ކޮލަމް ކުލަބަރި: މިސްރާބު ޔޫރަޕް ފެންވަރުގެ "ޖާހިލިއްޔަ ޒަމާނަށް"!

"ރާއްޖެ އާއި އީރާނާ ދެމެދު އިތުރަށް ގުޅުން ބަދަހި ވާނެ ކަމަށް އުއްމީދު ކުރަން."

އެއީ މިދިޔަ އޭޕްރީލް މަހު ފަހުކޮޅު ރައީސް އަބްދުﷲ ޔާމީން ވިދާޅުވި ބަސްފުޅެކެވެ. އީރާނުން ރާއްޖެ އަށް ކަނޑައެޅި އާ ސަފީރު މުހައްމަދު ޒައޭރީ އަމިރާނީ މަގާމުގެ ލިއުން ހަވާލުކުރުމަށް ރައީސް އޮފީހުގައި ބޭއްވި ރަސްމިއްޔާތުގައި އެމަނިކުފާނު ވިދާޅުވީ އެހެންނެވެ. ދެ ގައުމުގެ ދެމެދު އޮތް ގުޅުން އިތުރަށް ބަދަހިކުރެވޭނެ ގޮތްތަކާ ގުޅޭ ގޮތުން އެ ދެ ބޭފުޅުން މަޝްވަރާ ކުރެއްވި އެވެ. ހާއްސަކޮށް، ސާފުކުރި ތެޔޮ ރާއްޖެ އަށް އެތެރެކުރުމާ ގުޅޭ ގޮތުންނެވެ.

ރައީސްގެ އެ ވާހަކަފުޅަށް މަސްދުވަސް ވެސް ނުވަނީސް އިވިގެން ދިޔައީ އީރާނާ އޮތް 40 އަހަރު ވީ ހާރިޖީ ގުޅުން ކަނޑާލި ވާހަކަ އެވެ. މާ ބޮޑު ސަބަބެއް ދެއްކުމަކާ ނުލާ ފޮރިން މިނިސްޓްރީން ބުނިހާ ވެސް އެއްޗަކީ ގަލްފު ސަރަހައްދުގައި ސުލްހަމަސަލަސްކަން ގާއިމުވެފައި އޮތުން ރާއްޖޭގެ ސަލާމަތާ ގުޅިފައިވާ ކަމަށެވެ.

ރާއްޖޭން ރަސްމީކޮށް ގެންގުޅެނީ ވަކި ފަރާތަކަށް ނުޖެހޭ ހާރިޖީ ސިޔާސަތެކެވެ. އެކަމަކު، ރައީސް ޔާމީން ވެރިކަމާ ހަވާލުވެވަޑައިގެން މިހާތަނަށް އައި އިރު ފެންނަނީ އެންމެ ގިނަ އެހީ އާއި ލޯނު ދޭ ގައުމަކަށް ދީލައިލާ ތަނެވެ.

ޖީއެމްއާރު އެގްރިމެންޓް ފަދަ އެތައް މައްސަލައަކާ ގުޅިގެން، އިންޑިއާއާ އެކު އޮންނަ ގުޅުމުގައި ކުނި ޖެހުމުން ،އެނބުރިގަތީ ޗައިނާއާ ދިމާލަށެވެ. ޗައިނާ އިން އިންޑިއާ ކަނޑުގައި ގަތަމުން ގެންދާ ހާރަށް ރާއްޖެ އިތުރުވީ އެވެ. ސްރީ ލަންކާގެ ސަރުކާރު ބަދަލުވެ، ޗައިނާއާ ތަންކޮޅެއް ދުރު ސިޔާސަތެއް ގެންގުޅޭ ވެރިކަމެއް އެ ގައުމުގައި ގާއިމްވުމުން ލިބުނު ގެއްލުމުގެ ފައިދާ ރާއްޖޭން ނެގި އެވެ. ލަންކާއާ އެކު ގެއްލުނު މުތުގެ ބަދަލުގައި ޗައިނާގެ ހާރު މިހާރު ފުރިހަމަ ކޮށްދެނީ ރާއްޖޭންނެވެ.

