ލުބުނާނުގެ ބޮޑު ވަޒީރު ކަމަށް އަނެއްކާ ވެސް ހަރީރީ

ބޭރޫތު (މެއި 25) - ލުބުނާނުގެ ބޮޑު ވަޒީރު ކަމަށް އަނެއްކާ ވެސް ސައިދު ހަރީރީ ގެނައުމަށް ރައީސް މިޝެލް އަޔޫން ނިންމަވައިފި އެވެ.

ރައީސް އަޔޫންއާ މަޝްވަރާ ކުރުމަށް ފަހު ލުބުނާނުގެ ޕާލަމެންޓުން ވެސް މިހާރު ވަނީ ހަރީރީ އަށް ބޮޑު ވަޒީރުގެ މަގާމް ދޭން ނިންމައިފަ އެވެ. މިއީ ލުބުނާނުގެ ބޮޑު ވަޒީރު ކަމަށް ހަރީރީ ވަޑައިގަންނަވާ ތިން ވަނަ ފަހަރެވެ.

ހަރީރީ ވެސް ވިދާޅުވީ ޕާލަމެންޓާ މަޝްވަރާ ކުރުމަށް ފަހު ރައީސް އަޔޫން ވަނީ ސަރުކާރެއް އުފެއްދުމުގެ ފުރުސަތު އޭނާ އަށް ދީފައި ކަމަށެވެ. އަދި ލުބުނާނުގެ ރައްޔިތުންގެ ލާބައަށް ޓަކައި ވަރަށް އަވަހަށް ސަރުކާރެއް އެކުލަވާލާނެ ކަމަށް ވިދާޅުވި އެވެ.

ލުބުނާނުގައި މި މަހު 6 ވަނަ ދުވަހު ބޭއްވި އާއްމު އިންތިޚާބުގައި ހަރީރީގެ ފިއުޗާ މޫވްމަންޓަށް ވަނީ ތިން ބައިކުޅަ އެއްބައި ގޮނޑި ގެއްލިފަ އެވެ. ނަމަވެސް 20 ގޮނޑިއާ އެކު އެއީ ސުންނީންގެ އެންމެ ބޮޑު ޕާޓީ އެވެ. އެންމެ ގިނަ ގޮނޑި ކާމިޔާބު ކުރީ ހިޒްބުﷲ އާއި އެ ޖަމާއަތާ ގުޅިފައިވާ ފަރާތްތަކެވެ.

ލުބުނާނުގައި އޮންނަ ވެރިކަމުގެ ބާރުތައް ހިއްސާ ކުރުމުގެ ނިޒާމުގެ ދަށުން ބޮޑު ވަޒީރު ކަމަށް ވަޑައިގެންނެވޭނީ ސުންނީ މުސްލިމަކަށެވެ. ޕާލަމެންޓުގެ ރައީސް ކަމަށް ޝިއައީ މުސްލިމަކު އަދި ގައުމުގެ ރައީސް ކަމަށް ކްރިސްޓިއަނެކެވެ.