ވާވޭ ވޮޗް ބަޑްސް: ގަޑީގެ ތެރޭގައި އިއާބަޑްސް!

ވާވޭ ކުންފުނިން ވަޔަލެސް އިއާބަޑްސްއާ އެކު އަތުކުރި ގަޑިއެއް ތައާރަފްކޮށްފި އެވެ.

"ވާވޭ ވޮޗް ބަޑްސް" ގައި އިން-ބިލްޓް އިއާޕޮޑްސް އިންނާނެ އެވެ.

އާންމުކޮށް ތަންތަނަށް ދާއިރު، އިއާބަޑް ނުވަތަ އެއާޕޮޑް ގެންދަން ހަނދާންނެތޭ މީހުންނަށް، މި ގަޑިއަކީ ހައްލަކަށް ވާނެ އެވެ.

އާދައިގެ ގަޑިއެއްގެ ޑިޒައިނަށް ހަދާފައިވާ މި ގަޑިއަކީ 1.43 އިންޗި "އޭމޯލްޑް" ސްކްރީނަކާ އެކު، ހުޅުވާލުމުން އެތެރޭގައި ވާވޭ އިއާބަޑްސް އިންނަ ގަޑިއެކެވެ.

އެ ގަޑީގެ ފީޗާތަކުގެ ތެރޭގައި، ހާޓް ރޭޓް އަދި ނިދި މޮނިޓަކުރުމާއި އޮކްސިޖަން ލެވެލް ބެލުމާއި ފިޓްނެސް ޓްރެކް ކުރުން ފާހަގަކޮށްލެވެ އެވެ. ފެން ނުވަންނަ މި ގަޑީގެ ވާވޭ ހެލްތު އެޕް މެދުވެރިކޮށް، އެންޑްރޮއިޑް އަދި އައިއޯއެސްގެ ޑިވައިސްތަކަށް ގުޅާލެވޭނެ އެވެ.

ހަތަރު ގްރާމުގެ ބަރުދަން ހުންނަ އިއާބަޑުތަކުގައި އާޓިފިޝަލް އިންޓެލިޖެންސް (އޭއައި) ނޮއިސް ކެންސަލޭޝަން ފީޗާގެ އިތުރުން، ވައިގެ އަޑު މަޑުކޮށްދޭ ފީޗާއެއް ހިމެނެ އެވެ. އެކަމަކު، ނޮއިސް ކެންސަލޭޝަން ޖައްސައިގެން އިއާބަޑްސްގެ ޗާޖު ހިފަހައްޓަނީ ތިން ގަޑިއިރަށެވެ. އަދި ގަޑީގެ ޗާޖު ތިން ދުވަހަށް ހިފަހައްޓާނެ ކަމަށް ވާވޭ އިން ބުނެ އެވެ.

"ވާވޭ ވޮޗް ބަޑްސް" އަންނަ މަހު މާކެޓަށް ނެރެން ހަމަޖެހިފާ ވާއިރު، ފުރަތަމަ ލޯންޗު ކުރަނީ ޔޫރަޕްގެ ގައުމުތަކަށެވެ. ރާއްޖެ ހިމެނޭ ސަރަހައްދަށް އަންނާނެ ވަކި ތާރީހެއް އަދި އެ ކުންފުނިން އިއުލާނެއް ނުކުރެ އެވެ.