އެކަމަކު، ޗައިނާގެ ބާރު އިންޑިއާ ކަނޑުގައި ގަދަކުރާ ތަން ބަލަން އިންޑިއާ އަށް ކެތެއް ނުކުރެވުނެވެ. އިންޑިއާގެ ސިޔާސަތު ވެސް ބަދަލުކޮށް، ރާއްޖެއާ ގުޅިގެން އުޅުމުގެ ވިސްނުން އެ ގައުމުން ވެސް މިހާރު ވަނީ ހިޔާރުކޮށްފަ އެވެ. ސީމެގްގެ އެޖެންޑާގައި ރާއްޖެ ނުހިމަނާނެކަން ޔަގީން ކުރަން އެންމެ ފަހުން އިންޑިއާ އަށް ދޭން ޖެހުނު އަގަކީ ރާއްޖޭގެ އުތުރު ކަމަށް، ބައެއް ފަރާތްތަކުން، ބުނެ އެވެ. ސައުދީން ވެސް ޝައުގުވެރިކަން ފާޅުކޮށްފައިވާ އިހަވަންދިއްޕޮޅު ނުވަތަ އައިހެވަންއޭ، ސިޔާސީ ކަންކަމާ މެދު ވިސްނާ ބައެއް ފަރާތްތަކުން ލަފާކުރެ އެވެ. ރައީސް ޔާމީން އެންމެ ފަހުން އިންޑިއާ އަށް ކުރެއްވި ދަތުރުފުޅުގައި އެ މޭރުމުން ވާހަކަފުޅު ދައްކަވާފައިވެ އެވެ.

އީރާނާ އެކު އޮތް ގުޅުން ކަނޑާލުމުން ރާއްޖެ އަށް ސީދާ ގޮތުން މާ ބޮޑު ގެއްލުމެއް ނުލިބި ދާނެ އެވެ. އެކަމަކު، އެކަމުން އެހެން ގައުމުތަކަށް ދޭ މެސެޖު އިންތިހާ އަށް ގޯހެވެ. ސައުދީގެ މުށުތެރޭގައި ހަމަ ރަނގަޅަށް ވެސް ރާއްޖެ ތާށިވެފައި ވާކަން ވަރަށް ރަނގަޅަށް ސާބިތުވެ އެވެ. މި ސަރައްހަދުގައި ވަކި ހިއްޕާލަން ގިނަ މަސައްކަތްތަކެއް ކުރަމުން އަންނަ ޗައިނާ އަކީ، އެއް ބަޔަކު ދެކޭ ގޮތުގައި، ބޮޑު ބިރެކެވެ. ހާއްސަކޮށް، ސަރަހައްދީ ބޮޑު ބާރު އިންޑިއާ އިން ރާއްޖެއާ އެކު ގުޅުން ބަދަހިކުރަން އާ ބާރަކާ އެކު ފަށާފައިވާ މަސައްކަތްތަކަށް ހުރަސް އެޅޭނެ އެވެ.

މި ހުރިހާ ކަމަކަށް ހުޅަނގު އޮތީ ބަލަބަލަ އެވެ. އެކަމަކު، އެއީ ސަރުކާރަށް މާ ބޮޑު މައްސަލައަކަށް ނުވެ އެވެ. ރާއްޖޭގެ ދާހިލީ ކަންކަމަށް ހުޅަނގުން ނުފޫޒު ފޯރުވާ ކަމަށް ރައީސް ޔާމީން އަބަދު ވެސް ތުހުމަތު ކުރައްވަ އެވެ. އަމިއްލަ ކަންކަން އަމިއްލަ އަށް ނިންމުމުގެ ގާބިލްކަން ރާއްޖެ އަށް ލިބިފައިވާކަން އެ މަނިކުފާނުގެ ކޮންމެ ވާހަކަފުޅެއްގައި ކަހަލަ ގޮތަކަށް ހަނދާން ކޮށްދެއްވަ އެވެ. އެކަމަކު، އެއީ ފައިސާއާ ޖެހެން ދެންނެވެ. މާ ގިނަ ފައިސާގެ އެހީތަކެއް ނުދޭތީ ހުޅަނގުގެ ގައުމުތައް ގޯސް ވާއިރު، އަރަބި ކަރައަށް ސަރުކާރު ދީލައި ލަނީ ފައިސާ އޮއްސާތީ އެވެ.

