ގަވައިދަށް ނުފެތޭތީ، މީޑިއާ ކޮމިޝަން ބިލާ ގުޅޭ ކުއްލި މައްސަލަ އެޖެންޑާ ނުކުރި

މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން އުފެއްދުމާ ގުޅޭ ގޮތުން ރައްޔިތުންގެ މަޖިލީހަށް ހުށަހަޅާފައިވާ ބިލްގައި ކަންބޮޑުވާ ކަންކަން ހުރުމުން އެ މައްސަލާގައި މަޖިލިހުގައި ބަހުސް ކުރަން އިދިކޮޅުން ހުށަހެޅި ކުއްލި މައްސަލަ އެޖެންޑާ ނުކުރަން ރިޔާސަތުން ނިންމައިފި އެވެ.

ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއިލް އަހުމަދު ނަސީމް މިއަދުގެ ޖަލްސާ އަށް ހުށަހަޅުއްވަން އުޅުއްވި ކުއްލި މައްސަލައާ މެދު ގޮތެއް ގޮތް ނިންމަވަމުން މަޖިލިހުގެ ރައީސް އަބްދުއްރަހީމް އަބްދުﷲ ވިދާޅުވީ، މަޖިލީހުގެ ގަވާއިދުގެ 197 ވަނަ މާއްދާގެ އ. އަދި މ. ގައިވާ ޝަރުތުތައް ފުރިހަމަ ނުވާ ކަމަށެވެ.

އެ މާއްދާގައި ވާ ގޮތުން މަޖިލިހަށް ހުށަހަޅާފައިވާ ބިލެއް ނުވަތަ މައްސަލައަކާ ގުޅިގެން ހިނގާނެ ބަހުސަކާ ގުޅޭ ގޮތުން އަދި ފަހު ވަގުތު މަޖިލީހުގައި ވާހަކަ ދައްކާނެ މައްސަލައަކާ ގުޅޭ ގޮތުން ދުރާލައި އެއްޗެއް ބުނުމުގެ ބޭނުމުގައި ކުއްލި މައްސަލައެއް ހުށަހެއް ނޭޅޭނެ އެވެ.

މީކާއިލް ހުށަހެޅުއްވި މައްސަލާގައި ވިދާޅުވީ، މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން ބިލް ފަރުމާ ކޮށްފައި ވަނީ މީޑިއާތައް ރެގިއުލޭޓް ކުރުމުގެ ބާރު ސަރުކާރުގެ ފުރިހަމަ ކޮންޓްރޯލް އޮންނަ ގޮތަށް ސީދާ ރައީސުލްޖުމްހޫރިއްޔާ އައްޔަން ކުރާ މެންބަރުން ހިމެނޭ ގޮތަށް ކަމަށެވެ.

ބޮޑެތި އަދަދުތަކުން ނޫސްވެރިންނާއި މީޑިއާތައް ޖޫރިމަނާ ކުރުމާއި ނޫސްތަކާއި މީޑިއާތައް ބަންދު ކޮށްލުމުގެ ފުރިހަމަ މިނިވަންކަން ސަރުކާރަށް އެ ބިލުން ލިބޭ ކަމަށް ވެސް މީކާއިލް ވިދާޅުވި އެވެ.

އެފަދަ ނާތަހުޒީބު ބިލްތައް ފާސްކުރުމަށް ކުރަމުންދާ މަސައްކަތް ހުއްޓާލުމަށް ސަރުކާރާއި ރައްޔިތުންގެ މަޖިލީހަށް މީކާއިލް ގޮވާލެއްވި އެވެ.

މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން ބިލާ ގުޅޭ ގޮތުން ނޫސްވެރިންގެ ޖަމިއްޔާ އާއި މީޑިއާތަކުގެ އިސްވެރިންގެ ފަރާތުން ވަނީ ކަންބޮޑުވުން ފާޅުކޮށްފަ އެވެ.

ރައީސް ޑރ. މުހައްމަދު މުއިއްޒު ރޭ ކުރެއްވި ޓުވީޓެއްގައި ވަނީ މީޑިއާތައް ކޮންޓްރޯލް ކުރުމުގެ ވިސްނުމެއް ނުގެންގުޅުއްވާ ކަމަށް ވިދާޅުވެފަ އެވެ.