ލީޑަރުން "ރަހީނުން"ގެ ގޮތުގައި ބައިތިއްބައިގެން މަޝްވަރާއެއް ނުކުރެވޭނެ: ނަޝީދު

ސިޔާސީ ލީޑަރުން "ރަހީނުން"ގެ ގޮތުގައި ބައިތިއްބައިގެން ސިޔާސީ ޕާޓީތަކުގެ މަޝްވަރާ ކުރިއަކަށް ނުގެންދެވޭނެ ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

އިނގިރޭސިވިލާތުގެ ހިމާޔަތް ހޯއްދަވައިގެން ހުންނެވި ނަޝީދު ކުރެއްވި ޓުވީޓެއްގައި މިހެން ވިދާޅުވީ، ސިޔާސީ ޕާޓީތަކާ އެކު މާދަމާ މަޝްވަރާ ފަށަން ތައްޔާރުވެފައިވާ ކަަމަށް ސަރުކާރުން އިއުލާންކުރުމުންނެވެ.

ނަޝީދު ވިދާޅުވީ މަޝްވަރާގައި ބައިވެރިވެވޭނީ ލީޑަރުން މިނިވަންކުރުމުން ކަމަށެވެ.

ނަޝީދަށް 13 އަހަރުގެ ޖަލު ހުކުމެއް އިއްވާފައިވާއިރު އަދާލަތު ޕާޓީގެ ރައީސް އިމްރާން އަބްދުﷲ އަށް ވަނީ 12 އަހަރުގެ ޖަލު ހުކުމެއް އިއްވައިފަ އެވެ. އަދި ކުރީގެ ޑިފެންސް މިިނިސްޓަރު މުހައްމަދު ނާޒިމަށް 11 އަހަރުގެ ހުކުމެއް އިއްވާފައިވާއިރު އިއްތިހާދުގެ ސްޕޯކްސްޕާސަން ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފަށް ވަނީ ހަތަރު މަހަށް ޖަލަށް ލައިފަ އެވެ.

ލީޑަރުން މިނިވަންކުރުމަކީ މަޝްވަރާގައި ބައިވެރިވާން އެމްޑީޕީ އާއި އަދާލަތުން ކުރި ޝަރުތެވެ. އެކަމަކު ކުރިން އެ ޝަރުތަށް ސަރުކާރުން ދެކޮޅު ހެދި ނަމަވެސް އެ ފުރުސަތު މިހާރު އޮތް ކަމަށް މަޝްވަރާތަކުގައި ސަރުކާރުގެ ފަރާތުން އިސްކޮށް އުޅުއްވާ ފިޝަރީޒް މިނިސްޓަރު މުހައްމަދު ޝައިނީ ވަނީ ވިދާޅުވެފަ އެވެ.

އެމްޑީޕީ އާއި އަދާލަތުގެ އަނެއް ޝަރުތަކީ އެ ދެ ޕާޓީ ވެސް ހިމެނޭ ގޮތަށް އުފައްދާފައިވާ މޯލްޑިވްސް ޔުނައިޓެޑް އޮޕޮޒިޝަން މަޝްވަރާތަކުގައި ބައިވެރި ކުރުމެވެ. އެކަމަކު ސަރުކާރުން ބުނެފައި ވަނީ އިއްތިހާދު ކިޔާ ޕާޓީއެއް ނުދަންނަ ކަމަށާއި އެ މީހުން މަޝްވަރާތަކުގައި ވެސް ބައިވެރިނުކުރެވޭނެ ކަމަށެވެ.

މަޝްވަރާއާ ގުޅޭގޮތުން ޝައިނީ މިއަދު ވެސް ވިދާޅުވީ ސަރުކާރުން މަޝްވަރާކުރާނީ ސިޔާސީ ޕާޓީތަކާ ކަމަށެވެ. އިދިކޮޅު ފަރާތްތަކުން މަޝްވަރާ ކުރަން ބޭނުން ވަނީ ވަކިވަކި ފަރުދުންގެ މަސްލަހަތު ހިމާޔަތްކުރަން ކަމަށް ވިދާޅުވެ ޝައިނީ ފާޑުވިދާޅުވި އެވެ.