ކުނޫޒު އަދިވެސް ވަނީ ފުލުހުންގެ ބެލުމުގެ ދަށުގައި

ޖުމްހޫރީ ޕާޓީގެ މައި އޮފީސް އަދި އިދިކޮޅު ފަރާތްތަކުގެ ޖަލްސާ ފަހަކަށް އަައިސް ބާއްވާ ހަރުގެ، މ. ކުނޫޒް ރޭ ފާސްކުރުމަށް ފަހު އަދިވެސް އެތަން ވަނީ ފުލުހުންގެ ބެލުމުގެ ދަށުގައި ކަމަށް ފުލުހުން މިއަދު ބުނެފި އެވެ.

ފުލުހުންގެ މީޑިއާ އޮފިޝަލަކު ވިދާޅުވި ގޮތުގައި ކުނޫޒް އަދިވެސް އޮތީ ފުލުހުންގެ ބެލުމުގެ ދަށުގަ އެވެ. ނަމަވެސް އެކަމާ ގުޅޭ އިތުރު އެއްވެސް ތަފްސީލެއް އޭނާ ނުދެއްވަ އެވެ.

ކްރިމިނަލް ކޯޓުން ވަނީ އިއްޔެ އިރުއޮއްސި ހަޔަކުން ފެށިގެން ތިން ދުވަހުގެ މުއްދަތެއް ވަންދެން ކުނޫޒު ބަލައި ފާސް ކުރުމުގެ އަމުރު ފުލުހުންނަށް ދީފަ އެވެ. އެ އަމުރާއެކު ފުލުހުން ކުނޫޒަށް ވަދެ، ފަސް ގަޑިއެއްހާއިރު ވަންދެން އެތަން ބަލައި ފާސްކުރި އެވެ. އެކަމަކު ފާސްކޮށް ނިމުމަށް ފަހު، ފުލުހުން ދިން ލިޔުމުގައި ބުނެފައި ވަނީ "މައްސަލަ އާއި ގުޅުން ހުރި އެއްޗެއް ނުފެނޭ" ކަމށެވެ.

ކްރިމިނަލް ކޯޓު ހިންގުން ވަގުތީ ގޮތުން ހަވާލުކޮށްފައިވާ ގާޒީ އާދަމް އާރިފް ނެރުއްވި އަމުރުގައި ބުނެފައިވާ ގޮތުގައި ޖުމްހޫރީ ޕާޓީ އާއި އެމްޑީޕީ އާއި އަދާލަތު އަދި "މި ނޫން ވެސް ބައެއް ފަރާތްތައް އިސްކޮށް ތިބެ" ގެންދަނީ ސަރުކާރު ހިންގުމަށް ދަތިވާ ގޮތަށާއި ސަރުކާރު ވައްޓާލަން "ސައްލާކޮށް ރާވަމުން" ނެވެ. އަދި ރައްޔިތުންގެ މަޖިލިހުގެ ރަސްމީ މަސައްކަތްތަކަށް ހުރަސް އަޅަން އުޅޭ ކަމަށް ތުހުމަތުކޮށް އަމުރުގައި އެ ބައި ހިމަނާފައިވެ އެވެ.

ފުލުހުން ކުނޫޒަށް ވަދެ ބަލާ ހޯދަން އެދިފައިވާ ތަކެތީގެ ތެރޭގައި ހިމެނެނީ "ސަރުކާރު ބަދުނާމްވާ ގޮތަށް ލިއެފައިވާ ލިއެކިއުންތަކާއި ބެނާތަކާއި ފޮތިތަކާއި ސީސީޓީވީ ފުޓޭޖް" އެވެ. ނަމަވެސް އެ އަމުރުގައި ތުހުމަތުކުރާ އެއްވެސް އެއްޗެއް ނުފެންނަ ކަމަށް ފުލުހުން ވަނީ ބުނެފަ އެވެ.

ޖުމްހޫރީ ޕާޓީގެ ސްޕޯކްސްޕާސަން އަލީ ސޯލިހު ވިދާޅުވި ގޮތުގައި ކުނޫޒް ބަލައި ފާސް ކުރުމަށް ފަހު، އެ ތަނުން ރޭ ފުލުހުން ދިއުމާއެކު، އަމުރު ނުހިނގާނެ އެވެ. އެހެންވެ، ޖުމްހޫރީ ޕާޓީގެ އޮފީހަށް ވަނުމުގެ ފުރުސަތު އޮތް ނަމަވެސް، ފުލުހުން އެކަމަށް ހުރަސް އަޅާފައިވާ ކަމަށް އޭނާ ވިދާޅުވި އެވެ.

ކުނޫޒަކީ އިދިކޮޅު އިއްތިހާދުގެ މައި ޖަގަހަ އެވެ. އެތަނުގައި ފަހަކަށް އައިސް ސިޔާސީ ހަރަކާތްތައް ހިންގުމަށް ފުލުހުން އަންނަނީ ވަރަށް ބޮޑަށް ހުރަސް އަޅަމުންނެވެ. މިއީ އިދިކޮޅު ސިޔާސީ ޕާޓީތައް ގުޅިގެން އެތަނުގައި ޖަލްސާއެއް ބާއްވަން އުޅުމުން އެކަމަށް ހުރަސް އެޅި ދެވަނަ ފަހަރެވެ.

ސިޔާސީ މަސްރަހު ވަރަށް ބޮޑަށް ހަލަބޮލިވެފައިވާ ދަނޑިވަޅުގައި ސިފައިންނާއި ފުލުހުން މާލެ ތެރޭގައި ހަރަކާތްތެރިވާ މިންވަރު ވަރަށް ބޮޑަށް ވަނީ އިތުރުވެފަ އެވެ.