އިދިކޮޅުން އުޅެނީ އައްޑޫގެ ޕްރޮޖެކްޓްތައް ހުއްޓުވަން: ނިހާދު

ޕީޕީއެމް/ޕީއެންސީން މިހާރު މަސައްކަތް ކުރަނީ އިންޑިއާ އިން އައްޑޫގައި ކުރިއަށް ގެންދާ މަޝްރޫއުތައް ހުއްޓުވަން ކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެ އެވެ.

ރާއްޖޭގައި ތިބި އިންޑިއާ ސިފައިން ބޭރުކުރުމަށް ގޮވާލައި އިދިކޮޅުން ކުރިއަށް ގެންދާ "އިންޑިއާ އައުޓް" ކެމްޕޭނުގެ ތެރެއިން ނިހާދު ތަމްސީލު ކުރައްވާ ދާއިރާގައި އިއްޔެ ހަވީރު ބޭއްވި އެއްވުމަށް އިޝާރާތް ކުރައްވައި އޭނާ ރޭ ވިދާޅުވީ "އިދިކޮޅުން މަސައްކަތް ކުރަނީ ޕްރޮޖެކްޓްތައް ހުއްޓުވަން" ކަމަށާއި "އެއީ ވަރަށް ދެރަ ކަމެއް" ކަމަށެވެ.

"ދަންނަވަން އޮތީ އެއްވެސް ޕްރޮޖެކްޓެއް ހުއްޓުމެއް ނެތި ކުރިއަށް ދާނެ ވާހަކަ. އެއްވެސް އުނދަގުލެއްވާ ނަމަ އެ ވެރިން [އިދިކޮޅު ކޯލިޝަންގެ މީހުން] ހުއްޓުވައިގެން ވިޔަސް ޕްރޮޖެކްޓްތައް ކުރިއަށް ގެންދެވޭނެ." އެމްޑީޕީގެ މެމްބަރު ނިހާދުގެ ޓްވީޓުގައި ވިދާޅުވި އެވެ.

އައްޑު އަކީ އިންޑިއާގެ އެހީގައި ކުރިއަށް ގެންދާ ޕްރޮޖެކްޓްތައް މި ވަގުތު އެންމެ ގިނަ ސިޓީ އެވެ. އޭގެ ތެރޭގައި ރާއްޖޭގައި އެ ގައުމުން ކުރިއަށް ގެންދަން ނިންމާފައިވާ ޕްރޮޖެކްޓްތަކުގެ ތެރެއިން ދެވަނަ އަަށް އެންމެ ބޮޑު މަޝްރޫއު ވެސް ހިމެނެ އެވެ. އެއީ މިހާރު ގާތްގަނޑަކަށް ނިމުމަކަށް އައިސްފައިވާ ނެޝަނަލް ކޮލެޖް އޮފް ޕޮލިސިން އެންޑް ލޯ އެންފޯސްމަންޓް (ޕޮލިސް އެކެޑެމީ) އެވެ. މި ތަނަކީ އިންޑިއާ ސަރުކާރުގެ 18 މިލިއަން ޑޮލަރުގެ ހިލޭގެ އެހީ ޕްރޮޖެކްޓެވެ.

އިންޑިއާ އިން އައްޑޫގައި ކުރިއަށް ގެންދާ އިތުރު ޕްރޮޖެކްޓްތަކުގެ ތެރޭގައި ރަނގަޅު ފެންވަރަކަށް މަގުތައް ހެދުމާއި ގޭދޮށު މަސް ފެކްޓަރީ އާއި އައްޑޫގެ އިކޯ ޓޫރިޒަމް މަޝްރޫއަށް އެހީ ދިނުން ފަދަ ކަންކަން ހިމެނެ އެވެ. އަދި ރާއްޖެ އަށް އިންޑިއާ އިން ދޫކޮށްފައިވާ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުން ގަން އެއާޕޯޓް ތަރައްގީ ކުރެ އެވެ. އެ އެހީގެ ދަށުން އެއާޕޯޓް ތަރައްގީ އަށް 17 މިލިއަން ޑޮލަރު ކަނޑައަޅާފައިވެ އެވެ.