އެފްއޭއެމަށް ކަރަންޓު ދެވޭނީ ބިލު އެއްކޮށް ދެއްކުމުން: ޝަރީފް

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ކަރަންޓުގެ ހިދުމަތް އަލުން ދެވޭނީ އެ އެސޯސިއޭޝަނުން ދައްކަން ޖެހޭ 6.5 މިލިއަން ރުފިޔާ ދައްކާ ހަލާސް ކުރުމުން ކަމަށް ސްޓެލްކޯގެ މެނޭޖިން ޑިރެކްޓަރު އަހްމަދު ޝަރީފް ވިދާޅުވެއްޖެ އެވެ.

އެފްއޭއެމް ހިންގާ އޮފީސް އިމާރާތުން އިއްޔެ ކަރަންޓު ކަނޑާލީ ސްޓެލްކޯ އިން ބުނި ގޮތުގައި އެ އެސޯސިއޭޝަނުން އެ ކުންފުންޏަށް ދައްކަންޖެހޭ ފައިސާ ދެއްކުމަށް އެކި ފަހަރު މަތިން އަންގައި، ގިނަ ފުރުސަތުތަކެއް ދިނުމުން ވެސް އެކަން ކޮށްފައި ނުވާތީ ކަމަށެވެ. އެ ފައިސާ ނުދައްކާ ނަމަ، އެފްއޭއެމްގެ އެހެން އިމާރާތްތަކުން ވެސް ކަރަންޓްގެ ހިދުމަތް މެދުކަނޑައިލާނެ ކަމުގެ އިންޒާރު ވެސް ސްޓެލްކޯ އިން ދިނެވެ.

އެކަމާ ގުޅިގެން އިއްޔެ އެފްއޭއެމް އިން ބުނީ އެފްއޭއެމް ހައުސްގެ ބޭނުން ކޮވިޑުގެ ތެރޭގައި ސަަރުކާރުން ވެސް ހިފި ކަމަށާއި އަދި މިހާރު ވެސް ސްކައުޓް އެސޯސިއޭޝަން އެތަނުގައި ހިންގާ ކަމަށެވެ. އެހެންވެ އެފްއޭއެމް އިން ޒިންމާވާން ނުޖެހޭ ފައިސާތަކެއް ވެސް ހިމެނޭ މައްސަލައެއްގައި އެފްއޭއޭއެމްގެ އޮފީސް ހިންގާ ބައިން ކަރަންޓު ކަނޑާލުމަކީ ސްޓެލްކޯގެ އިހުލާސްތެރިކަމެއް ނެތްކަން ދައްކުވައިދޭ ކަމެއް ކަމަށް އެ އެސޯސިއޭޝަނުން ބުންޏެވެ.

ވ. އަދި ކ. އަތޮޅަށް ސްޓެލްކޯއިން ހިދުމަތްދޭ ރަށްތަކުގެ މަގުބައްތިތައް ބެލެހެއްޓުމާ ހަވާލުވުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ޝަރީފް ވިދާޅުވީ ތަނަކުން ކަރަންޓު ކަނޑާލަނީ އިހުލާސްތެރި ނިޔަތެއް ނެތިގެނެއް ނޫން ކަމަށެވެ.

"އެފްއޭއެމް އިން 6.5 މިލިއަން ރުފިޔާ ދައްކަން އޮތީމާ އަޅުގަނޑުމެން ކަރަންޓު ކަނޑާލީ އިހުލާސްތެރި ނިޔަތެއް ނެތިއެއް ނޫނޭ ނުބުނެވޭނެ" ޝަރީފް ވިދާޅުވި އެވެ.

ކަރަންޓުގެ ހިދުމަތްތައް އެންމެ ފުރިހަމަ ގޮތުގައި ދިނުމަށް ކުރާ ހަރަދުތަކަށް އިންވެސްޓު ކުރަން، ކަރަންޓު ފީގެ ގޮތުގައި ދައްކާ ފައިސާ ބޭނުން ވާނެ ކަމަށް ޝަރީފް ވިދާޅުވި އެވެ. އެއްވެސް ފަރާތަކުން ކަރަންޓު ފީ ނުދައްކައިފި ނަމަ އެ ހިދުމަތައް ބުރޫއަރާނެ ކަމަށް ވެސް އޭނާ ވިދާޅުވި އެވެ.

"ކަރަންޓު ފީ ނުދައްކަންޏާ ކޮންތާކުންތޯ ލާރި ގެންނާނީ؟ ދައުލަތުން އެ ހުރިހާ ލާރިއެއް ނުލެވޭނެ. އެހެންވީމަ، ރައްޔިތުން ދޭ ލާރިން ރައްޔިތުންގެ ހިދުމަތުގެ ފެންވަރު ރަނގަޅު ކުރުމަށް އަޅުގަނޑުމެން އިންވެސްޓު ކުރަނީ،" ޝަރީފް ވިދާޅުވި އެވެ.

ޝަރީފް ވަނީ އެހާ ދުވަސް ވަންދެން ކަރަންޓު ފީ ނުދައްކާ ތިބީ ކޮން ނިޔަތެއްގައި ތޯ އެފްއެމްއާ ސުވާލު ކުރައްވާފަ އެވެ.

"ބަޔާންތައް ނުނެރޭ! އަޅުގަނޑުމެންވެސް ބޭނުމެއްނޫން ބަޔާން ނެރޭކަށް. ދައްކަން ޖެހޭ ބިލްތައް ހަލާސް ކުރޭ. އަޅުގަނޑުމެން ކަރަންޓު ދޭނަން،" ޝަރީފް ވިދާޅުވި އެވެ.

އެފްއޭއެމް އިން 2019 ވަނަ އަހަރުގެ ސެޕްޓެމްބަރުން ފެށިގެން މި އަހަރުގެ ސެޕްޓެމްބަރު މަހުގެ ނިޔަލަށް އެއްވެސް ކަރަންޓް ބިލެއްގެ ފައިސާ ނުދައްކާ ކަމަށް ސްޓެލްކޯ އިން ބުނެ އެވެ.

ސްޓެލްކޯ އަށް މިހާރު ދައްކަންޖެހޭ 6.5 މިލިއަން ރުފިޔާއަކީ ޖޫރިމަނާ އެކު އެ މުއްދަތުގެ ކަރަންޓު ބިލުތަކަށް އަރާ ޖުމުލަ އަދަދެވެ.

އެފްއޭމް ހައުސް އިން ކަރަންޓުގެ ހިދުމަތް މެދުކަނޑައިލަން ޖެހުނީ، އެ އެސޯސިއޭޝަނުން ސްޓެލްކޯ އަށް ދައްކަންޖެހޭ ފައިސާ ދެއްކުމަށް ގިނަ ފުރުސަތުތަކެއް ދިނުމުން ވެސް އެކަން ކޮށްފައި ނުވާތީ ކަމަށް ސްޓެލްކޯއިން ބުނެ އެވެ.

ސަރުކާރުގެ ބައެއް ކުންފުނިތަކުން ވެސް ކަރަންޓް ބިލް ނުދައްކާ މައްސަލަ ވަރަށް ބޮޑު ކަމަށް ސްޓެލްކޯއިން ބުނެފައިވެ އެވެ. އެ ކުންފުނިން މި މަހު ކުރީކޮޅު ބުނި ގޮތުގައި ދައުލަތުގެ މީޑިއާ، ޕީއެސްއެމްގެ ކަރަންޓު ބިލުތަކަށް 80 މިލިއަނަށް ވުރެ ގިނަ ރުފިޔާ ނުދައްކަައި އެބައޮތް ކަމަށެވެ.