އަމީރު ވިދާޅުވަނީ ބަޖެޓުގެ ކޯޑު ބަދަލުކޮށްގެން އަބަދުވެސް ހަރަދު ކުރާ ކަަމަށް

މިހާތަނަށް ރާއްޖޭގައި ހަރަދުތައް ހަމަޖައްސަނީ، ޖުމްލަ ބަޖެޓުގެ ތެރެއިން ކަންކަން ކުރާ އުސޫލުން ކަމަށާއި ބަޖެޓު ކޯޑު ބަދަލުކޮށްގެން ހަރަދު ކުރުމަކީ، އަބަދުވެސް ކުރާ ކަމެއް ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

މިއަދު ބަޖެޓު ކޮމިޓީގައި އަމީރު ވިދާޅުވީ، ރާއްޖޭގައި އަބަދު ވެސް އޮޑިޓަ ޖެނެރަލް އޮފީހުން ވެސް މަޖިލީހުން ވެސް ކޯޓުތަކުން ވެސް އެހެނިހެން އޮފީސްތަކުން ވެސް ބަޖެޓު ހުސްވެގެން ބަޖެޓަށް ފޮނުވާ ކަމަށެވެ.

އަމީރު ވިދާޅުވީ، ކޮންޓިންޖެންސި ބަޖެޓު ތެރެއަށް އަދަދު އިތުރު ކުރަނީ އެފަދަ ހާލަތްތަކުގައި ބޭނުން ކުރުމަށް ކަމަށެވެ.

އަމީރު ވިދާޅުވީ، ޕީއެސްއައިޕީ ބަޖެޓަކީ މިނިސްޓްރީގެ ކޮންޓްރޯލުގައި އޮންނަ ބަޖެޓެއް ނޫން ކަމަށެވެ. އޭނާ ވިދާޅުވީ، ވެލާނާ އިންޓަނޭޝަނަލް އެއާޕޯޓުގެ ޕްރޮޖެކްޓް ފަދަ މަސައްކަތެއްގެ ބިލް ބޮޑު ކުރީމަ އޮޓަމެޓިކުން ޕޭމެންޓް އަންނާނެ ކަމަށެވެ. އެހެން ނަމަވެސް އެ ހަރަދާ ހެދި ވެސް ދައުލަތުގެ ޖުމްލަ ހަރަދު ބޮޑުވާނެ ކަމަށް ވިދާޅުވި އެވެ.

"މިސާލަކަށް މިތާންގައި، މި އިއްޒަތްތެރި މަޖިލީހުން ވެސް ފޮނުވާ މެންބާސްގެ ޓްރެވަލް ކޯޑު ހުސްވެއްޖެއޭ. ޓްރެވަލް ކޯޑަށް އިތުުރުކޮށްދޭށޭ ކިޔައިފަ. އޮޑިޓާ ޖެނެރަލް އޮފީހުގެ ކިތައް ފަހަރުތޯ މިދިޔަ ފަސް އަހަރުގެ ތެރޭގައި މިވެނި ރިޕެއާ ކޯޑެއް ހުސްވެއްޖެއޭ ކިޔައިފަ. ރިޕެއާ ކޯޑަށް ފައިސާ ފޮނުވާށޭ ކިޔައިފަ. ކިތައް މިނިސްޓްރީތޯ އެގޮތަށް ފޮނުއްވަނީ،" އޭނާ ވިދާޅުވި އެވެ.

އަމީރު ވިދާޅުވީ، މިހާތަނަށް ރާއްޖޭގައި ހަރަދުތައް ހަމަޖައްސަނީ، ޖުމްލަ ބަޖެޓުގެ ތެރެއިން ކަންކަން ކުރާ އުސޫލުން ކަމަށެވެ. މިގޮތަށް މިނިސްޓަރު ވިދާޅުވުމުން ޑިމޮކްރެޓްސް އަށް ނިސްބަތްވާ މެންބަރުން ވަނީ ކޮމެޓީގެ ތެރޭގައި ހިތްހަމަނުޖެހުން ފާޅުކޮށް އަޑުގަދަކުރައްވައިފަ އެވެ.

ބަޖެޓުގެ ކޯޑުތަކާ ގުޅޭ ގޮތުން މިނިސްޓަރު ޖަވާބު ދެއްވީ ބަޖެޓު ކޮމިޓީގައި ބައެއް މެންބަރު މަސައްކަތްތަކަށް ބަޖެޓުގައި ކަނޑައެޅި އަދަދަށް ވުރެ ހަރަދުތައް ކުރީ ގާނޫނާ ހިލާފަށް ކަމަށް ތުހުމަތު ކުރުމުންނެވެ. އެގޮތުން މެންބަރު ވިލުފުށީ ދާއިރާގެ މެންބަރު ހަސަން އަފީފު ވަނީ، ޕީއެސްއައިޕީ އަށް އިތުރަށް ހަރަދު ކުރި ކަމަށް އޮޑިޓާ ޖެނެރަލް އޮފީހުން ވެސް ފާހަގަކޮށްފައިވާ އިރު އެގޮތަށް އަމަލު ކުރެއްވީ ކީއްވެގެންތޯ ސުވާލު ކުރައްވައިފަ އެވެ.

"އޮޑިޓް އޮފީހުން ވެސް މިއޮތީ ފާހަގަކޮށްފައި ޕީއެސްއައިޕީ އަށް ވެސް އިތުރަށޭ ހަރަދުކޮށްފައި އޮތީ. ސަބްސިޑީ އަށް ވެސް އިތުރަށް ހަރަދުކޮށްފައިވާ ކަމަށް. ގާނޫނުއަސާސީގައި އެބަ ބުނޭ، ހަރަދު ކުރަން ޖެހޭނީ އެކަމަށް ކަނޑައެޅިފައި އޮންނަ މިންވަރަކަށޭ. އެއަށް ވުރެ އިތުރަށް ހަރަދު ކުރަން ވެއްޖިއްޔާ ޖެހޭނީ މަޖިލީހުގެ ހުއްދަ ހޯދައިގެން ނުވަތަ ފާސްކޮށްގެން އެކަން ކުރަން،" އޭނާ ވިދާޅުވި އެވެ.