ސައްދާމް ހުސައިން އިރާގުން ގެންދަން ގައްޒާފީ މަސައްކަތްކުރެއްވި

ބަޣުދާދު (އެޕްރީލް 24) - މަރުގެ އަދަބުން ސަލާމަތް ކުރުމަށްޓަކައި އިރާގުގެ ކުރީގެ ރައީސް ސައްދާމް ހުސައިން ބަޣުދާދުން ނެރެގެން ގެންދަން އެމެރިކާގެ ގާޑުންނަށް ރިޝްވަތު ދިނުމަށް ލީބިއާގެ ލީޑަރު މުއައްމަރުލް ގައްޒާފީ މަސައްކަތް ކުރައްވާފައިވާ ކަމަށް ސައްދާމުގެ ޝަރީއަތް ކުރިއަށް ގެންދިޔަ ފަނޑިޔާރެއް ކަމަށްވާ މުނީރު ހައްދާދު ވިދާޅުވެއްޖެ އެވެ.

އަލް އަރަބިއްޔާއާ ވާހަކަ ދައްކަވަމުން ހައްދާދު ވިދާޅުވީ ސައްދާމުގެ މަރުގެ އަދަބު ތަންފީޒު ކުރުން އަވަސްކުރީ އޭނާ ވަގަށް ނަގައިގެން ގެންގޮސްފާނެތީ ކަމަށެވެ. އޭގެ ބަދަލުގައި އެމެރިކާ އިން ދިޔައީ ސައްދާމަށް އަދަބު ތަންފީޒު ކުރުން ލަސްކުރަމުން ކަމަށް ވެސް ހައްދާދު ވިދާޅުވި އެވެ.

ސައްދާމުގެ ޝަރީއަތް ކުރިއަށް ގެންދިޔަ ސްޕެޝަލް ކްރިމިނަލް ކޯޓުގެ އިސް ފަނޑިޔާރު ހައްދާދު ވިދާޅުވީ ސައްދާމު މެރުމުގެ ހުއްދަ އިރާގުގެ ކުރީގެ ރައީސް ޖަލާލް ތަލަބާނީ ދެއްވާފައިވާތީ އެކަން ފަސްކުރެވެން ވެސް ނެތް ކަމަށެވެ.

"ސައްދާމް ދަން ޖެއްސީ ޑިސެމްބަރު 30، 2006 ގައި. އެއީ އިރާގުގައި އަޟުހާ އީދު ފާހަގަ ކުރަން ފެށި ދުވަސް. އީދު ދުވަހު މަރުގެ އަދަބު ދިނުމަށް އިރާގުގެ ގާނޫނުތައް ހުއްދައެއް ނުކުރޭ. އެކަމަކު ސައްދާމު ޖަލުން ފިލައިފާނެތީ އޭނާގެ މައްޗަށް އަދަބު ތަންފީޒު ކުރަން ލަސްކުރެވެން ނެތީމަ އެ ދުވަހު އެކަން ކުރީ،" ހައްދާދު ވިދާޅުވި އެވެ.

އޭނާ ވިދާޅުވީ ސައްދާމުގެ ޝަރީއަތް ކުރިއަށް ގެންދިޔައީ މިިނިވަންކޮށް ކަމަށެވެ. އަދި ސައްދާމުގެ މައްޗަށް އަދަބު ތަންފީޒު ކުރި އިރު ސުންނީ އެއްވެސް ލީޑަރެއް ނެތް ކަމަށް ވިދާޅުވި އެވެ. ހައްދާދު ވިދާޅުވީ އެންމެ ފަހުގެ ވަސިއްޔަތަކީ ކޮބައިތޯ ސައްދާމު ގާތު އެހުމުން އޭނާ ވިދާޅުވީ ފަނޑިޔާރަށް ފުރިހަމަ ސިއްހަތަކަށް އެދޭ ކަމަށެވެ.

ހައްދާދު ވިދާޅުވީ ސައްދާމަކީ ސުންނީއެއް ކަމަށް ގަބޫލްކުރަން ދަތިކަމަށާއި އޭނާ އަކީ ވަރަށް ގިނަ ބަޔަކު މަރާފައިވާ ޚުދުމުހުތާރު މީހެއް ކަމަށެވެ. އަދި ސައްދާމު ހުސައިންގެ ބާސް ޕާޓީ އަކީ ވެސް ޝިއައީ ބައެއް ކަމަށާއި އެ ޕާޓީ ގާއިމްކޮށްފައި ވަނީ ވެސް ޝިއައީ ސިޓީއެއްގައި ކަމަށެވެ.