މަންނާނު ވަކިނުކުރަން ނިންމައި ވަޒީފާ ދީފި

ޑިސިޕްލިނަރީ މައްސަލައެއް ބެލުމަށް ފަހު، ފުލުހުންގެ ވަޒީފާ އިން ވަކިކުރަން ނިންމާފައި ހުރި އެސިސްޓެންޓް ކޮމިޝަނާ އޮފް ޕޮލިސް، އަބްދުލް މަންނާން ޔޫސުފް އަލުން ފުލުހުންގެ ވަޒީފާ އަށް ނުކުތުމުގެ ހުއްދަ މިދިޔަ ހަފުތާގައި ދީފި އެވެ.

މަންނާނު ފުލުހުންގެ ވަޒީފާ އިން ވަކިކުރަން، ފުލުހުންގެ ޑިސިޕްލިނަރީ ބޯޑުން މިދިޔަ މޭ މަހު ނިންމީ ސިއްރު މައުލޫމާތުތަކެއް ހިއްސާ ކުރަން ނުޖެހޭ މީހަކާ ހިއްސާކުރި މައްސަލައިގަ އެވެ.

މަންނާނަކީ ކުރީގެ ކޮމިޝަނާ އޮފް ޕޮލިސް އަބްދުﷲ ރިޔާޒާއި އަހުމަދު އަރީފާ ގާތް ގުޅުމެއް އޮންނަ ބޭފުޅެކެވެ. އެކެއް ފެބްރުއަރީގައި ސުޕްރީމް ކޯޓުން ނެރުނު އަމުރަށް ފަހު ހިނގައި ދިޔަ ކަންތައްތަކަށް ފަހު މަންނާނު ހުރީ އެއްވެސް ޒިންމާއެއް ހަވާލުނުކޮށް ބަހައްޓައިފަ އެވެ.

މަންނާނު ވަޒީފާ އިން ވަކިކުރަން ނިންމި މައްސަލަ ފުލުހުންގެ އިސްތިއުނާފު ބޯޑު ކަމަށްވާ އެޕީލް ބޯޑަށް މަންނާނުގެ ފަރާތުން ހުށަހެޅުމުން އެ ބޯޑުން ނިންމީ ޑިސިޕްލިނަރީ ބޯޑުގެ ނިންމުން އަލުން މުރާޖައާ ކުރުމަށެވެ.

އެނގިފައިވާ ގޮތުގައި މަންނާނު ވަކިކުރަން ނިންމި ނިންމުން ފުލުހުންގެ ޑިސިޕްލިނަރީ ބޯޑުން ބާތިލުކުރީ ރިޔާސީ އިންތިހާބުގެ ވަގުތީ ނަތީޖާ އިއުލާން ކުރުމަށް ފަހު އެވެ. އަދި މިދިޔަ ހޯމަ ދުވަހުން ފެށިގެން މަންނާނު ވަޒީފާ އަށް ނުކުމެވަޑައިގަންނަވަ އެވެ.