އަވަހާރަކޮށްލަފާނެ ކަމުގެ ބިރަށް ލުބުނާނުގެ ބޮޑު ވަޒީރު އިސްތިއުފާ ދެއްވައިފި

ބެއިރޫތު (ނޮވެމްބަރު 5) - އަވަހާރަކޮށްލަފާނެ ކަމުގެ ބިރު ބޮޑު ކަމަށް ވިދާޅުވެ ލުބުނާނުގެ ބޮޑު ވަޒީރު ސާދު ހަރީރީ އިއްޔެ އިސްތިއުފާ ދެއްވައިފި އެވެ.

ސައުދީ އަރަބިއާ އަށް ވަޑައިގެން ރިޔާޒުގައި ދެއްވި ޓީވީ އިންޓަވިއުއެއްގައި ހަރީރީ ވަނީ އޭނާ އަވަހާރަލޮށްލަން އުޅޭކަމުގެ ފަހަތުގައި ވަނީ އީރާން ކަމަށް ތުހުމަތު ކުރައްވައިފަ އެވެ.

"މެދުއިރުމަތި ކޮންޓްރޯލް ކުރަން އީރާނުން ދަނީ މަސައްކަތް ކުރަމުން. ސީރިއާ އާއި އީރާނުން ނިންމާ ކަންތައްތަކުގެ ފަހަތުގައި ވަނީ އީރާން. އެކަމަކު އީރާނާއި އެ ގައުމަށް ތާއީދުކުރާ ގައުމުތަކަށް ބުނެލަން ބޭނުން ވަނީ އަރަބި އެހެން ގައުމުތަކުގެ ދާޚިލީ ކަންކަމަށް ނުފޫޒު ފޯރުވަން ކުރާ މަސައްކަތް ނާކާމިޔާބުވާނެއޭ،" ހަރީރީ ވިދާޅުވި އެވެ.

ހަރީރީގެ ތުހުމަތު އީރާނުން ވަނީ ދޮގު ކޮށްފަ އެވެ. އަދި ހަރީރީގެ އިސްތިއުފާގެ ފަހަތުގައި ވަނީ އެމެރިކާ އާއި ސައުދީ އަރަބިއާ ކަމަށް ވަނީ ބުނެފަ އެވެ.

އީރާނުގެ ފޮރިން މިނިސްޓްރީގެ އޮފިޝަލް ހުސައިން ޝެއިޚުލް އިސްލާމް ވިދާޅުވީ ހަރީރީ އިސްތިއުފާ ދެއްވާފައި ވަނީ އެމެރިކާގެ ރައީސް ޑޮނަލްޑް ޓްރަމްޕާއި ސައުދީ ވަލީ އަހުދު މުހައްމަދު ބިން ސަލްމާންގެ ސަބަބުން ކަމަށެވެ.

ހަރީރީގެ ތަގްރީރުގައި ވަނީ އީރާނުގެ މަދަދު ލިބޭ ހިޒްބުﷲ އަށް ވެސް ތުހުމަތުތަކެއް ކުރައްވައިފަ އެވެ. ހަރީރީ ވިދާޅުވީ ލުބުނާނުގެ ހާލަތު މިއަދު އޮތީ އޭނާގެ ބައްޕަ ކުރީގެ ބޮޑު ވަޒީރު ރަފީގު ހަރީރީ މީގެ 12 އަހަރު ކުރިން އަވަހާރަކޮށްލި އިރު އޮތް ހާލަތުގައި ކަމަށެވެ.

ރަފީގު ހަރީރީ ފެބްރުއަރީ 2005 ގައި އަވަހާރަކޮށްލީ ބޭރޫތުގައި މޮޓޯކޭޓަށް ދިން ބޮމުގެ ހަމަލާއެއްގަ އެވެ.

ލުބުނާނުގެ ރައީސް މިޝޭލް އައޫން ވިދާޅުވީ ހަރީރީ ފޯނުން ގުޅުއްވާ އިސްތިއުފާ ދެއްވި ކަމަށް ވިދާޅުވެފައިވާ ކަމަށެވެ.