އެފްރިކާގައި ހިފެހެއްޓި އެފްއެސްއެމް ދެ ބޯޓުގެ ފަޅުވެރިން ރާއްޖެ ގެނެސްފި

އެފްރިކާގެ އެރިތުރިއާގައި ހިފަހައްޓާފައިވާ ފިއުލް ސަޕްލައި މޯލްޑިވްސް (އެފްއެސްއެމް) ގެ ދެ ބޯޓު ނުގެވުނު ކަމަށާއި ނަމަވެސް އޭގައި ތިބި ފަޅުވެރިން ރާއްޖެ ގެނެސްފައިވާ ކަމަށް އެ ކުންފުނިން މިއަދު ބުނެފި އެވެ.

މިސްރުން ރާއްޖެ އަށް ދަތުރުކުރި ދެ ބޯޓު އެރިތުރިއާގައި ބަނދަރުކުރީ މިދިޔަ އޭޕްރީލް މަހުގެ 26 ވަނަ ދުވަހު، މޫސުން ގޯސްވުމުގެ ސަބަބުންނެވެ. އެ ގައުމުގެ ސިފައިން އެ ދެ ބޯޓު ހިފެހެއްޓީ ހުއްދަ ނުހޯދާ އެރިތުރިއާ އަށް އެތެރެވި ކަމަށް ބުނެ އެވެ.

އޭރު އެ ދެ ބޯޓުގައި ހަތަރު ދިވެހިންނާއި މިސްރުގެ ހަތަރު ފަޅުވެރިއަކު ތިއްބެވެ. އެއީ މިސްރުގައި އެ ދެ ބޯޓު ބަނދެގެން ރާއްޖެ ގެނައުމަށް ކުރި ދަތުރެކެވެ. އާ ދެ ބޯޓު ބަނުމަށް ހޭދަވި އަދަދެއް އަދި ސާފެއް ނުވެ އެވެ.

އެފްއެސްއެމްގެ މެނޭޖިން ޑިރެކްޓަރު މުހައްމަދު ގަސަމް ވިދާޅުވީ ދެ ބޯޓުގައި ތިބި ރާއްޖޭގެ ފަޅުވެރިންތައް ރާއްޖެއަށް މިދިޔަ ހުކުރު ދުވަހު ގެނެސްފައިވާ ކަމަށެވެ. އަދި އޭގައި ތިބި އިޖިޕްޓުގެ ފަޅުވެރިން އެ ގައުމަށް ފޮނުވާލާފައިވާ ކަމަށް ވެސް އޭނާ ވިދާޅުވި އެވެ.

އޭނާ ވިދާޅުވި ގޮތުގައި ރާއްޖޭގެ ފޮރިން މިނިސްޓްރީއާ ގުޅިގެން ބޯޓު ގެނައުމަށް އަދިވެސް އަންނަނީ މަސައްކަތް ކުރަމުންނެވެ. އެކަމަކު އަދި ކުރިއެރުމެއް ނުލިބޭ ކަމަށް ވިދާޅުވި އެވެ.

"އަޅުގަނޑުމެން އެބަ މަސައްކަތް ކުރަން އިންޑިއާގެ، ދިއްލީ އެމްބަސީ މެދުވެރިކޮށް ވެސް ބޯޓު ގެނައުމަށް. ނަމަވެސް އެކަމަށް ވެސް އެއްބާރުލުން ނުލިބޭ،" އޭނާ ވިދާޅުވި އެވެ.

ގަސަމް ކުރިން ވިދާޅުވެފައި ވަނީ ދެ ބޯޓު ހިފަހައްޓާފައި އޮތް މައްސަލައިގައި ފޮރިން މިނިސްޓްރީގެ އޮފިޝަލަކާއި އެފްއެސްއެމްގެ އޮޕިޝަލަކު އެރިޓްރިއާގެ ސަރުކާރާ މަޝްވަރާ ކުރުމަށް އެ ގައުމަށް ދިއުމަށް ނިންމާފައިވާ ކަމަށެވެ. އެކަމަކު އެ ދެ އޮފިޝަލުންނަށް ދެވޭނެ މަގެއް އަދި ނުފެނެ އެވެ.

ފޮރިން މިނިސްޓްރީގެ ކޮމިއުނިކޭޝަން ހެޑް، ސަފާތު އަހުމަދު ޒާހިރު ވިދާޅުވީ އެ ގައުމުގައި ހިފެހެއްޓި ބޯޓުތަކުގެ މައްސަލަ ވަރަށް ގާތުން ބަލަމުން އަންނަ ކަމަށެވެ.

އެއީ ބަނުމަށް 2019 ވަނަ އަހަރު އެފްއެސްއެމުން ހަވާލުކުރި ހަތަރު ބޯޓުގެ ތެރެއިން ދެ ބޯޓެވެ. މީގެ ކުރިން ދެ ބޯޓު ވަނީ ރާއްޖެ ގެނެސްފަ އެވެ.

އެ ގައުމުގައި ހިފަހައްޓައިގެން އުޅޭ ދެ ބޯޓަކީ 180،000 ލީޓަރުގެ ޑީސަލް އަދި 40،000 އާއި 60،000 ލީޓަރުގެ ޕެޓްރޯލް ރައްކާކުރެވޭނެ ކެޕޭސިޓީ ހުރި ބޯޓެއް ކަމަށް އެފްއެސްއެމްއިން ބުނެފައިވެ އެވެ. އެފްއެސްއެމްގެ ފްލީޓްގައި މިހާރު 20 ބާޖު އޮވެ.