ހެޕީ މާކެޓަށް 25 އަހަރުފުރުން ފާހަގަކުރަން އާ ފިހާރައެއް ހުޅުވައިފި

ހެޕީ މާކެޓަށް 25 އަހަރު ފުރުން ފާހަގަކުރުމުގެ ގޮތުން، "ހެޕީ މާކެޓް ޝޮޕް 5"ގެ ނަމުގައި މިއަދު އާ ފިހާރައެއް ހުޅުވައިފި އެވެ.

މިއަދު ހަވީރު ބޭއްވި ރަސްމިއްޔާތެއްގައި ހެޕީ މާކެޓުގެ ސީއީއޯ އަދި އެމްއެންޑީއެފްގެ ކުރީގެ ކެޕްޓަން އަލީ އިހުސާން ހުޅުއްވައިދެއްވި ފިހާރަ އަކީ އެ ކުންފުނީގެ ހަތް ވަނަ ފިހާރަ އެވެ. މި ފިހާރަ ހުންނާނީ މެދުޒިޔާރަތް މަގުގައި، ދަރުމަވަންތަ ސްކޫލްގެ ވަގުތީ އިމާރާތުގެ ކުރިމައްޗަށްވާ ގޮތަށެވެ.

ބޮޑުބެރުގެ ފޯރިގަދަ ހަރަކާތްތަކާ އެކު، ފިހާރަ ހުޅުވަން ބޭއްވި ރަސްމިއްޔާތުގައި ޗޮކްލެޓް ސާންޕަލިންގެ އިތުރުން ޑިސްކައުންޓް ވައުޗާ އަދި ތަފާތު ހަދިޔާތައް ވެސް ބެހި އެވެ.

ފިހާރަ ހުޅުއްވައި ދެއްވުމަށް ފަހު އިހުސާން ވިދާޅުވީ، އާ ފިހާރައިން އެ ކުންފުނިން ގެންނަ އެކި ބްރޭންޑްތަކުގެ ކާނާގެ ބާވަތްތައް، ތަޖުރިބާކުރުމުގެ ފުރުސަތު ލިބޭނެ ކަމަށެވެ. އޭނާ ވިދާޅުވީ އެ ފިހާރަ ހިންގާނީ އެކްސްޕީރިއަންސް ޒޯނެއްގެ ގޮތުގައި ކަމަށެވެ.

އިހުސާން ވިދާޅުވީ އެ ކުންފުނީގެ އަމާޒަކީ، ކޮލިޓީ ރަނގަޅު ޕްރޮޑަކްޓްތައް ވިޔަފާރިވެރިންނާ ވީހާ ވެސް ގާތަށް ގެނެސްދިނުން ކަމަށެވެ. އަދި އާ ފިހާރައިން ކާނާގެ ބާވަތްތައް ތަޖުރިބާ ކުރުމުގެ ފުރުސަތާ އެކު، ހޯލްސޭލް އަދި ރީޓެއިލް ހިދުމަތް ވެސް ދޭނެ އެވެ.

ފިނިކުރި ކާނާގެ ބާވަތްތައް ނުވަތަ ފްރޯޒަން ގުޑްސް ފުޅާ ދާއިރާއެއްގައި ރާއްޖޭގައި ވިއްކަމުން އަންނަ ކުންފުނިން ބުނީ، މިހާރުގެ އަމާޒަކީ ހިކި ކާނާގެ ބާވަތްތައް ނުވަތަ ޑްރައި ގުޑްސްގެ ވިޔަފާރި ވެސް ފުޅާކުރަން ކަމަށެވެ.