އިމިގްރޭޝަން އޮފިސަރެއް ކަމަށް ހެދިގެން ގެއަކަށް ވަދެ ބިދޭސީއެއްގެ އަތުން ފޭރުނު މީހަކު ހައްޔަރުކޮށްފި

އިމިގްރޭޝަން އޮފިސަރެއް ކަމަށް ހެދިގެން ގެއަކަށް ގޮސް ބިދޭސީއެއްގެ އަތުން ފޭރުނު މައްސަލައެއްގައި މީހަކު ހައްޔަރުކޮށްފި އެވެ.

ފުލުހުންގެ މީޑިއާ އޮފިޝަލަކު މިއަދު ވިދާޅުވީ، ބިދޭސީން ދިރިއުޅޭ ތަނަކަށް އިމިގްރޭޝަން އޮފިސަރުންގެ ނަމުގައި ތިން މީހަކު ވަދެ، ބަންގްލަދޭޝް މީހެއްގެ އަތުން ފޯނަކާއި 9،000ރ. ފޭރުނު މައްސަލައެއްގެ ރިޕޯޓެއް ލިބުނު ކަމަށެވެ.

އެ މައްސަލައާ ގުޅިގެން ހައްޔަރުކުރީ ގ. ބެރުގެ، މުހައްމަދު ނަވީން، 44 އެވެ. އޭނާ ހައްޔަރުކުރީ ކޯޓު އަމުރެއްގެ ދަށުން ކަމަށް ފުލުހުން ބުންޏެވެ.

އިމިގްރޭޝަން ކޮންޓްރޯލަރު ޝަމްއާން ވަހީދު އެކްސްގައި ކުރެއްވި ޕޯސްޓެއްގައި ވިދާޅުވީ،އެ އިދާރާ އިން ހިންގާ އޮޕަރޭޝަންތަކުގައި އިމިގްރޭޝަން އޮފިސަރުންގެ އައިޑީކާޑު ފެންނަ ގޮތަށް ހުންނާނެ ކަމަށެވެ. އަދި މިހާރު އިމިގްރޭޝަން އޮފިސަރުންތައް މިހާރު އޮޕަރޭޝަންތައް ހިންގަނީ ޔުނިފޯމުގައި ކަމަށް އޭނާ ވިދާޅުވި އެވެ.

އިމިގްރޭޝަން އޮފިސަރުން ކަމަށް ދައްކައިގެން ތިބި ދިވެހިންތަކެއް، ބިދޭސީއެއްގެ އަތުން ފޯނާއި ފައިސާތަކެއް ފޭރުނުއިރު، އެ އިދާރާ އިން އަންނަނީ ގަވައިދާ ހިލާފަށް އުޅޭ ބިދޭސީންނާ ދެކޮޅަށް ވަރުގަދަ އޮޕަރޭޝަނެއް ފަށައި ސައްހަ ވިސާ ނެތް މީހުން ޑީޕޯޓުކުރަން ފަށައިފަ އެވެ. ކޮންމެ ދުވަހަކު ކަހަލަ ގޮތަށް އިމިގްރޭޝަން އޮފިސަރުން އަންނަނީ އެފަދަ ތަންތަން ރެއިޑްކޮށް، ގަވާއިދާ ހިލާފުވާ ބިދޭސީން އަތުލައިގަންނަމުންނެވެ.