ޑްރަގާ އެކު ވެލާނާ އެއާޕޯޓުން މީހަކު ހައްޔަރުކޮށްފި

މަސްތުވާތަކެތި ކަމަށް ބެލެވޭ އެއްޗެހިތަކެއް ގެންގުޅުނު މީހަކު މިއަދު ހަވީރު ވެލާނާ އިންޓަނޭޝަނަލް އެއާޕޯޓުން ހައްޔަރުކޮށްފި އެވެ.

ޑޮމެސްޓިކް ޓާމިނަލުން ފުރަން ދިޔަ އެ މީހާ ހައްޔަރުކުރާ މަންޒަރު ފެންނަ މަންޒަރު ވީޑިއޯ ވެސް ސޯޝަލް މީޑިއާގައި އާންމުވެފައިވެ އެވެ. އެއިން ފެންނަ ގޮތުގައި އެ މީހާ ހައްޔަރުކުރި އިރު އޭނާ ގެންގުޅުނު ޕެކެޓްތަކުންް ފޭބި މަސްތުވާތަކެތީގެ ހިކި ބާވަތެއް ބިން މައްޗަށް ވެއްޓި ސަރަހައްދަށް ފެތުރިފައިވެ އެވެ.

އެ މީހާ ހައްޔަރުކޮށް، ބިޑި އަޅުވައިގެން ގެންދިޔައީ އެއާޕޯޓްގައި ހުންނަ "ދޮވެމި" ފިހާރަ ސަރަހައްދުންނެވެ.

ފުލުހުންނަށް ލިބުނު މައުލޫމާތަކާ ގުޅިގެން، ފުލުހުން އެ ސަރަހައްދަށް ދިޔައިރު އެމީހާ ފިލަން މަސައްކަތްކުރި ކަމަށް ފުލުހުން ބުންޏެވެ.

އެނގިފައިވާ ގޮތުގައި އެއާޕޯޓްގެ ފާހާނާތަކަކުން ވެސް ހޮނިހިރު ދުވަހާއި އިއްޔެ ވެސް ގިނަ އަދަދެއްގެ މަސްތުވާތަކެތި ފެނުނު މައްސަލައެއް ފުލުހުން އަންނަނީ ތަހުގީގުކުރަމުންނެވެ. އެއާޕޯޓުގެ ޑިޕާޗާ ޓާމިނަލްގެ ފާހާނާގެ ފްލަޝް ޓޭންކުގައި ހުރި މަސްތުވާތަކެތި ފެނިފައި ވަނީ އެއާޕޯޓުގެ ފާހާނާ ސާފުކުރާ މަސައްކަތު މީހަކަށް ކަމަށްވެ އެވެ.