އެމެރިކާގައި އުޅެން ބޭނުންވާ މީހުންނަށް ފަސް މިލިއަން ޑޮލަރަށް "ގޯލްޑް ކާޑް" ވިސާ ދެނީ

އެމެރިކާގައި އުޅެން ބޭނުންވާ ބިދޭސީންނަށް "ގޯލްޑް ކާޑް" ވިސާގެ ނަމުގައި އާ ވިސާއެއް ތައާރަފްކޮށް އޭގެ އަގުގެ ގޮތުގައި ފަސް މިލިއަނެއްހާ ޑޮލަރު ދައްކަން ޖެހޭ ގޮތަށް ހަމަޖައްސަން ނިންމާފައިވާ ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް ވިދާޅުވީ މިއީ މިހާރު ދޫކުރާ "ގްރީން ކާޑު" ގެ އަގު ބޮޑު ވާޝަނެއް ކަމަށާއި ވަޒީފާ އުފައްދާ މީހުން އެމެރިކާއަށް ގެނެސް ދަރަނި ކުޑަކުރުމަށް މި ކާޑުގެ ސަބަބުން އެހީއަކަށް ވާނެ ކަމަށެވެ.

"ވިއްކަން ފަށަން މި އުޅެނީ ގޯލްޑް ކާޑެއް. މިހާރު މި އޮންނަނީ ގްރީން ކާޑް. މިއީ ގޯލްޑް ކާޑް. މީގެ އަގެއް ކަމަށް ކަނޑައަޅަން މި އުޅެނީ ފަސް މިލިއަނެއްހާ ޑޮލަރު،" އޯވަލް އޮފީހުގައި ނޫސްވެރިންނާ ބައްދަލުކުރައްވައި ޓްރަމްޕް ވިދާޅުވި އެވެ.

ގަވައިދާ ހިލާފަށް އެމެރިކާއަށް އެތެރެވާ މީހުންނާ މެދު ހަރުކަށިކޮށް އަމަލުކުރައްވައި އަދި އެހެން ތިބި އެތައް މިލިއަން ބަޔަކު ގައުމުން ބޭރުކުރުމުގެ ވައުދާ އެކު ވެރިކަމަށް ވަޑައިގެންނެވި ޓްރަމްޕް ވިދާޅުވީ އާ ވިސާ އަކީ އެމެރިކާގެ ރަށްވެހިކަން ހޯދުމުގެ އަގުބޮޑު މަގެއް ހުޅުވާލުން ކަމަށެވެ.

"ވަރަށް ގިނަ މީހުން މި ގައުމުގައި އުޅެން ބޭނުންވާނެ. އެ މީހުން ވަޒީފާތަކާއި ކުންފުނިތައް އުފައްދާނެ،" ޓްރަމްޕް ވިދާޅުވި އެވެ. "އެ ވާނީ ފައިސާ ހުރި މީހުންނަށް."

އޭނާ ވިދާޅުވީ ކުރިއަށް އޮތް ދެ ހަފްތާއެއްހާ ދުވަސް ތެރޭ މި ކާޑު ވިއްކަން ފެށޭނެ ކަމަށެވެ.

"މީގެ މިލިއަނެއްހާ ކާޑު ވިއްކޭނެ ކަމަށް މި ބަލަނީ. ގާނޫނީ ގޮތުން މިކަމުގައި ކުރަންޖެހޭ ހުރިހާ ކަމެއް މިހާރު ވަނީ ކޮށްފައި،" ރައީސް ޓްރަމްޕް ވިދާޅުވި އެވެ.

ބިލިއަނަރެއް ކަމަށްވާ ޓްރަމްޕް ވިދާޅުވީ މި ކާޑަށް އެދި ހުށަހަޅާ ހުރިހާ ހުށަހެޅުމެއް ވެސް ވަރަށް ފަރުވާތެރިކަމާ އެކު ބަލާނެ ކަމަށެވެ. މި ކާޑަށް ރަޝިޔާގެ މަހުޖަނުން ޝަރުތު ހަމަވާނެތޯ ނޫސްވެރިޔަކު ސުވާލުކުރުމުން ވިދާޅުވީ "ވެދާނެ" ކަމަށެވެ.

"ވެދާނެ. އަޅުގަނޑަށް އެނގޭ ރަޝިޔާގެ ބައެއް މަހުޖަނުންނަކީ ވަރަށް ރަނގަޅު މީހުން. އެއީ ވެދާނެ ކަމެއް،" ޓްރަމްޕް ވިދާޅުވި އެވެ. "އެމީހުން ކުރިން އޮތް މުއްސަނދިކަމެއް ނެތް. އަޅުގަނޑަށް ހީވަނީ އެބޭފުޅުންނަށް ކުރެވިދާނެހެން. އަޅުގަނޑަށް ހީވަނީ އެބޭފުޅުންނަށް ފަސް މިލިއަން ޑޮލަރު ގެނެވޭނެހެން."

މީގެ ތިން އަހަރު ކުރިން ރަޝިޔާއިން ޔޫކްރެއިނަށް އަރައިގަތް ފަހުން ހުޅަނގުގެ ދަތިކުރުމުގެ ފިޔަވަޅުތަކާ އެކު ރަޝިއާގެ ވަރަށް ގިނަ މަހުޖަނުންނަށް ވަނީ ބޮޑެތި ގެއްލުންތަކެއް ވެފަ އެވެ. ޓްރަމްޕް ވިދާޅުވީ ރަޝިޔާއާ ދެކޮޅު ބައެއް ފިޔަވަޅުތައް ކޮންމެވެސް ހިސާބަކުން އުވާލެވިދާނެ ކަމަށެވެ.

ޓްރަމްޕް ވަނީ އަލަށް ތައާރަފްކުރާ ކާޑަށް "ޓްރަމްޕް ކާޑު" ކިޔުމަށް ބައެއް ބޭފުޅުން ހުށަހެޅުއްވި ކަމަށާއި އެހެން ކިޔަސް މައްސަލައެއް ނެތް ކަމަށެވެ. -- އޭއެފްޕީ