އެ އެހީތަކާ އެކު ގުޅުން ބަދަހިކުރަން ޖެހިފައި ވަނީ ޑިމޮކްރެސީއާ ބީރަށްޓެހި ގައުމުތަކާ އެވެ. އެހެންވެ، ގެންގުޅެން ޖެހެނީ އެ ގައުމުތަކުގައި އޮންނަ ފަދަ ހުދުމުހުތާރު އުސޫލުތަކެވެ. ކުރިއަރާފައިވާ ގައުމުތަކުން ކިޔާ ފާޑުކިއުންތައް ގަބޫލުކޮށް، އެ ކަންކަން އިސްލާހު ކުުރުމުގެ ބަަދަލުގައި ސަރުކާރުން ނެރެނީ އެ އަށް ވުރެ ވަރުގަދަ ރައްދެކެވެ. އދ. އާއި އެ ނޫން ވެސް ބޮޑެތި ޖަމާއަތްތަކުން ވެސް ރާއްޖެ އަށް ފޮނުވަނީ އެއްވެސް އެއްޗަކަށް ނުވާ ކަހަލަ "ނޯޓެވެ". އެ ފަރާތްތަކުން އުޅެނީ، ސަރުކާރުގެ ވިސްނުމުގައި، ސިޔާދަތަށް އަރައިގަނެ، އެެހެން ދީންތައް ފަތުރާށެވެ.

އެކަމަކު، ދިވެހިންނެކޭ އެއްގޮތަށް، އެ ގައުމުތަކުން ދައްކަނީ ހުރި މައްސަލަތަކުގެ ވާހަކަ އެވެ. މުޅި ދައުލަތުގެ ތެރޭގައި ކޮރަޕްޝަނާއި ފަސާދައިގެ ނުބައި އަމަލު ފެތުރިފައިވާ މައްސަލަ އެވެ. ރައްޔިތުންގެ އަސާސީ ހައްގުތައް ކަށަވަރު ނުކޮށްދެވޭ ތާނގައި އެ ހައްގުތަކަށް އަރައިގަންނަ ވާހަކަ އެވެ. ރައްޔިތުންގެ ބަސް އިއްވަން ތިބޭ މަންދޫބުންނާއި އިންސާފު ގާއިމުކޮށްދޭން ތިބި ބައެއް ފަރާތްތަކުން ރިޝްވަތު ނަގާ މައްސަލަ އާއި މަގާމަށް ކުފޫ ހަމަނުވާ ވާހަކަ އެވެ. ގޮވާލަނީ ޑިމޮކްރެސީގެ މަގަށް ރުޖޫއަވެ، ދިވެހިން ހިޔާރުކޮށްފައިވާ ވެރިކަމުގެ ނިޒާމު ކިލަނބުކުރުމުން ދުރުހެލިވުމަށެވެ.

ރާއްޖެ އަށް ވުރެ އެތައް ތަނެއް ރަނގަޅު ގައުމުތަކުގައި ވެސް މައްސަލަ ހުންނާނެ އެވެ. ނުކިއްސަރު ކަންކަން ވެސް ހިނގާނެ އެވެ. އެ ފަރާތްތަކުން ފާޑުކިޔަނީ އަމިއްލަ ގައުމުގައި ހުރިހާ ކަމެއް ބަރާބަރަށް އޮންނާތީކީ ނޫނެވެ. އެ ގައުމުތަކުގެ ތަފާތަކީ ކަންކަން ރަނގަޅު ކުރަން މަސައްކަތް ކުރުމެވެ. އޭގެ ބަދަލުގައި، ރާއްޖޭން ގާތް ވަމުން މި ދަނީ އިންސާނީ ހައްގުތަކަށް އަރައިގަތުމުގައި އެންމެ ކުރީގައި އުޅޭ ގައުމުތަކާ އެވެ. އެ ގައުމުތަކުގެ ބަސް ނާހާ ވާކަށް ވެސް ނޯވެ އެވެ. އެހެންވެ، ދޭ ފައިސާކޮޅަށް ބަލައިގެން ދެން ހުރި ހުރިހާ ގައުމަކާ ދުރުވަނީ އެވެ.

އެކަމަކު، "ގަންނާނެއްބާ" އުސޫލުން، ދެ ދަޅަޔަށް ބަދަލުވާ ގޮތަށް ހާރިޖީ ސިޔާސަތު ބައްޓަންކޮށްގެން ލިބޭނެ މޮޅެއް ނެތެވެ. ޔޫރަޕްގެ "ޖާހިލިއްޔަ ޒަމާނު"ން މިސާލު ނަގައިގެން، ބަވަނަވެފައިވާ މި ދުނިޔޭގައި އެންމެންނާ ދެކޮޅަށް ތެދުވުމަކީ މޮޔަ ކަމަކަށް ނޫނީ ނުވާނެ އެވެ.