ރައްޔިތުން ބޭނުންވެއްޖެ ނަމަ ދާއިރާގެ މަޖިލިސް މެންބަރު ދުރުކުރެވެން ޖެހޭނެ: އަބްދުއްރަހީމް

ރައްޔިތުން ބޭނުންވެއްޖެ ހާލަތެއްގައި އެ ދާއިރާއެއްގެ މަޖިލިސް މެންބަރު ވަކިކުރެވޭނެ ގޮތް އޮންނަން ޖެހޭނެ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

ދައުލަތުގެ މީޑިއާއަށް ދެއްވި އިންޓަވިއުއެއްގައި އަބްދުއްރަހީމް ވިދާޅުވީ، ރައީސުލްޖުމްހޫރިއްޔާ އަކީ ގައުމުގެ މުޅި އާބާދީން ވޯޓު ލައިގެން ހޮވާ ވެރިއެއް ކަމަށާއި އޭގެ ބަދަލުގައި މެންބަރަކު ހޮވަން ވޯޓު ދެނީ އެ ދާއިރާއެއްގެ 5،000 އެއްހާ މެންބަރުން ކަމަށެވެ.

އެހެންވެ ވަކި އިޖުރާއަތްތަކެއްގެ ތެރެއިން، ރައްޔިތުންގެ މަޖިލީހަށް ރައީސް ވަކިކުރުމުގެ ބާރު އޮންނައިރު، މަޖިލިސް މެންބަރުން ވަކި ކުރެވޭނެ ގޮތް ގާނޫނު އަސާސީގައި ނެތް ކަމަށެވެ.

"އަޅުގަނޑު ގަބޫލެއް ނުކުރެވޭ އެންމެ މަތީ ވެރިމީހާ ބަދަލުކުރުމުގެ ފުރުސަތު ފަހިވެފައި އޮވެފައި އޭގެ ދަށަށް އިންތިހާބުކުރެވޭ މީހުން ވަކިކުރެވޭ ގޮތް ނެތުމަކީ މި ޒަމާނާ ފައިހަމަވާ ކަމެއް ކަމަށް،" ފޮނަދޫ ދާއިރާގެ މެންބަރުކަން ވެސް ކުރައްވާ އަބްދުއްރަހީމް ވިދާޅުވި އެވެ.

އަބްދުއްރަހީމް ވިދާޅުވީ، ރައްޔިތުން ނުރުހިއްޖެ ހާލަތެއްގައި ނުވަތަ ރައްޔިތުންގެ ވިންދާ ދެކޮޅަށް މަސައްކަތް ކުރާ ހާލަތެއްގައި ރައްޔިތުންނަށް ނުވަތަ އެހެން ބަޔަކަށް ވެސް އެ މީހަކު މަގާމުން ވަކިކުރެވޭނެ ގޮތް އޮންނަން ޖެހޭނެ ކަމަށް ގަބޫލުކުރައްވާ ކަމަށެވެ.