ޖަޕާނު ސަރުކާރުން ހަދިޔާކުރި އެމްބިއުލާސްތައް ހަވާލުކޮށްފި

ޖަޕާނު ސަރުކާރުން ރާއްޖެއަށް ހަދިޔާކުރި އަށް އެމްބިއުލާންސް، ހަ ހޮސްޕިޓަލަކަށް މިއަދު ދީފި އެވެ.

ހެލްތު މިނިސްޓްރީން ބުނީ އިމަޖެންސީ ފަރުވާގެ ނިޒާމް ހަރުދަނާކުރުމަށް ހއ. ހޯރަފުށީ ހެލްތު ސެންޓަރު، ހއ. ކެލާ ހެލްތު ސެންޓަރު، ހދ. ކުޅުދުއްފުށީ ރީޖަނަލް ހޮސްޕިޓަލް، ލ. ގަން ރީޖަނަލް ހޮސްޕިޓަލް، ފުވައްމުލަކު ހޮސްޕިޓަލް އަދި އައްޑޫ އިކުއިޓޯރިއަލް ހޮސްޕިޓަލަށް އެމްބިއުލާންސް ހަވާލުކޮށްފައިވާ އެވެ.

ބާކީ ދެ އެމްބިއުލާންސް ދިނީ، ހުޅުމާލޭގައި ގާއިމްކޮށްފައިވާ ނޭޝަނަލް އެމްބިއުލާންސް ސާވިސްއަށެވެ.

އެ އެމްބިއުލާންސްތަކުގައި އަށް ސެޓުގެ 12 މެޑިކަލް އިކުއިޕްމަންޓް ހުންނާނެ އެވެ. އޭގެ ތެރޭގައި އެޑްވާންސް ލައިފް ސަޕޯޓް އިކުއިޕްމަންޓް ބޭގްސް، އޮކްސިޖަން ސިލިންޑަރު، ބޭގް ވޯލްވް މާސްކް، ސްޕައިނަލް ބޯޑް ފަދަ ތަކެތި ހިމެނެ އެވެ.

މިނިސްޓްރީން ބުނީ ރަށްތަކަށް އެމްބިއުލާންސް ހަވާލުކުރުމުން ކާރިސާތަކާއި ކުއްލި ހާލަތްތަކުގައި ނުވަތަ އެކްސިޑެންޓްތަކުގައި ބަލި މީހުންނަށް ކުއްލި ފަރުވާ ދިނުމަށް އިތުރު ފުރިހަމަކަމެއް ލިބޭނެ ކަމަށެވެ.