އެމްއޭސީއެލްގެ 384 ފްލެޓް މުވައްޒަފުންނާ ހަވާލުކޮށްފި

ހުޅުމާލޭ ދެވަނަ ފިޔަވަހީގައި އެމްއޭސީއެލުން އިމާރާތްކުރި ފްލެޓްތައް ނިންމައި މުވައްޒަފުންނާ މިއަދު ހަވާލުކޮށްފި އެވެ.

ވެލާނާ އިންޓަނޭޝަނަލް އެއާޕޯޓް ހިންގާ ކުންފުނި، އެމްއޭސީއެލުން އިމާރާތްކޮށްފައި ވަނީ 14 ބުރީގެ ދެ ޓަވަރުގައި 384 އެޕާޓްމަންޓެވެ. އެއީ ދެ ކޮޓަރީގެ 240 އެޕާޓްމަންޓާއި އެއް ކޮޓަރީގެ 72 އެޕާޓްމަންޓެވެ.

ފްލެޓްގެ މަސައްކަތް އެއްކޮށް ނިންމައި އެތަންތަނުގެ ތަޅުދަނޑި ހަވާލުކޮށްފައި ވަނީ ދެ ޓަވަރުގެ މެދުގައި އެކަމަށް ހާއްސަކޮށް މިއަދު ހެނދުނު ބޭއްވި ރަސްމިއްޔާތެއްގަ އެވެ.

އެ ރަސްމިއްޔާތުގައި އެ ކުންފުނީގެ މެނޭޖިން ޑިރެކްޓަރު އަދި ސީއީއޯ، މަހްޖޫބް ޝުޖާއު ވިދާޅުވީ ގާތްގަނޑަކަށް 56 އަހަރުވެފައިވާ އެ ކުންފުންޏަކީ ސަރުކާރު ކުންފުނިތަކުގެ ތެރެއިން އެންމެ ރަނގަޅަށް މަސައްކަތްކުރާ އެއް ކުންފުންޏަށްވާނެ ކަމަށެވެ.

"މިތަނުގައި މުވައްޒަފުން މަސައްކަތްކުރަމުން ދަނީ ވަރަށް ބުރަކޮށް، ވަރަށް ހީވާގިކޮށް. އެއާޕޯޓް މެނޭޖްކުރަމުން މި ގެންދަނީ މުވައްޒަފުންގެ މިންނެތް މަސައްކަތުން،" އޭނާ ވިދާޅުވި އެވެ.

އޭނާ ވިދާޅުވީ އެ ކުންފުނީގެ މުވައްޒަފުންނަކީ ރާއްޖޭގައި ދިމާވާ އެކި ކާރިސާތަކާ ގުޅިގެން ވެސް ވަރަށް ބުރަކޮށް މަސައްކަތްކުރަމުން އަންނަ ބައެއް ކަމަށެވެ. އޭގެ ތެރޭގައި އެމްއެންޑީއެފްއާ ގުޅިގެން އަލިފާނުގެ ހާދިސާތަކުގައި އެ ކުންފުނީގެ މުވައްޒަފުން ކުރަމުން އަންނަ މަސައްކަތްތައް އޭނާ ފާހަގަކުރެއްވި އެވެ.

މަހްޖޫބް ވިދާޅުވި ގޮތުގައި ކުންފުނީގެ މުވައްޒަފުން ކުރަމުންދާ ބުރަ މަަސައްކަތްތައް ފާހަގަކުރުމުގެ ގޮތުން އެކި ކަހަލަ އިނާޔަތްތައް ފޯރުކޮށްދޭން ޖެހޭ ކަމަށް ގަބޫލުކުރައްވަ އެވެ. އަދި ހަތަރު ވަރަކަށް އަހަރުކުރިން ފްލެޓް އެޅުމުގެ މަސައްކަތް ފެށީ ވެސް އެ ވިސްނުމުގެ ދަށުން ކަމަށް އޭނާ ވިދާޅުވި އެވެ.

"މި ހުރިހާ ކަމަކަށް ބަލާ އަޅުގަނޑުމެން ކުންފުންޏެއްގެ ގޮތަށް ވިސްނައިފި ނަމަ އަޅުގަނޑުމެން އެބަ ޖެހޭ ކުންފުނީގެ މުވައްޒަފުންނަށް އެކި ކަހަލަ އިނާޔަތްތައް ފޯރުކޮށްދޭން. މިގޮތުން މީގެ ދެތިން ހަތަރު އަހަރުކުރިން ސަރުކާރާ އެކު ކުރި މަސައްކަތުން ނިންމި ކަމެއް މިއީ ފްލެޓްތައް އެޅުން،" އޭނާ ވިދާޅުވި އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގެ ދުވަސްވަރު، ކުންފުނިތަކަށް ހުޅުވާލި ބޯހިޔާވަހިކަމުގެ މަޝްރޫއުގެ ދަށުން އެ ކުންފުނިން ވެސް ފްލެޓް އެޅުމުގެ މަސައްކަތް ފެށިއިރު މި ސަރުކާރުން ފްލެޓްތަކުގެ ހުވަފެން ހަގީގަތަކަށް ހަދައިދިނުމުން މުވައްޒަފުން ވަނީ އެކަމާ އުފާ ފާޅުކޮށްފަ އެވެ. ބޮޑު ކުލީގައި އުޅެމުން އައި ދުވަސްތައް މާޒީވެ، އަމިއްލަ ބޯހިޔާވަހިކަމެއް ލިބުމުގެ އުފާ ފާޅުކުރި އެވެ.

ޗައިނާގެ ބީޔޫސީޖީ ކުންފުންޏާ ހަވާލުކޮށްގެން އިމާރާތްކުރި އެ ފްލެޓްތަކަށް ފައިސާ ދެއްކުމުގެ މުއްދަތު ވަނީ 15 އަހަރުން 20 އަހަރަށް ބަދަލުކޮށްދީފަ އެވެ. ފްލެޓް ފައިސާ އާއި ޑައުންޕޭމަންޓް ދެއްކުމުގައި ވެސް ލުއި ގޮތްތަކެއް ހޯދައިދީފައިވާ ކަމަށް އެ ކުންފުނިން ބުނެ އެވެ.