އިންޑިއާގެ ސުޕްރީމް ކޯޓުން އެސްބީއައި އަށް ވަރުގަދަ އަމުރެއް

އިންޑިއާގެ ސިޔާސީ ޕާޓީތަކަށް، ކާކުކަން ނޭނގޭ ގޮތަށް ފައިސާ ހަދިޔާކުރެވޭ "އިލެކްޓޮރަލް ބޮންޑް" ގަނެފައިވާ މީހުންގެ މައުލޫމާތު ކުރިއަށް އޮތް އާންމު އިންތިހާބުގެ ކުރިން ހާމަކުރުމަށް އެ ގައުމުގެ ސުޕްރީމް ކޯޓުން ގައުމީ ބޭންކް ސްޓޭޓް ބޭންކް އޮފް އިންޑިއާ (އެސްބީއައި) އަށް މިއަދު އަމުރުކޮށްފި އެވެ.

އެސްބީއައި މެދުވެރިކޮށް ވިއްކި "އިލެކްޓޮރަލް ބޮންޑް" އަކީ އަމިއްލަ ފަރުދުންނާއި ކުންފުނިތަކަށް ވެސް އެ މީހަކު ބޭނުންވާ ސިޔާސީ ޕާޓީއަކަށް ކާކުކަން ނޭނގޭ ގޮތަށް ފައިސާ ދެވެ އެވެ. އެކަމަކު މިއީ ވޯޓުލާ މީހުންނަށް އެނގެންޖެހޭ މައުލޫމާތެއް ސިއްރުކުރުން ކަމަށާއި އެހެންވެ މިގޮތަށް ފައިސާ ދިނުން ގާނޫނުއަސާސީ ހިލާފް ކަމަށް ސުޕްރީމް ކޯޓުން މިދިޔަ މަހު އޮތީ ކަނޑައަޅައިފަ އެވެ.

މިގޮތަށް ފައިސާ ދޭން ބޭނުންވާ މީހުން ޖެހޭނީ އެސްބީއައި އިން "އިލެކްޓޮރަލް ބޮންޑް" ގެ ސެޓްފިކެޓެއް ގަންނާށެވެ. ފާޑުކިޔާ ފަރާތްތަކުން ވަނީ މިއީ ސިޔާސީ ކަންކަމަށް ކަޅު ފައިސާ ބޭނުންކުރުމަށް ހުޅުވާފައި އޮންނަ ދޮރެއް ކަމަށް ބުނެފަ އެވެ. މިކަމަށް ތާއީދުކުރާ މީހުން ބުނަނީ މިއީ ސިޔާސީ ފަންޑުތަކަށް ސީދާ ފައިސާ ދިނުމަށް ވުރެ ފައިސާ މެނޭޖްކުރަން ފަސޭހަ ގޮތެއް ކަމަށެވެ. މި ސިސްޓަމަށް މޯދީގެ ބީޖޭޕީން ތާއީދުކުރި ނަމަވެސް އިދިކޮޅުން ބުނަނީ މިއީ އެހެން ޕާޓީތަކަށް އެހީވާ މީހުންގެ މައުލޫމާތު ސަރުކާރު ބޭންކު މެދުވެރިކޮށް ބީޖޭޕީއަށް ލިބި އިތުރު މައްސަލަތައް ކުރިމަތިވާ ގޮތެއް ކަމަށެވެ.

ސުޕްރީމް ކޯޓުގެ އަމުރާ އެކު އެސްބީއައި އިން ވަނީ މައުލޫމާތު ހާމަކުރުމުގެ މުއްދަތު ޖޫން 30 އާ ހަމަޔަށް ދިނުމަށް އެދިފަ އެވެ. އޭޕްރީލް/މެއި ގައި އިންތިހާބު ބާއްވާނެ ކަމަށް ބެލެވޭއިރު އެ މުއްދަތު ދީފި ނަމަ އޮންނާނީ އިންތިހާބު ނިމިފަ އެވެ. ވޯޓުލުމުގެ ހައްގު ބިލިއަނެއްހާ މީހުންނަށް ލިބިފައިވާ އިންތިހާބު މިފަހަރު ވެސް ކާމިޔާބުކުރާނީ މިހާރުގެ ވެސް ބޮޑުވަޒީރު ނަރެންދުރަ މޯދީ ކަމަށް ވަރަށް ބޮޑަށް ބެލެވެ އެވެ.

އެސްބީއައިގެ އެދުމާ ގުޅިގެން އުއްތަމަ ފަނޑިޔާރު ދަނަންޖަޔާ ޔަޝްވަންތު ޗަންދުރަޗޫދް ނިންމެވީ މާޗް 12 ކުރިން މައުލޫމާތު ހާމަކުރުމަށާއި އެ މުއްދަތުގެ ކުރިން މައުލޫމާތު ހާމަ ނުކޮށްފި ނަމަ ކޯޓުގެ އަމުރަށް ނުކިޔަމަންވީ ކަމަށް ބަލައި ފިޔަވަޅު އަޅާނެ ކަމަށެވެ.

އެސްބީއައި އިން ބުނީ މައުލޫމާތު ހާމަކުރަން އުނދަގޫވަނީ އެ މައުލޫމާތު އެއްކުރުމުގައި ހުރި ދަތިކަމެއްގެ ސަބަބުން ކަމަށެވެ. އެކަމަކު ކޯޓުން ބުނީ މިއީ މިހާރު ވެސް އެ ބޭންކުގައި ހުންނާނެ މައުލޫމާތު ކަމަށެވެ.

ކޯޓު އަމުރުގައި ބުނެފައިވަނީ ކޮންމެ ބޮންޑެއް ގަތް މީހުންގެ މައުލޫމާތު ވަކިވަކިން ހާމަކޮށް މާޗް 13 ގެ ކުރިން އިލެކްޝަންސް ކޮމިޝަންގެ ވެބްސައިޓުގައި ހާމަކުރުމަށެވެ. -- އޭއެފްޕީ