ލަންކާ އަތުން ބޭނުންވަނީ ހުސްކޮށް އޮތް އެއާޕޯޓެއް ނޫން، ޚަރަދުކުރި ފައިސާ: ޗައިނާ

ކޮލަމްބޯ (އޮގަސްޓް 1) - ސްރީ ލަންކާގައި ބޮޑެތި މަޝްރޫއުތައް ހިންގުމަށް އެތައް އަހަރެއް ވަންދެން ނެގި ލޯނުގެ ސަބަބުން ގައުމު ވަނީ ބޮޑު ދަރަންޏަކާ ކުރިމަތިލާން ޖެހިފަ އެވެ. ގައުމުގައި ހިންގި މަޝްރޫއުތަކުން އެކަށީގެންވާ މިންވަރުގެ ފައިދާއެއް ވެފައެއް ނުވެ އެވެ. އެކަމަކު ނެގި ލޯނުތައް ދައްކަން ޖެހެ އެވެ.

ޗައިނާ އިން ލަންކާ އަށް ދޫކޮށްފައިވާ ދަރަނީގެ އަގު އަށް ބިލިއަން ޑޮލަރަށް އަރަ އެވެ. އެކަމަކު މި ފައިސާ ދެއްކޭނެ ގޮތެއް ނެތުމުން ސްރީ ލަންކާ އިން މިހާރު ވަނީ ޗައިނާ އިން ލަންކާގައި ކޮށްފައިވާ ބޮޑެތި އިންވެސްޓްމަންޓްތައް ކަމަށްވާ މައްތަލަ އިންޓަނޭޝަނަލް އެއާޕޯޓާއި ހަމްބަންޓޯޓާ ބަނދަރުގެ ބޮޑު ބައެއްގެ ކޮންޓްރޯލް ޗައިނާ އަށް ދޫކޮށްލުމަށް ބޮޑު ވަޒީރު ރަނިލް ވިކްރަމަސިންހަ ޗައިނާ ސަފީރު ޔި ޒިއަންލިއަން އަށް ހުށަހަޅުއްވައިފަ އެވެ. އެކަމަކު ޗައިނާ އިން ދިން ޖަވާބު ވަނީ ސަންޑޭ ޓައިމްސް ނޫހުގައި ލިޔެފަ އެވެ. ޗައިނާ ސަފީރު ޖަވާބު ދެއްވާފައި ވަނީ "އެ ތަންތަން ހިންގަން ޝައުގުވެރި ނުވާ ކަމަށެވެ. އަދި އެއީ ޗައިނާގެ ގާނޫނުތަކުގެ ދަށުން ކުރެވޭނެ ކަމެއް ނޫން" ކަމަށެވެ.

އެކަމަކު ޗައިނާ އިން ވަނީ ދަރަނީގެ މައްސަލައިގައި ލަންކާ އަށް އެހީވެދޭނެ ކަމަށް ބުނެފަ އެވެ. އަދި ޗައިނާގެ ކުންފުނިތައް މެދުވެރިކޮށް ވިޔަފާރި އުސޫލުން ލަންކާގެ އިންވެސްޓްމަންޓްތައް ހިންގިދާނެތޯ ބެލިދާނެ ކަމަށް ބުނެފައިވެ އެވެ. މި ގޮތުން ޗައިނާގެ އިންފޮމޭޝަން ޓެކްނޮލޮޖީ ކުންފުންޏެއް ކަމަށްވާ އައިޒެޑްޕީ ވަނީ މައްތަލަ އެއާޕޯޓް ހިންގަން ހަވާލު ކުރަން ނިންމައިފަ އެވެ. އަދި ހަމްބަންޓޯޓާ ބަނދަރު ހިންގަން ހަވާލު ކުރަން އުޅެނީ ކޮސްކޯ ކުންފުންޏާ އެވެ. އެކަމަކު މި ކުންފުނިތަކުން ހަވާލުވާ ތަންތަނުން މިހާތަނަށް ފައިދާއެއް ވެފައެއް ނެތެ އެވެ. އަދި އެއީ އިގްތިސާދީ ގޮތުން ދެމެހެއްޓެނިވި ގޮތުގައި ކުރިއަށް ގެންދެވިދާނެ ތަންތަން ކަން ސާބިތުކޮށްދެވިފައެއް ވެސް ނެތީމަ އެވެ.

