އިބޫގެ ކެމްޕޭނާ ގުޅުވައި ފުލުހުން ބިރުދައްކައި އިންޒާރު ދިނުން ހުއްޓާލަން ގޮވާލައިފި

އިދިކޮޅު ޕާޓީތަކުގެ ރިޔާސީ ކެންޑިޑޭޓު، އިބްރާހިމް މުހައްމަދު ސޯލިހް (އިބޫ)ގެ ކެމްޕޭނާ ގުޅުވައި ރައްޔިތުންގެ ހިތުގައި ބިރުވެރިކަން އުފައްދައި އިންޒާރު ދިނުމުގެ އަމަލުތަކެއް ފުލުހުން ހިންގަމުންދާ ކަމަށް ބުނެ އެކަން ހުއްޓާލުމަށް އިދިކޮޅު ޕާޓީތަކުން މިއަދު ގޮވާލައިފި އެވެ.

ރިޔާސީ އިންތިޚާބަށް ކޯލިޝަން ހަދާފައިވާ އިދިކޮޅު ޕާޓީތަކުން ބޭއްވި ނޫސްވެރިންގެ ބައްދަލުވުމުގައި، އެ ޕާޓީތަކުން ބައިވެރިވެވަޑައިގަތް ބޭފުޅުން ވިދާޅުވީ ފުލުހުންގެ މުއައްސަސާގެ ނަމުގައި މަދު ބަޔަކު ނޫސް ކޮންފަރެންސް ބާއްވައި ދައްކަމުން ދަނީ "ސިޔާސީ ވާހަކަތަކެއް" ކަމަށެވެ. އޭގެތެރޭގައި އިބޫގެ ކެމްޕޭނާ ގުޅުވައި ތަފާތު މައްސަލަތައް އުފައްދަން އުޅޭ ކަހަލަ ވާހަކަތަކެއް ދައްކަމުންދާ ކަމަށާއި ބޭނުމަކީ ރައްޔިތުންނަށް ބިރުދައްކައި ކެމްޕޭނަށް ހުރަސް އަޅަން ކަމަށް ވެސް ޕާޓީތަކުން ތުހުމަތު ކުރެ އެވެ.

ރިޔާސީ އިންތިޚާބުގައި، ޕީޕީއެމްގެ ކެންޑިޑޭޓެއްގެ ގޮތުގައި ރައީސް އަބްދުﷲ ޔާމީނާއި އިދިކޮޅުން އިބޫ ވާދަކުރައްވާއިރު، ހަމަހަމަ ފުރުސަތުތައް ނުދީ، އިބޫއާ ދޭތެރޭ ބޭއިންސާފުން އަމަލުކުރަމުންދާ ކަމަށް ބުނެ ޕާޓީތަކުން ކަންބޮޑުވުން ފާޅުކުރި އެވެ. އެކަން އެގޮތަށް ކުރަނީ، ރައީސް ޔާމީން ބޭނުންފުޅުވެގެން، ސަރުކާރުގެ ނުފޫޒު ފުލުހުންގެ މުއައްސަސާގެ މަދު ބަޔަކަށް ފޯރުވައިގެން ކަމަށް ވެސް ޕާޓީތަކުން ބުންޏެވެ.

ޖުމްހޫރީ ޕާޓީގެ ސެކްރެޓަރީ ޖެނެރަލް އަހްމަދު ސަމީރު ވިދާޅުވީ އިންތިހާބަށް ހަމަނުޖެހުން އުފައްދަން އުޅޭ ކަމަށް ބުނުމަށް ފަހު، އިބޫގެ ދެއްކެވި ވާހަކައެއް ތަހުގީގު ކުރަން ފަށާފައިވާ ކަމަށް ފުލުހުން މިއަދު އާއްމުކުރުމުން، އެ ވާހަކަތަކުގެ ފަހަތުގައި ވަނީ ކޮން ކަންތައްތަކެއް ކަން ސާފުވާ ކަމަށެވެ. ފުލުހުންގެ އަމަލުތަކާއި ނެރެމުންދާ ސިޔާސީ ބަޔާންތަކުން، ރައީސް ޔާމީނަކީ ފުލުހުންގެ މުއައްސަސާ އިން ކުރިމަތިލައްވައިގެން އުޅޭ ކެންޑިޑޭޓެއްގެ ގޮތުގައި ސިފަވާ ކަމަށް ވެސް ވިދާޅުވި އެވެ.

