"ފަންމޭޓްސް": ދިވެހިން ހެއްވާލުމުގައި

ސޯޝަލް މީޑިއާގައި ދިވެހިން ހެއްވާލުމުގައި ފުވައްމުލަކުގެ މި ތިން އަންހެން ކުދިން މި ވަނީ މަންޒަރު ބަދަލުކޮށްލައިފަ އެވެ. ދިވެހިންގެ ތެރޭގައި ހުރި މަޖާ އާދަތަކާއި ކަންތައްތަކަށް ވީޑިއޯ ހަދައިގެން މި ގުރޫޕުން ގިނަ ބައެއްގެ ސަމާލުކަން ހޯދައިފި އެވެ.

މިއީ ފުވައްމުލަކު "ފަންމޭޓްސް" އެވެ. މީގެ އަހަރެއްހާ ދުވަސް ކުރިންސުރެ ފޭސްބުކްގައި މަޖާ ވީޑިއޯ ހަދަމުން އަންނަނީ އުމުރު އަދި 18 އަހަރު ވެސް ނުވާ ތިން ކުދިންނެވެ. އެއީ އުމުރުން 17 އަހަރުގެ އައިމިނަތު އަމްނާ ރަޝީދު އާއި އައިމިނަތު އަރުޝާ ރަޝީދު އަދި 16 އަހަރުގެ މިލްހާ އަލީ އެވެ.

އެއް އާއިލާއަކަށް ނިސްބަތް ވާ މި ތިން ކުދިން ކުރިއްސުރެ ވެސް މީހުން ހެއްވަން ފޯރިނަގަ އެވެ. "ފަންމޭޓްސް"އަކީ އެ ސަކަރާތުގެ ބައެކެވެ.

އެކި ކަންކަމަށް ޖޯކު ޖަހައި މި ކުދިން އެކްޓުކޮށް ހަދާފައި ހުންނަ ވީޑިއޯތައް ސޯޝަލް މީޑިއާގައި ވަރަށް އަވަހަށް ވައިރަލް ވެ އެވެ. އެ ވީޑިއޯތައް ހަދާފައި ހުންނަނީ، ކޮމެޑީ ގޮތަކަށް އެކަމަކު މުޖުތަމައުގެ ތެރޭގައި ހިނގާ އެކި ކަންކަމަށް ބިނާކޮށްފަ އެވެ. ފިހާރައަކަށް ވަނުމަށް ފަހު ފަހަތުން "ސޭލްސް ގާލް" ނުނެއްޓި އުޅޭ ގޮތް އެއް ވީޑިއޯއަކުން ފެނެ އެވެ. ކައިވެންޏަށް ފަހު މައިދައިތަ ކައިރީ އަންހެން ކުއްޖާ އުޅޭ ގޮތް އެހެން ވީޑިއޯއެއްގައި ދައްކަ އެވެ. "މިއީ ފުވައްމުލަކު މަންމައިން އުޅޭ ގޮތް" ކަމަށް ބުނެ، މަންމައިންގެ ބައެއް އާދަތައް ވެސް މަޖާކޮށް ދައްކަ އެވެ.

މީގެ އިތުރުން ބުލީ ކުރުމާ ގުޅޭ ގޮތުން "ފަންމޭޓްސް"އިން ހެދި ވީޑިއޯއަކަށް ވަރަށް ގިނަ ބައެއްގެ ސަމާލުކަން ލިބުނެވެ.

މި ހުރިހާ ވީޑިއޯއެއްގައި އެކްޓުކޮށްފައި ހުންނަނީ މި ތިން ކުދިންނެވެ. ފޯނުން ވީޑިއޯކޮށް، އެޑިޓްކޮށް ހަދަނީ ވެސް އަމިއްލައަށެވެ.

އަމްނާ ބުނިގޮތުގައި ވީޑިއޯ ހަދައި ސޯޝަލް މީޑިއާގައި އާއްމުކުރުމުގެ ހިޔާލު އައީ އެއް ދުވަހަކު ފުވައްމުލަކު ތުނޑީގައި މަޖާކުރަން ތިބެފައި ނެގި ވީޑިއޯއަކަށް ފަހު އެވެ.

އެ ވީޑިއޯ ގިނަ ބަޔަކަށް ކަމުދިޔައީ އެވެ. އެއަށް ފަހު އެ މީހުން ދެން އައީ ހިންދީ ބަހުން، އެކި ކަހަލަ މަޖާ، ކުދި ވީޑިއޯތައް ނަގަމުންނެވެ.

