ކުނޫޒު ބަލައި ފާސްކޮށް ނުނިމޭ: ފުލުހުން

ޖުމްހޫރީ ޕާޓީގެ މައި އޮފީސް އަދި އިދިކޮޅު ފަރާތްތަކުގެ ޖަލްސާ ފަހަކަށް އައިސް ބާއްވަމުން އަންނަ މައި ހަރުގެ މ. ކުނޫޒު ބަލައި ފާސްކޮށް އަދިވެސް ނުނިމޭ ކަމަށް ފުލުހުން މިއަދު ބުނެފި އެވެ.

ފުލުހުން ބުނީ ކުނޫޒު ބަލައި ފާސްކުރަން ކަނޑައެޅިފައިވާ ތަންތަނާއި ތަކެތި، ކޯޓު އަމުރު ދީފައިވާ ވަގުތާ ހަމައަށް ފާސް ކުރަމުންދާނެ ކަމަށެވެ. އަދި ކުނޫޒު ބަލައި ފާސް ކުރުމަށް ފަހު ފުލުހުން ދިން ލިޔުމަކީ ރޭގައި ފާސްކުރި ތަކެއްޗާ ބެހޭ ގޮތުން ދިން ލިޔުމެއް ކަމަށް ފުލުހުން ބުންޏެވެ.

އެ ލިޔުމުގައި ބުނެފައިވާ ގޮތުން މައްސަލައާ ގުޅުން ހުރި އެއްޗެއް ނުފެނެ އެވެ.

"އެއީ އެއްވެސް ހާލެއްގައި ކުނޫޒު އެއްކޮށް ބަލައި ފާސްކޮށް ނިންމުމަށް ފަހު ދިން ލިޔުމެއް ނޫން ކަން މައުލޫމާތަށްޓަކައި ދަންނަވަން،" ފުލުހުން ނެރުނު ކުރު ބަޔާނުގައިވެ އެވެ.

ކްރިމިނަލް ކޯޓު ހިންގުމާ ހަވާލުވެ ހުންނެވި ގާޒީ އާދަމް އާރިފް ނެރުއްވި އަމުރުގައިވާ ގޮތުން، ކުނޫޒް ބަލައި ފާސްކުރަން ޖެހެނީ ރޭގެ އިރުއޮއްސި 6:00 އިން "ދުވާލާއި ރޭގަނޑު ހިމެނޭ ގޮތަށް 72 ގަޑިއިރު" އަށެވެ.

ކުނޫޒް އަދިވެސް އޮތީ ފުލުހުންގެ ބެލުމުގެ ދަށުގަ އެވެ. އެތަނަށް އެއްވެސް މީހަކަށް ނުވަދެވޭ ގޮތަށް ފުލުހުން ދަނީ ކުނޫޒުގެ ބޭރުގައި ފޯރިމަރަމުންނެވެ. އަދި ކުނޫޒު ކުރިމަތީގައި އޮންނަ ފަނޑިޔާރު މަގުގެ ވަކި ހިސާބެއްގައި ބެރިކޭޑް ޖަހައި ފުލުހުން ވަނީ އެ ސަރަހައްދު ވެސް ބަންދުކޮށްފަ އެވެ.

ކޯޓު އަމުރާއެކު ފުލުހުން ކުނޫޒަށް ރޭ ވަދެ، ފަސް ގަޑިއެއްހާއިރު ވަންދެން އެތަން ބަލައި ފާސްކުރި އެވެ.

އަމުރުގައި ބުނެފައިވާ ގޮތުގައި ޖުމްހޫރީ ޕާޓީ އާއި އެމްޑީޕީ އާއި އަދާލަތު އަދި "މި ނޫން ވެސް ބައެއް ފަރާތްތައް އިސްކޮށް ތިބެ" ގެންދަނީ ސަރުކާރު ހިންގުމަށް ދަތިވާ ގޮތަށާއި ސަރުކާރު ވައްޓާލަން "ސައްލާކޮށް ރާވަމުން" ނެވެ. އަދި ރައްޔިތުންގެ މަޖިލިހުގެ ރަސްމީ މަސައްކަތްތަކަށް ހުރަސް އަޅަން އުޅޭ ކަމަށް ތުހުމަތުކޮށްފައިވެ އެވެ.

ފުލުހުން ކުނޫޒަށް ވަދެ ބަލާ ހޯދަން އެދިފައިވާ ތަކެތީގެ ތެރޭގައި ހިމެނެނީ "ސަރުކާރު ބަދުނާމްވާ ގޮތަށް ލިއެފައިވާ ލިއެކިއުންތަކާއި ބެނާތަކާއި ފޮތިތަކާއި ސީސީޓީވީ ފުޓޭޖް" އެވެ. ނަމަވެސް އެ އަމުރުގައި ތުހުމަތުކުރާ އެއްވެސް އެއްޗެއް ނުފެންނަ ކަމަށް ފުލުހުން ވަނީ ބުނެފަ އެވެ.

ކުނޫޒަކީ އިދިކޮޅު އިއްތިހާދުގެ މައި ޖަގަހަ އެވެ. އެތަނުގައި ފަހަކަށް އައިސް ސިޔާސީ ހަރަކާތްތައް ހިންގުމަށް ފުލުހުން އަންނަނީ ވަރަށް ބޮޑަށް ހުރަސް އަޅަމުންނެވެ. ސިޔާސީ މަސްރަހު ވަރަށް ބޮޑަށް ހަލަބޮލިވެފައިވާ ދަނޑިވަޅުގައި ސިފައިންނާއި ފުލުހުން މާލެ ތެރޭގައި ހަރަކާތްތެރިވާ މިންވަރު ވަރަށް ބޮޑަށް ވަނީ އިތުރުވެފަ އެވެ.