"ކޮންމެ ދުވަހަކު ވެސް މި ފެންނަނީ، އިބްރާހިމް މުހައްމަދު ސޯލިހްގެ ކެމްޕޭން ސްޕޯކްސްޕާސަން އަލްއުސްތާޒާ މާރިޔާ ދީދީ ޕްރެސްއެއް ދެއްވާއިރަށް، އޭގެ ފަހަތުން ޕޮލިސް ސާވިސް އިން އަރައި، ރައީސް ޔާމީންގެ ކެމްޕޭން އޮފީހުން ކަހަލަ ގޮތަކަށް ދޭހަވާ ގޮތަކަށް ޕްރެސްއެއް ދެއްވާ ތަން،" ސަމީރު ވިދާޅުވި އެވެ.

އޭނާ ވިދާޅުވި ގޮތުގައި ރައްޔިތުންގެ ހިތްތަކުގައި ބިރުވެރިކަން އުފައްދާ ކަހަލަ މޭރަމަކުން ފުލުހުން ވާހަކަ ދައްކާއިރު، މި އިންތިޚާބާ ގުޅޭ ގޮތުން ފުލުހުން އާއްމުކުރި އެއްވެސް ބަޔާނެއްގައި ނުވަތަ ދިން ޕްރެސް ކޮންފަރެންސެއްގައި ރައްޔިތުންގެ ވޯޓުލުމުގެ ހައްގު ކަށަވަރުކޮށްދީ، ވޯޓުގައި މަކަރު ހެދުމުގެ ފުރުސަތު ނުދޭނެ ކަމަށް ބުނެފައެއް ނުވެ އެވެ.

އެމްޑީޕީގެ ސެކްރެޓަރީ ޖެނެރަލް އަނަސް އަބްދުއްސައްތާރު ވެސް ވިދާޅުވީ އިންތިޚާބުގައި ދެ ކެންޑިޑޭޓަކު ވާދަކުރައްވާއިރު، މުޅިން ވެސް ފެންނަނީ އެއް ކެންޑިޑޭޓަކު ހިމާޔަތް ކުރައްވަން، އަނެއް ކެންޑިޑޭޓެއްގެ ކެމްޕޭނަށް ހުރަސްއަޅަން އުޅޭ ފަދަ ވާހަކަތަކެއް ކަމަށެވެ.

އޭނާ ވިދާޅުވި ގޮތުގައި އިބޫ އާއި އިދިކޮޅު ޕާޓީތަކުގެ ކެމްޕޭނަށް ރައްދުދީ ފުލުހުން ސިޔާސީ ވާހަކަތައް ދައްކަމުންދާއިރު، މި ކެމްޕޭން ފެށުނު ފަހުން ވެސް ފުލުހުންގެ އެއްބާރުލުމެއް ނުލިބެ އެވެ.

ފުލުހުންގެ އަމަލުތަކުގައި ހަމަހަމަކަމެއް ނެތް ކަމުގެ މިސާލު ނަންގަވައި އަނަސް ވިދާޅުވީ ހުޅުމާލޭގައި އިބޫ ކެމްޕޭން ކުރައްވަމުން ގެންދަވަނިކޮށް ހަމަލާދިން މައްސަލަ ވެސް ތަހުގީގުކޮށް މިހާތަނަށް އެޅި ފިޔަވަޅެއް ނެތެވެ. އެއާއެކު، ޕީޕީއެމުން ހުޅުމާލޭގައި ބޭއްވި ރަސްމީ ކެމްޕޭން ހަރަކާތެއްގައި، ކުރީގެ ރައީސް މުހައްމަދު ނަޝީދުގެ ބޯކަނޑާލަން ގޮވާލި މައްސަލައެއް ވެސް ބަލައިފައެއް ނުވެ އެވެ.