"އަޅުގަނޑުމެން އަބަދުވެސް ސަކަރާތް ޖަހަން. ފިލްމީ ޑައިލޮގްތައް ކިޔާ އެ ރެކޯޑްކޮށް އެ ކަހަލަ ސަކަރާތެއްގައި އުޅެނީ. ދެން ސްކޫލުން ބާއްވާ ތަމްސީލުތަކުގައި ބައިވެރިވެ އަބަދުވެސް އެކްޓުކޮށް ހަދަން. އެހެން އުޅެނިކޮށް އައި ހިޔާލެއް މިއީ،" އަމްނާ ބުންޏެވެ.

މިއީ ދިވެހި އަންހެން ކުދިން ވަރަށް ނުކުރާ ކަމެއް ނަމަވެސް، އަމްނާ ބުނިގޮތުގައި މި ވީޑިއޯތަކުގެ ސަބަބުން އެ މީހުންނަށް ނެގެޓިވް ކޮމެންޓެއް އަދި ނުލިބެ އެވެ. މަގުމަތިން ދާއިރު "ފަންމޭޓްސް"އޭ ކިޔާފައި ބައެއް މީހުން ގޮވި ނަމަވެސް، އެއްވެސް ގޮތަކަށް އެކަން ގޯސްވެގެން އެހެން މީހުން ނޫޅޭ ކަމަށް ވެސް އޭނާ ބުންޏެވެ.

ގޭގެ އާއި ރަށުގެ އެކި ތަންތަނުގައި މި ކުދިން ކުރާ ވީޑިއޯތަކަށް އާއިލާގެ އެއްބާރުލުން ވެސް ލިބެ އެވެ. ތަފާތު ހިޔާލުތައް އެ މީހުން ދެ އެވެ. މިދިޔަ އަހަރު ސްކޫލު ނިންމުމަށް ފަހު، މިހާރު މަތީ ތައުލީމް ހާސިލް ކުރަމުން ވެސް "ފަންމޭޓްސް" ކުރިއަށް ގެންދެވެނީ ގިނަ ބައެއްގެ އެހީތެރިކަމާ އެކު ކަމަށް އަމްނާ ބުންޏެވެ.

"ހުރިހާ އެންމެން ވެސް ވަރަށް ޕޮޒިޓިވް. ވަރަށް ހިތްވަރު ދޭނެ މިކަން ކުރަން. ޕޭޖަށް ވެސް ވަރަށް ގިނައިން ރިކުއެސްޓް އާދޭ ވަކި އައިޑިއާއަކަށް ވީޑިއޯއެއް ހަދަން. ދެން އަޅުގަނޑުމެންނަށް އެންމެ ރަނގަޅު ކަމަށް ފެންނަ ހިޔާލުތަކަށް މިކަން ކުރަނީ،" އޭނާ ބުންޏެވެ.

އަމްނާއާ އޭނާގެ އެކުވެރިންގެ ހުވަފެނަކީ އެކްޓު ކުރުމެވެ. ފުރުސަތެއް ލިބިއްޖެ ނަމަ ފިލްމެއްގައި އެކްޓު ކުރަން ވެސް އެ މީހުން ތިބީ ތައްޔާރަށެވެ. އެހާވެސް އެކަމަށް އެމީހުން ތިބީ ލޯބި ޖެހިފަ އެވެ.

މިހާތަނަށް 50 އަށް ވުރެ ގިނަ ވީޑިއޯ ހަދައި، ސޯޝަލް މީޑިއާގައި މި ތިން ކުދިން ވަނީ އާންމުކޮށްފަ އެވެ. އެހެންކަމުން "ފަންމޭޓްސް"އަކީ މިހާރު މުޅި ރާއްޖެއަށް މަޝްހޫރު ގްރޫޕެކެވެ. އުމުރުން ހަގަސް، އެ މީހުންގެ އެ ހުނަރުވެރިކަން ގިނަ ބަޔަކު ބަލައިގެންފި އެވެ. އަމްނާ އާއި އޭނާގެ އެކުވެރިންގެ އުއްމީދަކީ ކުރިއަށް އޮތް ތަނުގައި މިފަދަ ގިނަ ވީޑިއޯތަކެއް ހަދައި ދިވެހިން ހެއްވާލުމެވެ.