ލަބޭރާ ބޮޑީބޯޑިން ޗެލެންޖްގެ ޑިޖިޓަލް ޕާޓްނަރަކަށް ދިރާގު

ލަބޭރާ ބޮޑީބޯޑިން ޗެލެންޖުގެ ޑިޖިޓަލް ޕާޓްނަރަކަށް ދިރާގު ހަމަޖައްސައިފި އެވެ.

މިއީ ފަސް އަހަރުގެ މެދުކެނޑުމަކަށް ފަހު ބާއްވާ މި ޗެލެންޖުގެ ތިން ވަނަ އެޑިޝަނެވެ. އަދި މި މުބާރާތަކީ މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން މި އަހަރު ބާއްވާ ދެވަނަ ގައުމީ މުބާރާތެވެ. އެ އެސޯސިއޭޝަނުން މި އަހަރު ފުރަތަމަ ބޭއްވީ ބުރުނު ޝިކާރަ ބޮޑީބޯޑިން ޗެލެންޖް 2024 އެވެ.

ދިރާގުގެ މެނޭޖާ ބްރޭންޑް އެންޑް އިވެންޓްސް، ނައިޔާ ޝަރީފް ވިދާޅުވީ ބޮޑީބޯޑިން އެސޯސިއޭޝަނަށް ސަޕޯޓުދީ، ލަބޭރާ ބޮޑީބޯޑިން ޗެލެންޖަށް ސަޕޯޓް ދިނުމަކީ އެތުލީޓުންނަށް އެ ފަރާތްތަކުގެ ހުނަރު ދައްކާލުމަށް ހުޅުވާދެވޭ ދޮރެއްގެ ކަމަށެވެ. އަދި ދިވެހި އެތުލީޓުން ކުރިއެރުވުމަށް މަސައްކަތް ކުރުމަކީ އެ ކުންފުނިން ބޮޑު އިސްކަމެއް ދޭ ކަމެއް ކަމަށް އޭނާ ވިދާޅުވި އެވެ.

އެމްބީބީއޭގެ ރައީސް ހުސެއިން ނިޒާމް ވަނީ ދިރާގުން އެ އެސޯސިއޭޝަނާއި އެތުލީޓުން ކުރިއަރުވަން ކުރާ މަސައްކަތަށް ޝުކުރު އަދާކޮށްފަ އެވެ.

ލަބޭރާ ބޮޑީބޯޑިން ޗެލެންޖު މިއަދު ފަށާނެ އެވެ. އަދި މި ޗެލެންޖު ކުރިއަށް ދާނީ އަންނަ މަހުގެ ފަސް ވަނަ ދުވަހުގެ ނިޔަލަށް މާލޭ ރާޅުގަނޑު ސަރަހައްދުގަ އެވެ.