މި މައްސަލަތައް ތަހުގީގު ނުކޮށް، އިދިކޮޅު ކެންޑިޑޭޓުގެ ކެމްޕޭން ދަތުރުތައް ހުއްޓުވަން މަސައްކަތް ކޮށްފައިވާ ކަމަށް ވިދާޅުވި އެވެ. އެގޮތުން، އިބޫ ހުވަދު އަތޮޅަށް ޝެޑިއުލްކުރެއްވި ދަތުރު ފަސްކުރަން ފުލުހުން އެންގި ކަން އަނަސް ފާހަގަކުރެއްވި އެވެ.

އޭނާ ވިދާޅުވި ގޮތުގައި ކެމްޕޭނަށް މާލޭގެ މަގުތަކުގައި ދިދަ ދެމިއިރު ވެސް، ސަލާމަތީ ކަންކަން ބަލަހައްޓަން ފުލުހުންގެ މުއައްސަސާ އިން ކެމެރާތަކަށް ވުރެން މަތީގައި ދިދަ ދަމަން ބަޔާނެއް ނެރުމަށް ފަހު، އެއާޚިލާފަށް ރައީސް ޔާމީންގެ ކެމްޕޭން ދިދަ ދަމަން ފުރުސަތު ދެއްވި އެވެ.

"އަޅުގަނޑުމެންނަށް މި ފެނިގެން ދިޔައީ، ފުލުހުންގެ އިދާރާ އެކީގައި ރައީސް ޔާމީންގެ ދަށަށް ނުވަތަ ތިރިއަށް، ނުވަތަ ކުޑަކަކޫ ޖަހަން ޖެހޭ ތަން. މިއީ އެއްގޮތަކަށް ވެސް އެތަނުގައި ތިބި ފުލުހުންގެ ތާއީދާއެކު ކުރާ ކަމެއް ނޫން ކަން ވެސް އަޅުގަނޑަށް އެނގޭ،" އަނަސް ވިދާޅުވި އެވެ.

ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައިވާ މަޑުއްވަރީ ދާއިރާގެ މެމްބަރު، މުހައްމަދު އަމީތު ވިދާޅުވީ ވަކި ކެންޑިޑޭޓެއްގެ ކެމްޕޭނަށް ތާއީދުކޮށް ވާހަކަ ދެއްކުމަށް ވުރެން ބޮޑަށް، ފުލުހުން ތަހުގީގު ކުރަން ޖެހޭ މައްސަލަތައް އެބަހުއްޓެވެ. އޭގެތެރޭގައި، ވީނުވީއެއް ނޭނގި ގެއްލިފައިވާ ނޫސްވެރިޔާ އަހްމަދު ރިލްވާން މަރުވެފައިވާ ކަމަށް ރައީސް ޔާމީން ވިދާޅުވުމާއި ރައްޔިތުންގެ މަޖިލީހުގެ މެމްބަރުންގެ ގޮނޑިތައް ގާނޫނާ ޚިލާފަށް ގެއްލުވާލަން މަސައްކަތް ކުރެއްވި ކަމަށް ރައީސް ޔާމީން ވިދާޅުވި މައްސަލަ ހިމެނޭ ކަމަށް ވެސް އޭނާ ވިދާޅުވި އެވެ.

ސަމީރު ވިދާޅުވީ ފުލުހުންގެ މުއައްސަސާ އަށް ސަރުކާރުން ނުފޫޒު ފޯރުވަމުން ދިޔަ ނަމަވެސް 90 ޕަސެންޓް ތާއީދު އިބޫ އަށް ތާއީދު ކުރައްވާ ކަމަށެވެ. ފުލުހުންގެ މުއައްސަސާ ސިޔާސީ ކުރަން އުޅުނަސް، ބޯނުލަނބައި ކެތްތެރިވުމަށް ސަމީރު ގޮވާލެއްވި އެވެ.