އަވައްޓެރި އުތުރު ކޮރެއާ އިން ވެސް ވަނީ، 2012 ވަނަ އަހަރު، 300 ކިލޯގެ ސެޓެލައިޓެއް ޖައްވަށް ފޮނުވައިފަ އެވެ.

ދެކުނު ކޮރެއާގެ ސައެންސާއި ޓެކްނޮލޮޖީއާ ބެހޭ މިނިސްޓްރީން ބުނި ގޮތުގައި 200 ޓަނުގެ ރޮކެޓް އޭތި އުދުއްސައިލާ ހަރަށް ގެންދިޔައީ، އިއްޔެ އެވެ. އަދި ޖައްވަށް އުދުއްސައިލުމުގެ ކުރިން ސަލާމަތީ ގޮތުން ބަލަންޖެހޭ ހުރިހާ ކަމެއް ވަނީ ބަލައި ނިމިފަ އެވެ.

ދެކުނު ކޮރެއާގެ ޖައްވީ ޕްރޮގްރާމްގައި ކުރިއަށް ރޭވިފައި ހުރި ކަންތަކުގެ ތެރޭގައި، ޖާސޫސީ ސެޓެލައިޓަކާއި ނިޔަމިކަމުގެ ސެޓެލައިޓެއްގެ އިތުރުން އަސްކަރީ ސެޓެލައިޓްތަކެއް ޖައްވަށް ފޮނުވުން ހިމެނެ އެވެ. މީގެ އިތުރުން 2030 ވަނަ އަހަރުގެ ތެރޭގައި ހަނދަށް ޖައްވީ އުޅަނދެއް ފޮނުވުން ވެސް ހިމެނެ އެވެ.

މީގެ ކުރިން 2009 ވަނަ އަހަރާއި 2010 ވަނަ އަހަރު ވެސް، ޖައްވަށް ރޮކެޓެއް ފޮނުވަން ދެކުނު ކޮރެއާ އިން މަސައްކަތް ކުރި އެވެ. ނަމަވެސް ރަޝިޔާގެ ޓެކްނޮލޮޖީ ބޭނުންކޮށްގެން އުފެއްދި ދެ ރޮކެޓް ވެސް ނާކާމިޔާބުވީ އެވެ. ދެ ވަނަ ރޮކެޓް ވައިގެ ތެރެއަށް ގޮވީ އުދުއްސައިލިތާ ދެ މިނެޓް ފަހުންނެވެ.

ކާމިޔާބުކަމާއެކު ޖައްވަށް ރޮކެޓެއް ފޮނުވުނީ، 2013 ވަނަ އަހަރު ރަޝިޔާއާ ގުޅިގެން ކުރި މަސައްކަތުންނެވެ. މިއަދު ޖައްވަށް ފޮނުވި ރޮކެޓަކީ ދެކުނު ކޮރެއާގެ އަމިއްލަ ޓެކްނޮލޮޖީ ބޭނުންކޮށް، އަމިއްލައަށް އުފައްދައިގެން ކާމިޔާބުކަމާ އެކުގައި ޖައްވަށް ފޮނުވި ފުރަތަމަ ރޮކެޓެވެ.