މައްތަލަ އެއާޕޯޓަށް 210 މިލިއަން ޑޮލަރު ޚަރަދުކޮށްފަ އެވެ. މީގެ ތެރޭން ލޯނުގެ ގޮތުގައި ޗައިނާ އިން ވަނީ 190 މިލިއަން ޑޮލަރު ދީފަ އެވެ. އަދި ކުރީގެ ރައީސް މަހިންދާ ރާޖަޕަކްސާގެ ރަށް ކަމަށްވާ ހަމްބަންޓޯޓާ ބަނދަރުގެ ފޭސް އެކަކަށް ވަނީ 361 މިލިއަން ޑޮލަރު ޚަރަދުކޮށްފަ އެވެ. މީގެ ތެރޭން 85 ޕަސެންޓަކީ ޗައިނާގެ އެގްޒިމް ބޭންކުން ދިން ލޯނެވެ.

ލަންކާ އިން ދަރަނި އަދާ ނުކުރެވުނު ނަމަވެސް ޗައިނާ އިން ކުރާ އިންވެސްޓްމަންޓް ނިމުމަކަށް ނުގެނެ އެވެ. ލަންކާގައި ބިން ހިއްކައިގެން ޗައިނާ އިން ހަދާ ކޮލަމްބޯ ޕޯޓް ސިޓީ ޕްރޮޖެކްޓް ވެސް އޮތީ ކުރިއަށް ގެންދާ ގޮތަށެވެ. މި ޕްރޮޖެކްޓުގެ އަގު ވެސް 1.5 ބިލިއަން ޑޮލަރަށް އަރަ އެވެ. ޕޯޓް ސިޓީ މަޝްރޫ ކުރިއަށް ގެންދަނީ ޗައިނާ ސަރުކާރުގެ ކުންފުންޏެއް ކަމަށްވާ ޗައިނާ ކޮމިއުނިކޭޝަން ކޮންސްޓްރަކްޝަން ކޮމްޕެނީ (ސީސީސީސީ) އިންނެވެ. އަދި ހަމްބަންޓޯޓާގައި ސްޕެޝަލް އިކޮނޮމިކް ޒޯން (އެސްއީޒެޑް) ގާއިމް ކުރުމަށް 15،000 އޭކަރުގެ ބިން ހޯދަން މިދިޔަ ހަފުތާގައި ވަނީ އެދިފަ އެވެ.

ކޮލަމްބޯ ޕޯޓް ސިޓީ އަކީ ކުރީގެ ރައީސް ރާޖަޕަކްސާގެ ސަރުކާރުން ޗައިނާއާ އެކު ކުރިއަށް ގެންދަން ނިންމި މަޝްރޫ އެކެވެ. ނަމަވެސް އާ ސަރުކާރު އައިސް މި މަޝްރޫއު ވަނީ މަޑު ޖައްސާލައިފަ އެވެ. ސީސީސީސީ އިން ބުނެފައި ވަނީ މަޝްރޫއު ހުއްޓާލާފައި އޮތް ކޮންމެ ދުވަހަކު އެ ކުންފުންޏަށް 380،000 ޑޮލަރުގެ ގެއްލުންވެފައިވާ ކަމަށެވެ. އެހެން ކަމުން ގެއްލުމުގެ ބަދަލެއްގެ ގޮތުން 125 މިލިއަން ޑޮލަރު ލަންކާ އިން ހޯދުމަށް ސީސީސީސީ އިން ވަނީ މަސައްކަތް ކޮށްފަ އެވެ. މި މަޝްރޫއުގައި ސޮއިކުރެވޭނެ ކަމަށް ބެލެވެނީ މި މަހު 15 ގަ އެވެ.

ލަންކާގެ ބޭރުގެ ދަރަނި 58 ބިލިއަން ޑޮލަރަށް އަރާ ކަމަށްވެ އެވެ. ސަރުކާރަށް ލިބޭ އާމްދަނީގެ 95.4 ޕަސެންޓް ހޭދަ ކުރަން ޖެހިފައި ވަނީ ދަރަނި ދެއްކުމަށެވެ. މާނައަކީ ސަރުކާރަށް ލިބޭ ކޮންމެ ޑޮލަރުން ގައުމުގެ މުހިންމު ކަންކަމަށް ހޭދަކުރަން ލިބެނީ 4.60 ސެންޓް ކަމެވެ.