ޗައިނާގެ ރިސާޗް އުޅަނދު ލަންކާ ސަރަހައްދަށް ވަނުމުގެ ހުއްދަ ނުދޭނެ ކަމަށް ބުނެފި

ޗައިނާގެ ރިސާޗް އުޅަނދެއް ކަމަށްވާ "ޝިއަންގް ޔަންގް ހޮންގް 3" ލަންކާގެ އެއްވެސް ބަނދަރަކަށް ވަނުމަށް ވެސް އަދި އިގްތިސާދީ ހާއްސަ ސަރަހައްދަށް ވަނުމުގެ ހުއްދަ ވެސް ނުދޭނެ ކަމަށް އެ ގައުމުން އިންޑިއާއަށް އަންގާފައިވާ ކަމަށް އިންޑިއާގެ މީޑިއާ އިން ބުނެފި އެވެ.

ދަ ހިންދޫ އިން ބުނީ އިންޑިއާގެ ސަލާމަތަށް ނުރައްކާވެދާނެ އެއްވެސް ކަމެއް ނުކުރުމަށް، ޖުލައި 21، 2023 ގައި ލަންކާގެ ރައީސް ރަނިލް ވިކްރެމަސިންހަ އާއި އިންޑިއާގެ ބޮޑުވަޒީރު ނަރެންދުރަ މޯދީގެ ބައްދަލުވުމުގައި ލަންކާއިން ޔަގީންކަން ދީފައިވާ ކަމަށެވެ. އެކަން އިންޑިއާއިން ލަންކާގެ ސަމާލުކަމަށް ގެނަމުން، ޗައިނާގެ އުޅަނދަށް ހުއްދަ ނުދޭން ނިންމައި އެކަން އެންގީ ކަމަށް، ކަމުގެ މައުލޫމާތު އެނގޭ މީހުންނާ ހަވަލާދީ ނޫހުގައި ބުނެފައިވެ އެވެ.

"ޝިއަންގް ޔަންގް ހޮންގް 3" އިން މާކަނޑުގެ ފުނުގައި ތޮރުފުންތަކެއް ތޮރުފައިގެން ކުރާ ދިރާސާއަކަށް މި މަހުގެ 5 ގައި ވަންނާނެ ކަމަށާއި މި މަސައްކަތް މެއި މަހު ފަހުކޮޅާ ހަމަޔަށް ދިގުދެމިގެންދާނެ ކަމަށް ވެސް ބުނެފައިވެ އެވެ.

ޗައިނާގެ ރިސާޗް އުޅަނދުތަކަށް ލަންކާއިން ހުއްދަ ދީ ޗައިނާއިން ބޭނުން ކޮންމެ ކަމަކަށް މަގު ފަހިކޮށްދޭ ކަމަށް ބުނެ އިންޑިއާ އާއި އެމެރިކާއިން ވެސް ވަނީ ލަންކާގެ ރައީސް ރަނިލް އަށް ފިއްތުން އިތުރުކޮށްފަ އެވެ. ލަންކާއިން ވަނީ ޗައިނާއާ ގުޅިގެން ވެސް ކަނޑުގެ ދިރާސާތަކެއް ކުރިއަށް ގެންގޮސްފަ އެވެ.

މީގެ ކުރިން ޗައިނާގެ ހައިޑްރޮގްރެފިކް ސާވޭކުރާ އުޅަނދަކަށް ވެސް ލަންކާއިން ހުއްދަ ދީ، އިންޑިއާއާ ކައިރި ހަމްބަންޓޯޓާގެ ބަނދަރުގައި ބޯޓު އަޅައިގން ތިބުމުގެ ހުއްދަ ވެސް ދިނެވެ. މިއީ ބެލިސްޓިކް މިސައިލް ވެސް ޓްރެކްކުރުމުގެ ގާބިލްކަން ލިިބިފައިވާ އުޅަނދެކެވެ.